Langsung ke konten

Langsung ke menu sekunder

Langsung ke daftar isi

Saksi-Saksi Yehuwa

Dayak Ngaju

Mambarita—Edisi Palajaran  |  Desember 2017

’Katawangku Iye Kareh Belom Haluli’

’Katawangku Iye Kareh Belom Haluli’

”Paharin itah Lasarus jari batiroh, tapi Aku handak haguet mampisik ie.”​—YOHANES 11:11.

NYANYIN: 129, 154

1. Aluh Lasarus jadi matei, Marta yakin akan hal narai? (Payah gambar hong tamparan artikel.)

MARTA, sobat tuntang murid Yesus, kanjera pehe atei. Paharin ayu je bagare Lasarus matei. Narai je tau mahibur iye? Yesus bajanji, ”Paharim kareh belom haluli.” Auh te puna dia tau mampanihau uras kapehen atei Marta. Tapi, iye percaya janjin Yesus tuntang hamauh, ”Katawangku Lasarus kareh belom haluli amon oloh matei impisik hong Andau Kiamat [’andau je pangkarahia’, NW].” (Yohanes 11:20-24) Marta yakin uluh matei akan belum haluli rahian andau. Tapi, rahian tinai Yesus manampa mukjizat. Andau te kea, iye mampisik Lasarus.

2. Mbuhen itah kea handak yakin kilau Marta?

2 Itah katawan Yesus atawa Bapa dia mampisik uluh matei wayah tuh. Tapi kilau Marta, en itah yakin amun uluh je inyinta itah imbelum haluli rahian andau? Mungkin kabalin, indu, bapa, tambi, bue, atawa  anak je inyinta itah jadi matei. Itah taharu handak mamangkut, bapander, tuntang tatawe dengan ewen. Itah pasti hanjak awi kilau Marta, itah tau hamauh dengan yakin, ’Katawangku uluh je inyintaku akan belum haluli.’ Aluh kalute, itah perlu mangumang alasan itah yakin akan hal te.

3, 4. Narai je haru inggawi Yesus, tuntang kilen ampi jite manampa Marta sasar yakin?

3 Awi melai hong tukep Yerusalem, Marta mungkin dia manampayah Yesus mampisik anak hatue bara ije biti balu hong tukep kota Nain melai Galilea. Tapi, iye mungkin mahining kabar’ah. Iye mungkin mahining kea Yesus mampisik anak bawin Yairus. Uras uluh hong human Yairus ”katawan anak bawi te jari matei”. Tapi, Yesus mimbing lengen anak te tuntang hamauh, ”Misik ih, nak!” Tuntang hemben te kea iye hingkat. (Lukas 7:11-17; 8:41, 42, 49-55) Marta tuntang Maria katawan amun Yesus tau mampakeleh uluh haban. Jadi, ewen yakin jaka ih Yesus tege melai kanih, Lasarus dia baka matei. Tapi, tuh Lasarus jadi matei. Jadi, narai je ingahandak Marta? Iye hamauh Lasarus akan belum haluli hong ”andau je pangkarahia”, iete hong andau rahian. Mbuhen iye percaya tutu? Tuntang, mbuhen itah tau yakin amun hong andau rahian, akan tege kamisik uluh matei je mungkin termasuk uluh je inyinta itah?

4 Tege kare bukti je tau manampa itah yakin dengan kamisik. Itah akan mambahas hal te. Mungkin Pahari akan mandinun palajaran bahalap bara Surat Barasih je hindai puji tapikir, tapi tau manampa sasar percaya amun itah akan hasundau hindai dengan uluh je inyinta.

BUKTI JE MAMPAABAS KAPERCAYAN!

5. Mbuhen Marta yakin Lasarus akan impisik?

5 Marta dia hamauh, ’Keleh Lasarus kareh belum haluli.’ Tapi, Marta hamauh, ”Katawangku Lasarus kareh belom haluli.” Mbuhen Marta percaya tutu? Awi iye katawan tahiu kamisik je puji manjadi. Iye mungkin mahining jite melai huma tuntang hong eka sombayang bara kakurik’ah. Ayo itah mbahas telu kamisik je inyurat hong Surat Barasih.

6. Narai mukjizat je pasti ingatawan Marta?

6 Kamisik je pangkasulak manjadi metuh Nabi Elia inenga Hatalla kuasa uka manampa mukjizat. Hong hila utara Israel, melai lewu Sarpat hong daerah Penisia, tege ije biti balu je belum susah je tau dengan Elia. Yehowa balalu manampa mukjizat aka. Tepung tuntang undus ayu dia lepa-lepah mangat iye tuntang anak’ah tau tatap belum. (1 Raja 17:8-16) Rahian tinai, anak’ah haban palus matei. Tapi, Elia mandohop balu te. Iye mimbing anak te tuntang balakudoa, ”O TUHAN [Yehowa], Hatallangku, keleh mambelom anak toh!” Hatalla mahining Elia, tuntang anak te belum haluli! Jite kamisik je pangkasulak je inyurat hong Alkitab. (Mbasa 1 Raja 17:17-24.) Marta pasti mangatawan kesah te.

7, 8. (a) Kilen ampi Elisa mahibur ije biti indu je pehe atei? (b) Mukjizat Elisa mamparahan hal narai?

 7 Kamisik je kadue je inyurat hong Alkitab ilalus awi Nabi Elisa. Hong lewu Sunem, tege ije biti uluh bawi Israel je jatun anak. Awi iye tau dengan Elisa, Yehowa manenga ije biti anak hatue akan bawi te tuntang bana je jadi bakas. Tapi, limbah pire-pire nyelu, anak te matei. Bawi te pasti paham pehe atei. Iye nyamah haguet 30 kilometer uka manyundau Elisa hong Bukit Karmel. Elisa manyuhu Gehasi je bahut mandohop iye, uka helu mangguang Sunem akan mampisik anak te. Tapi, Gehasi dia tau. Rahian tinai, bawi te dumah akan huma dengan Elisa.​—2 Raja 4:8-31.

Hatalla mamparahan amun Iye ulih mampisik uluh matei

8 Elisa tame akan kamar eka hantun anak te, palus balakudoa. Yehowa manjawab lakudoan Elisa tuntang mampisik anak te hapan mukjizat. Metuh indu manampayah anak’ah belum haluli, iye hanjak tutu! (Mbasa 2 Raja 4:32-37.) Iye mungkin mingat auh lakudoan Hana. Iye harun tege anak metuh Yehowa mamberkat iye dengan ije biti anak hatue, Samuel. Balalu, Hana manara Yehowa awi ”akan lewun kare liau Ie mampamohon olon. Tuntang bara hete Ie kea jari manggatange”. (1 Samuel 2:6) Dengan mampisik anak hong lewu Sunem te, Hatalla mamparahan amun Iye ulih mampisik uluh matei.

9. Ngesah kamisik katelu je inyurat hong Alkitab.

9 Mukjizat beken manjadi limbah Elisa matei. Iye manjadi nabi katahin labih 50 nyelu. Limbah te, iye ”haban paham” tuntang kajaria matei. Tahi limbah te je batahan tisa tulang’ah. Ije katika, pire-pire uluh Israel metuh’ah mangubur uluh matei. Salenga dumah garombolan parampok. Awi handak capa-capat hadari, ewen manjakah hantu te intu kubur Elisa. Alkitab mangesah, ”Kalote hantu te tatigung tulang Elisa, hantu te belom tinai palus mendeng.” (2 Raja 13:14, 20, 21) Bara kare kajadian tuh, Marta yakin amun kuasan Hatalla labih hai bara pampatei. Bara hete itah kea tau yakin amun kuasan Hatalla hai tutu tuntang jatun tikas’ah.

KAMISIK HONG JAMAN RASUL

10. Narai je ilalus Petrus akan ije biti pahari bawi je jadi matei?

10 Kitab Yunani Kristen kea manyurat kajadian tahiu kare rewar Hatalla je mampisik uluh matei. Itah jadi mambahas tahiu Yesus mampisik uluh matei hong tukep lewu Nain tuntang hong human Yairus. Rahian tinai, Rasul Petrus mampisik Dorkas, atawa Tabita. Petrus tame huang kamar eka hantun Tabita. Iye balakudoa tuntang hamauh, ”Tabita, misik!” Tabita  belum haluli, tuntang Petrus ”manyarah Dorkas je belom te” akan kare pahari je beken. Awi kajadian tuh, hong kota te are oloh ”percaya dengan Yesus”. Kare murid taheta tuh pasti manyarita kabar bahalap tahiu Yesus tuntang kuasan Yehowa mampisik uluh matei.​—Gawin Rasul 9:36-42.

11. Narai kuan Lukas tahiu ije biti anak tabela? Narai pengaruh’ah akan uluh beken?

11 Tege kamisik beken je inampayah are uluh. Ije katika, Rasul Paulus hapumpung hong ruang hunjun hong Troas, je wayah tuh tege hong Turki hila barat laut. Paulus bapander sampai bentuk alem. Ije anak tabela je bagare Eutikhus munduk intu baunsengok sambil mahining. Tapi, iye tapatiruh tuntang manjatu bara tingkat telu. Lukas mungkin je pangkasulak mariksa iye. Awi iye dokter, iye katawan amun anak tabela te dia baya bahimang atawa tujah, tapi matei! Limbah te, Paulus kea umba muhun. Iye mamaluk Eutikhus, limbah te manarewen uras uluh dengan hamauh, ”Ie magon belom.” Mukjizat tuh hai pengaruh’ah akan uras uluh je manampayah kejadian te. Ewen manampayah anak tabela te jadi matei, tapi limbah te impisik. Hasil’ah, ewen ”paham iampong”.​—Gawin Rasul 20:7-12.

HARAPAN JE TAU IMERCAYA

12, 13. Limbah mambahas pire-pire kamisik, kare paisek narai je mungkin lembut?

12 Pire-pire kamisik je harun imbahas itah tau manampa itah yakin kilau Marta. Itah tau yakin amun Hatallan itah, je manenga pambelum, ulih mampisik uluh matei. Hong genep kamisik endau, santar tege uluh je inenga Hatalla kuasa, kilau Elia, Yesus, atawa Petrus. Tuntang, kare hal te manjadi metuh mukjizat masih ilalus awi Yehowa. Jadi, kilen ampi dengan kare uluh je matei hong katika jatun  mukjizat kilau te? En kare rewar Hatalla je baketep tau baharap Hatalla akan mampisik uluh matei hong andau rahian? En itah tau yakin kilau Marta je hamauh, ”Katawangku Lasarus kareh belom haluli amon oloh matei impisik hong andau je pangkarahia”? Mbuhen iye tau yakin akan tege kamisik hong andau rahian, tuntang mbuhen itah kea tau yakin?

13 Kare rewar Hatalla jaman huran katawan akan tege kamisik hong andau rahian. Jituh gitan bara kare kesah je inyurat huang Firman Hatalla. Ayo itah mbahas pire-pire kesah tuh.

14. Bara kesah Abraham, narai je tau ilajar itah tahiu kamisik?

14 Coba mikir parentah Yehowa akan Abraham. Isaak iete anak je jadi tahi ientai Abraham. Tapi, Yehowa hamauh, ”Keleh haguet akan tanah Moria dengan Isaak, anakm je tunggal, je paham inyintam. Intu hete, . . . keleh maluput anakm akan indu parapah je ingehu akang-Ku.” (Genesis 22:2) Kuan Pahari, kilen ampi angat Abraham metuh mahining parentah tuh? Yehowa bajanji amun genep bangsa akan imberkat mahalau turunan Abraham. (Genesis 13:14-16; 18:18; Roma 4:17, 18) Yehowa kea hamauh amun berkat te asal’ah ”bara Isaak”. (Genesis 21:12) Tapi, kilen ampi hal te manjadi amun Abraham manenga anak’ah jadi parapah? Paulus mangesah hong Alkitab amun Abraham yakin Hatalla ulih mampisik anak’ah. (Mbasa Ibrani 11:17-19.) Tapi, Alkitab dia mansanan amun Abraham bapikir Isaak akan palus impisik limbah pire-pire jam, jandau, atawa ije minggu. Abraham dia katawan pea anak’ah akan impisik. Tapi iye yakin Yehowa pasti akan mampisik Isaak.

15. Yob tege harapan narai?

15 Yob kea katawan amun akan tege  kamisik hong andau rahian. Iye katawan amun ije batang ineweng, batang kayu te tau tumbu hindai tuntang manjadi kilau batang taheta. Tapi, kalunen dia kilau te. (Yob 14:7-12; 19:25-27) Amun ije biti uluh matei, iye dia ulih mambelum arep’ah kabuat. (2 Samuel 12:23; Masmur 89:49) Tapi, jite beken rima Hatalla dia ulih mampisik uluh matei. Yob yakin Yehowa akan mingat iye. (Mbasa Yob 14:13-15.) Yob dia katawan pea iye akan impisik. Tapi, iye yakin Je Manenga Pambelum tau tuntang pasti mingat iye tuntang mampisik iye.

16. Kilen ampi ije malekat mampaabas Daniel?

16 Coba niruk hatue beken je baketep, Daniel. Iye baketep dengan Yehowa katahin pambelum’ah, tuntang Yehowa santar mandohop iye. Ije katika, ije malekat mansanan aka amun ’Hatalla sinta dengae’. Iye mansanan kea, ”ela bagalabah atawa mikeh” tuntang ”keleh abas”.​—Daniel 9:22, 23; 10:11, 18, 19.

17, 18. Narai janji je inenga Yehowa akan Daniel?

17 Metuh umur Daniel tukep 100 nyelu tuntang tukep matei, iye mungkin bapikir tahiu narai je manjadi limbah iye matei. En Daniel bapikir iye akan belum hindai? Pasti! Hong bagian pangkalepah buku Daniel, Hatalla bajanji denga, ”Ikau Daniel, keleh baketep sampai kahapus. Ikau akan matei, tapi akan misik.” (Daniel 12:13) Daniel katawan amun uluh je jadi matei kanjera batiruh tuntang jatun ”pangatawan tahiu kapintar tuntang kaharati intu lewun oloh matei”, je rahian manjadi eka. (Pangabar 9:10) Tapi, jituh beken rima jatun harapan akan Daniel. Yehowa manenga janji je tamam hong andau rahian.

18 Malekat Yehowa hamauh amun iye kareh ’misik akan manarima upah’ah intu kahapus jaman’. Daniel dia katawan pea hal te manjadi. Tapi, iye katawan amun iye akan impisik hong andau rahian. Jite akan manjadi tahi limbah iye matei, iete hong ”kahapus jaman”.

Kilau Marta, itah tau yakin kamisik akan manjadi (Payah paragrap 19, 20)

19, 20. (a) Narai hubunga kare kajadian je harun imbahas itah dengan iman Marta? (b) Narai je akan imbahas itah hong artikel je harian?

19 Jelas, Marta atun alasan je kuat uka yakin amun paharin ayu je baketep, Lasarus, akan ”belom haluli amon oloh matei impisik hong andau je pangkarahia”. Janjin Yehowa akan Daniel tuntang iman Marta akan kamisik hong andau rahian tau manampa itah yakin kea amun kamisik pasti manjadi.

20 Itah jadi balajar tahiu kamisik je manjadi jaman huran. Jituh mambukti amun uluh matei tau belum haluli. Itah kea jadi balajar amun kare rewar Hatalla je baketep yakin kareh tege kamisik. Tapi, en tege bukti amun kamisik tau manjadi tahi limbah hal te injanji? Bukti te tau manampa itah sasar mentai kamisik hong andau rahian. Tapi, pea jite akan manjadi? Itah akan mambahas kare hal tuh hong artikel je harian.