Langsung ke konten

Langsung ke menu sekunder

Langsung ke daftar isi

Saksi-Saksi Yehuwa

Dayak Ngaju

Mambarita—Edisi Palajaran  |  April 2017

Nampa Yehowa Hanjak dengan Kahias Manyadia Arep Pahari!

Nampa Yehowa Hanjak dengan Kahias Manyadia Arep Pahari!

”Keleh tara akan [Yehowa], awi . . . rayat dengan kahias haguet parang.”​—HAKIM 5:2.

NYANYIN: 15010

1, 2. (a) Tumun kuan Elipas tuntang Bildad, kilen ampi Hatalla manilai pelayanan itah? (b) Sapuna, kilen ampi Hatalla manilai pelayanan itah?

BARIBU NYELU huran, tege telu biti uluh hatue je bapander dengan rewar Hatalla je baketep iete Yob. Ije bara ewen iete Elipas, turunan Teman, iye misek dengan Yob, ”Bara marak kare olon, ije mahin jaton je baguna akan Hatalla. Oloh je aton kapintar tuntang kaharatie, baya baguna akae kabuat. En aton gunae akan Hatalla amon ikau malalus kahandak Aie? En aton kaontong akae amon pambelom ayum tinduh barasih?” (Yob 22:​1-3) Akan Elipas, jawaban akan kare paisek te, dia. Balalu, hatue beken je bagare Bildad, turunan Suah, mansanan amun kalunen dia mungkin bujur hong taharep Hatalla.​—⁠Mbasa Yob 25:⁠4.

Uras hal bahalap atawa kataun itah jite panengan Hatalla, tuntang Iye manantuani cara itah mangguna

2 Elipas tuntang Bildad handak mangat Yob mangkeme amun usaha uka manempu Yehowa dia baguna. Ewen handak mangat Yob bapikir amun akan Hatalla, kalunen dia labih barega bara gagat, bitik, atawa handalai. (Yob 4:​19; 25:⁠6) En ewen mansanan auh kutak tuntang paisek te awi ewen randah atei? (Yob 22:29) Yehowa puna tamam tuntang andal tutu. Amun imbanding Denga, itah jatun nara-narai. Amun itah hong hunjun bukit je gantung atawa manampayah kapenda bara pesawat, itah tau mangkeme amun kalunen kurik tutu tuntang dia barega. Tapi, en jite je ingkeme Yehowa dengan pelayanan tuntang gawin itah akan Karajaan-Ai? Dia! Yehowa mansanan akan Elipas, Bildad, tuntang Sopar amun auh ewen dia bujur. Balalu, Hatalla mansanan amun Iye sanang dengan Yob tuntang manyewut Yob ”rewar-Ku”. (Yob 42:​7, 8) Jadi, itah tau yakin amun kalunen je dia sempurna tau ”baguna akan Hatalla”.

”NARAI ONTONGE AWIM?”

3. Narai je insanan Elihu tahiu usahan itah manempu Yehowa, tuntang narai rima?

3 Metuh Yob tuntang telu biti hatue tuh bapander, tege ije biti uluh tabela je ara Elihu mahining ewen. Metuh ewen terai bapander, Elihu misek dengan Yob tahiu Yehowa, ”Amon ikau tetek, narai ontonge awim? Atawa narai asile bara lengem?” (Yob 35:​7, Surat Barasih 1983) En Elihu kea handak mansanan amun gawin itah akan Hatalla jatun guna? Dia. Yehowa maningak Elipas, Bildad, tuntang Sopar, tapi Iye dia maningak Elihu. Riman auh kutak Elihu dia sama. Je handak inyampai’ah iete aluh itah manempu Yehowa, Iye dia perlu pandohop itah. Yehowa tempun taluh handiai. Jatunti je tau ilalus itah mangat manampa Iye labih tatau atawa labih abas. Sapuna, uras hal bahalap atawa kataun itah jite panengan Hatalla, tuntang Iye manantuani cara itah mangguna.

4. Kilen ampi pangkemen Yehowa amun itah tau dengan uluh beken?

4 Amun itah tau dengan rewar Yehowa je beken, Iye manampayah jite kilau je ilalus Aka. Sewut Salomo 19:17 mansanan, ”Mandohop oloh je belom susah sama kilau manjahaman [Yehowa]; Kareh [Yehowa] kea je akan mambalehe.” Sapuna, Yehowa harajur manantuani metuh itah mamparahan asi akan uluh beken. Tuntang aluh Iye Panjapa taluh handiai, Iye maanggap kataun itah kilau manjahaman Iye tuntang Iye akan mambayar dengan are hal je bahalap. Yesus, anak Hatalla, mansanan hal je sama.—Mbasa Lukas 14:​13, 14.

5. Paisek narai je akan imbahas itah?

5 Metuh jaman huran, Yehowa marawei Nabi Yesaya uka manjadi wakil-Ai tuntang manempu Iye dengan cara je istimewa. (Yesaya 6:​8-​10) Yesaya dengan kahias atei manarima parawei tuh tuntang hamauh, ”Toh aku. Soho ih aku!” Wayah tuh, Yehowa kea marawei uluh je baiman Denga uka bagawi Aka. Are rewar Yehowa je mamparahan semangat je sama kilau Yesaya. Ewen dengan kahias atei manempu Yehowa dengan kakare macam cara tuntang hong kakare eka, aluh manaharep are tantangan tuntang kapehe. Tapi, mungkin tege je bapikir, ’Kesempatan uka manempu Yehowa dengan kahias puna hak istimewa. Tapi, en je ilalusku te puna tege guna? En Hatalla perlu pandohop itah mangat kahandak-Ai manjadi?’ En Pahari puji bapikir kalute? Uka manjawab kare paisek tuh, ayo itah mambahas pire-pire kejadian huang pambelum due rewar Yehowa hong jaman huran, iete Debora tuntang Barak.

HATALLA MAUBAH KIKEH MANJADI KAHANYI

6. Mbuhen mangat ih ampi akan pasukan Yabin mampakalah uluh Israel?

6 Barak ije biti prajurit Israel, tuntang Debora ije biti Nabi bawi. Metuh te, bangsa Israel ’inguasa dengan katulas’ katahin 20 nyelu awi raja Kanaan je bagare Yabin. Pasukan Yabin kasar tuntang kejam tutu. Jituh manampa uluh Israel je melai hong kare lewu mikeh balua bara huma. Ain Yabin tege 900 kareta lengkap dengan arit bara sanaman, tapi uluh Israel jatun alat hapa baparang.​—⁠Hakim 4:​1-3, 13; 5:​6-8. * (Payah catatan penda.)

7, 8. (a) Narai parentah pangkasulak akan Barak? (b) Kilen ampi uluh Israel sampai tau mampakalah pasukan Yabin? (Payah gambar hong tamparan artikel.)

7 Amun imbanding dengan pasukan Yabin, uluh Israel ampi balemu tuntang purah impakalah. Tapi Yehowa marentah Barak mahalau Nabi Debora, ”Mumpong 10.000 oloh hatue bara suku Naptali tuntang Sebulon, tuntang imbit ewen akan bukit Tabor. Kareh aku mawi Sisera, pangkalima pasukan parang Yabin, talih ikau intu Sungei Kison impahayak awi tantarae tuntang kare kareta parange mangat manyarang ikau. Tapi Aku kareh manenga kamanang akam huang parang te.”​—⁠Hakim 4:​4-7.

8 Maka, nampara inggau kare uluh je pahias manyadia arep ewen. Kajaria, 10.000 biti kumpul hong Bukit Tabor. Balalu, Barak tuntang pasuka baparang dengan pasukan musuh hong eka je inyewut Taanakh. (Mbasa Hakim 4:​14-​16.) En Yehowa mandohop uluh Israel? Iyoh. Andau salenga ujan papak panggar, eka baparang je sulak’ah keang balalu kisak. Kaadaan tuh manenga kauntung akan uluh Israel. Barak manyasah pasukan Sisera kakejau 24 kilometer sampai akan eka je inyewut Haroset-Hagoyim. Metuh mandari arep’ah, kareta Sisera tangkeng awi kinyak. Jadi, iye muhun bara kareta kuda tuntang hadari akan Saanaim, dia kejau bara Kedes. Hong kanih, Sisera manyahukan arep intu tenda ain Yael. Sisera heka tutu, balalu tapatiruh. Metuh iye batiruh, Yael dengan bahanyi mampatei iye. (Hakim 4:​17-​21) Yehowa manampa uluh Israel manang bara kare musuh ewen! * (Payah catatan penda.)

CARA BAPIKIR JE HAKALAWAN

9. Narai je tau ilajar itah bara Hakim 5:​20, 21 tahiu parang malawan Sisera?

9 Itah tau katawan labih are tahiu kesah je manjadi hong buku Hakim pasal 4 dengan mambasa Hakim pasal 5Hakim 5:​20, 21 mansanan, ”Kare bintang kea omba parang malawan Sisera, bara eka ewen miar baputar intu langit. Sungei Kison amok soho sampai mampahantong musoh.” En jituh rima uluh Israel indohop awi malekat hong parang jituh? En jituh rima tege ujan batu bara langit? Alkitab dia mansanan. Tapi ampi tame akal uka bapikir amun Yehowa manyalamat ungkup-Ai dengan manampa ujan je labat tutu hong eka tuntang katika je pas. Jituh manampa 900 kareta kuda Sisera bahali miar. Hong Hakim 4:​14,15, itah tau mambasa, telu kali Yehowa inara awi manenga kamanang akan uluh Israel. Tapi, jatun ije bewei bara 10.000 biti uluh je pahias manyadia arep ewen inara awi jite.

10, 11. Narai Meros te? Kilen ampi Meros buah sapa?

10 Tuh itah akan mambahas hal beken je patut inantuani. Limbah kamanang uluh Israel, Debora tuntang Barak manara Yehowa. Ewen manyanyi, ” ’Keleh manyapa Meros, tuntang oloh ayue je melai hete,’ koan malekat [Yehowa]. ’Awi ewen dia dumah mandohop kilau pahlawan je parang akan [Yehowa].’ ”—Hakim 5:​23.

11 Narai Meros te? Itah dia ulih mamasti. Tapi sapa akan Meros tuh tutu manjadi sampa-sampai jatun hindai kesah tahiu Meros. Eweh katawa ewen tuh ije lewu je dia pahias manyadia arep uka baparang hayak dengan Barak. Metuh Barak manggau uluh je pahias tulak, tege 10.000 biti je pahias baparang malawan uluh Kanaan. Metuh te, kare uluh hong Meros pasti mahining tahiu hal tuh. Tau kea, Meros iete lewu je ihalau awi Sisera metuh iye hadari bara Barak. Jadi, kare uluh Meros tau ih manekap Sisera, tapi ewen dia mawi hal te. Mungkin, ewen manampayah tentara je kejam tuh hadari mahalau jalan lewun ewen! Sapuna ewen tau malalus ije hal akan mendukung tujuan Yehowa. Amun ewen malalus’ah, Yehowa mamberkat ewen. Tapi metuh tege kesempatan uka mendukung Yehowa, ewen dia mawi nara-narai. Gawin uluh Meros tuh hakalawan tutu dengan gawin Yael je bahanyi.​—⁠Hakim 5:​24-​27.

Itah musti maniruk en itah pahias manyadia arep huang dinas akan Yehowa

12. Due hal narai je imparahan awi kawan uluh je tege hong Hakim 5:​9, 10? Kilen ampi hal tuh mampengaruh itah?

12 Hong Hakim 5:​9, 10 (Terjemahan Dunia Baru), itah balajar amun cara bapikir 10.000 biti je pahias mandohop dia sama dengan kare uluh je dia pahias manyadia arep. Debora tuntang Barak manara ”kare pangkalima Israel, je pahias bara kare bangsa te”. Jituh hakalawan tutu dengan je ”manungkang kalidai bahandang henda-henda”, je dia pahias manyadia arep awi bajuhu. Ewen iete kare uluh ”je munduk intu hunjun permadani je bahalap tutu” tuntang ”je mananjung hong jalan”, je mangkeme pambelum je mangat. Kabalika, kare uluh je pahias manyadia arep, ewen te pahias baparang hong Bukit Tabor je habatu tuntang daerah Luau Kison. Kare uluh je belum mangat irentah uka: ”Niruk!” Ewen musti maniruk tahiu kesempatan je ihalau ewen awi dia pahias manyadia arep akan gawin Yehowa. Wayah tuh, itah kea musti maniruk en itah pahias manyadia arep huang dinas akan Yehowa.

13. Narai beda tanggapan suku Ruben, Dan, tuntang Aser dengan suku Sebulon tuntang Naptali?

13 Ka-10.000 biti uluh je pahias te tau manampayah kabuat taluh gawin Yehowa, je manjadi Panguasa Taluh Handiai. Ewen tau mangesah jite akan uluh beken metuh ewen bapander tahiu ”kamanang [Yehowa]”. (Hakim 5:​11) Kabalika, suku Ruben, Dan, tuntang Aser labih maniruk kare panatau, kare tabiri, kare kapal, tuntang kare pelabuhan ewen, bara gawin Yehowa. (Hakim 5:​15-​18) Tapi dia uras suku kilau te. Suku Sebulon tuntang Naptali ”parang manyangit intu eka parang” uka mendukung Debora tuntang Barak. (Hakim 5:​17, 18) Tege palajaran penting akan itah bara cara bapikir je dia sama tuh mangat itah tau maniruk’ah.

”KELEH TARA AKAN [YEHOWA]”

14. Kilen ampi itah tau mamparahan amun itah manenga dukungan akan pamarentahan Yehowa?

14 Wayah tuh, uka manenga dukungan akan pamarentahan Yehowa, itah dia musti baparang. Itah tau mamparahan dukungan dengan basemangat tuntang bahanyi mangabar barita bahalap. Wayah tuh uluh je pahias manyadia arep sasar imerlu huang organisasi Yehowa. Bajuta pahari tuntang anak tabela dengan kahias manyadia arep ewen uka malalus kare macam dinas sepenuh waktu. Suntu, are je merintis, bagawi hong Betel, tuntang mamangun Balai Karajaan. Tege kea je mandohop hong kebaktian. Pire-pire bakas ungkup bagawi akan Panitia Penghubung Rumah Sakit tuntang maatur kebaktian. Itah tau yakin amun Yehowa marega kahias itah uka manempu Iye dengan cara narai bewei tuntang Iye dia akan mangalapean taluh gawin itah.​—⁠Ibrani 6:​10.

Helu bara manampa keputusan, niruk pengaruh’ah akan keluarga Pahari tuntang ungkup (Payah paragrap 15)

15. Narai je tau ilalus itah mangat itah dia nihau semangat bagawi akan Yehowa?

15 Itah kea musti bapikir en itah puna pahias manyadia arep itah. Itah tau mangumang, ’En aku manalua uluh beken labih are bagawi bara aku? En aku labih manomor ije kare panatau bara manempu Yehowa? Atawa en aku manyuntu iman tuntang kahanyin Barak, Debora, Yael, tuntang 10.000 biti uluh je pahias manyadia arep ewen dengan mangguna narai bewei je tege intu aku uka manempu Yehowa? En aku mamikir handak pindah akan kota atawa negara je beken mangat labih are dinun duit tuntang belum mangat? En aku jadi mamikir pengaruh’ah dengan keluarga tuntang ungkup ekaku tuntang mandoa hal tuh?’ * (Payah catatan penda.)

16. Aluh Yehowa tempun taluh handiai, narai je tau inenga itah Aka?

16 Yehowa manenga itah kesempatan je bahalap tutu uka mendukung pamarentahan-Ai. Bara jaman Adam tuntang Hawa, Setan handak mangat kalunen mendukung iye, beken Yehowa. Jadi dengan manenga dukungan akan pamarentahan Yehowa, itah mamparahan dengan jelas akan Setan eweh je indukung itah. Awi iman tuntang kaketep itah, itah pahias manyadia arep itah akan Yehowa tuntang hal tuh manampa Yehowa hanjak tutu. (Sewut Salomo 23:​15, 16) Hatalla tau mangguna dukungan tuntang kaketep itah uka manumbah Setan. (Sewut Salomo 27:11) Jadi, narai je tau inenga itah akan Yehowa iete kaketep itah. Jituh barega tutu Aka tuntang manampa Iye hanjak tutu.

17. Narai je tau ilajar itah bara Hakim 5:​31 tahiu andau harian?

17 Dia tahi hindai bumi akan kuntep dengan kare uluh je manenga dukungan akan pamarentahan Yehowa. Itah pasti dia sabar manunggu andau te! Angat atei itah sama kilau Debora tuntang Barak je banyanyi, ”Keleh kare musohm, o [Yehowa], matei sama kilau Sisera, tapi uras kare sobat Ayum manang kilau matanandau intu langit.” (Hakim 5:​31) Jituh akan manjadi metuh Yehowa mampalumus dunia Setan je jahat. Metuh parang Armagedon nampara, Yehowa dia perlu hindai kalunen je pahias manyadia arep akan mampakalah musuh. Itah baya ’mentai bewei’ tuntang ”mite [Yehowa] manenga kamanang”. (2 Kronika 20:17) Pandehan hal tuh manjadi, itah tege kesempatan je bahalap tutu uka manenga dukungan akan pamarentahan Yehowa dengan bahanyi tuntang basemangat.

18. Amun Pahari pahias manempu Yehowa, narai manpaat akan uluh beken?

18 Huang tamparan nyanyin kamanang ewen, Debora tuntang Barak manara Yehowa, beken kalunen. Ewen manyanyi, ”Keleh tara akan [Yehowa], awi . . . rayat dengan kahias haguet parang.” (Hakim 5:​1, 2) Kalute kea, amun itah manempu Yehowa dengan cara narai bewei je imerlu, uluh beken akan umba basemangat manara Yehowa.

^ par. 6 Arit iete sanaman je banyihi, panjang, tuntang kalok ampin tampa. Jituh imasang hong kareta parang, mungkin imasang panjang balua bara as roda kareta akan mamparusak.

^ par. 8 Pahari tau manampayah hapus kesah tuh hong artikel ”’Aku Bangkit Sebagai Ibu di Israel’” hong Menara Pengawal 1 Agustus 2015.

^ par. 15 Payah artikel ”Khawatir Soal Uang” hong Menara Pengawal 1 Juli 2015.