Langsung ke konten

Langsung ke menu sekunder

Langsung ke daftar isi

Saksi-Saksi Yehuwa

Dayak Ngaju

Mambarita—Edisi Palajaran  |  April 2017

”Hakim akan Salepah Kalunen” Santar Mawi je Adil

”Hakim akan Salepah Kalunen” Santar Mawi je Adil

”[Yehowa] pandohop je gagah gawie tinduh, tuntang kare jalae uras adil.”​—DEUTERONOMIUM 32:4.

NYANYIN: 11289

1. Kilen ampi Abraham mamparahan amun iye yakin dengan kaadil Yehowa? (Payah gambar hong tamparan artikel.)

”DIA bakae hakim akan salepah kalunen salenga tau malalus taloh je dia bujur!” (Genesis 18:25) Narai je insanan awi Abraham mamparahan keyakina amun Yehowa akan mahakim lewu Sodom tuntang Gomora dengan adil. Iye percaya amun Yehowa dia mungkin manampa ”oloh je dia bara kasalan te impatei haya-hayak dengan oloh je sala”. Kuan Abraham, hal te ”dia baka”, atawa dia mungkin. Harian andau limbah te, Yehowa mansanan tahiu Arep’ah kabuat, ”[Yehowa] pandohop je gagah gawie tinduh, tuntang kare jalae uras adil. Hatallan keton baketep, dia aton katulas intu ie, ie malalus taloh je bahalap tuntang bujur.”​—⁠Deuteronomium 31:19; 32:⁠4.

2. Mbuhen Yehowa akan santar mawi je adil?

2 Narai je manampa Abraham yakin tutu amun Yehowa akan santar mawi je adil? Awi Yehowa suntu pangkahalap bara kaadil tuntang kabujur. Sapuna, ”adil” tuntang ”bujur” rancak ihapan haya-hayak huang Kare Kitab Ibrani awi riman due kata tuh tege hubunga. Jadi, awi aturan Yehowa santar bujur, Iye kea akan santar mahakim dengan adil. Alkitab mansanan, ”Ie sinta atei je bujur tuntang adil”.​—⁠Masmur 33:⁠5.

3. Nenga suntu kadiaadil je tege hong dunia tuh.

3 Itah pasti hanjak tutu awi mangatawan Yehowa akan santar mawi je adil. Tapi, itah belum hong dunia je kuntep dengan kadiaadil. Suntu, tege uluh je imutus basala palus inamean huang penjara, tapi sapuna iye dia basala. Limbah labih are bukti iriksa, akhir’ah tabukti amun uluh tuh dia basala. Tapi, iye jadi buah penjara katahin banyelu-nyelu. Kadiaadil kilau tuh manampa ije biti uluh basingi tutu tuntang dia badaya. Tapi, tege ije jenis kadiaadil beken je labih bahali inaharep. Narai jite?

KADIAADIL HONG UNGKUP

4. Narai je tau mauji iman ije biti uluh Kristen?

4 Awi itah uluh Kristen, itah katawan amun itah akan manaharep kadiaadil hong dunia tuh. Tapi, amun itah manampayah atawa mangkeme kabuat kejadian je ampi dia adil hong ungkup, jituh tau mauji iman itah. Amun jite je manjadi, kilen ampi tanggapan Pahari? En Pahari manalua hal te mampanihau semangat Pahari?

5. Mbuhen kadiaadil tau manjadi hong ungkup?

5 Itah uras dia sempurna tuntang tau manampa kasala. Jadi, ije biti uluh tau manampa gawi je dia adil dengan itah atawa itah kabuat tau dia adil dengan uluh beken hong ungkup. (1 Yohanes 1:​8) Aluh jituh dia rancak manjadi, uluh Kristen je batue secara rohani katawan amun kadiaadil tau manjadi hong ungkup. Jadi, iye dia akan manjadi balemu secara rohani. Yehowa jadi manenga itah nasehat bara Alkitab je tau mandohop itah tatap baketep amun itah mangkeme kadiaadil awi paharin itah—Masmur 55:​13-​15.

6, 7. Kadiaadil narai je ingkeme awi ije biti pahari hong ungkup, tuntang sipat narai je mandohop iye?

6 Coba nantuani pengalaman Willi Diehl. Hong nyelu 1931, Pahari Diehl nampara melayani hong Betel Swiss hong kota Bern. Hong nyelu 1946, iye umba Sakula Gilead kelas ke-8 hong New York, AS. Limbah lulus, iye inugas uka malalus gawin daerah hong Swiss. Hong kesah pambelum’ah, pahari Diehl mangesah amun hong bulan Mei 1949, iye mansanan akan kantor cabang Swiss amun iye barencana handak kawin. Balalu, kawan pahari je batanggung jawab hong kanih mansanan amun uras hak istimewa ayu akan induan. Iye baya inenga ijin merintis. Pahari Diehl mansanan, ”Aku dia inyuhu hindai manyampai hotbah . . . Are pahari dia handak tabe hindai dengan ikei, ewen mawi ikei kilau uluh je impalua”.

7 Narai tanggapan Pahari Diehl? Iye mansanan, ”Ikei katawan amun kawin beken hal je dia indasar bara Alkitab, maka huang lakudoa ikei balaku ingalindung tuntang mamparahan iman akan Yehowa”. Pire-pire pahari metuh te dia katawan pandangan Yehowa tahiu pangawin. Tapi akhir’ah, pangatawan ewen inyasuai, tuntang pahari Diehl mandinun hindai hak istimewa. Uras tuh hadiah bara Yehowa awi kaketep’ah. * (Payah catatan penda.) Jadi, coba niruk, ’Amun aku mangkeme kadiaadil kalute, en aku tatap sabar tuntang manunggu Yehowa mangambuah kaadaa? Atawa en aku maandal arep tuntang maurus kabuat kadiaadil tuh?’​—⁠Sewut Salomo 11:2; mbasa Mikha 7:⁠7.

Itah perlu mingat amun itah dia sempurna tuntang tau sala paham

8. Mbuhen itah dia tau capat manduan kesimpulan amun itah atawa uluh beken mandinun kadiaadil?

8 Amun Pahari mangkeme tege kadiaadil hong ungkup, mingat, Pahari mungkin sala. Mbuhen? Awi itah dia sempurna tuntang tau sala paham. Mungkin itah dia mangatawan uras fakta. Tapi, aluh itah mengerti masalah’ah, itah musti tatap balakudoa dengan Yehowa tahiu masalah jituh, maandal Iye, tuntang tatap beketep. Dengan kalute, itah dia akan ”manyalan [Yehowa]”​—⁠Mbasa Sewut Salomo 19:⁠3.

9. Suntu narai bewei je akan imbahas itah hong artikel jituh tuntang limbah tuh?

9 Tuh, itah akan manduan palajaran bara telu suntu hong Alkitab tahiu kadiaadil je ingkeme awi kare rewar Yehowa. Hong artikel jituh, itah akan mambahas tahiu buyut Abraham, iete Yosep, tuntang narai je iawi kare pahari denga. Hong artikel limbah jituh, itah akan mambahas cara Yehowa huang baurusan dengan Raja Ahab tuntang kea pangalaman Rasul Petrus hong Antiokhia Siria. Metuh mambahas telu suntu tuh, coba niruk kilen ampi mangat perhatian Pahari baya akan Yehowa tuntang hubungan Pahari Denga, je utama metuh Pahari mangkeme mandinun kadiaadil.

YOSEP KORBAN KADIAADIL

10, 11. (a) Kadiaadil narai je ingkeme Yosep? (b) Kesempatan narai je indinun Yosep hong penjara?

10 Yosep iete rewar Yehowa je baketep, je manaharep are kadiaadil bara uluh beken. Tapi, je paling mangapehe iete kadiaadil je ingkeme kabuat bara kawan pahari. Metuh Yosep umur 17 nyelu, kawan pahari manawan tuntang manjual iye akan manjadi jipen. Limbah te iye iimbit akan Misir. (Genesis 37:​23-​28; 42:21) Limbah te, hong lewun uluh, Yosep inuduh handak memperkosa ije biti uluh bawi. Iye palus imenjara aluh jatun iriksa pengadilan. (Genesis 39:​17-​20) Katahin 13 nyelu iye manjadi jipen tuntang imenjara. Narai je tau ilajar itah bara Yosep amun manaharep kadiaadil awi kawan paharin itah?

11 Metuh hong penjara, Yosep hasundau dengan tukang manyadia taluh ihup raja je inamean huang penjara kea. Ije alem, tukang manyadia taluh ihup tuh manupi, tuntang nupi te injelas awi Yosep dengan pandohop Yehowa. Yosep mangesah amun tukang manyadia taluh ihup raja akan impalua bara penjara tuntang akan haluli melayani Rajan Misir. Limbah te, Yosep mangguna kesempatan te uka manjelas kaadaa dengan uluh te. Are hal je tau ilajar itah bara narai je insanan tuntang narai je dia insanan Yosep.—Genesis 40:​5-​13.

12, 13. (a) Narai bukti amun Yosep dia pasrah dengan kaadaa? (b) Narai je dia insanan Yosep akan tukang manyadia taluh ihup raja?

12 Mbasa Genesis 40:​14, 15. Hong ayat jituh, Yosep mansanan amun iye ”inamput”. Auh je ihapan hong ayat tuh tau kea inerjemah manjadi ”inakau”. Jelas, iye korban kadiaadil. Yosep kea mansanan amun narai je inuduh uluh denga dia bujur tuntang amun iye dia basala. Awi alasan tuh iye balaku dengan tukang manyadia taluh ihup raja uka mangesah tahiu iye akan Rajan Misir. Narai tujua? Mangat iye ’lapas bara penjara tuh’.

13 En Yosep pasrah dengan kaadaan je inaharep’ah? Dia! Yosep katawan amun iye korban bara are kadiaadil. Awi te, iye mangesah kaadaa akan tukang manyadia taluh ihup raja mangat uluh te tau mandohop iye. Tapi, jatun catatan Alkitab je mamparahan amun Yosep mangesah masalah’ah akan eweh bewei, aluh akan Rajan Misir, amun je manamput iye kawan pahari kabuat. Bukti, metuh kawan pahari dumah akan Misir tuntang badamai denga, Rajan Misir manambang ewen tuntang marawei ewen uka melai hong Misir tuntang mangkeme kare hal ”pangakahalape intu Misir”.​—⁠Genesis 45:​16-​20.

Gosip tau mampahai masalah (Payah paragrap 14)

14. Amun itah mangkeme kadiaadil hong ungkup, narai je mandohop itah mangat dia manahiu?

14 Amun itah mangkeme itah jadi manaharep kadiaadil hong ungkup, itah musti bua-buah mangat dia manahiu akan uluh beken tahiu masalah itah. Memang, itah musti balaku pandohop bara bakas ungkup tuntang mangesah akan ewen amun ije biti uluh mawi dosa serius. (Lewitikus 5:⁠1) Tapi, kadiaadil je manjadi hong ungkup biasa jatun hubunga dengan dosa je serius. Tuntang mungkin, itah tau badamai dengan paharin itah dengan dia harus mangesah masalah’ah akan uluh beken, aluh dengan bakas ungkup. (Mbasa Mateus 5:​23, 24; 18:15.) Jadi, hong kaadaan kilau tuh, itah musti baketep tuntang malalus prinsip Alkitab. Kanatek’ah, itah katawan amun je sapuna itah je sala paham, tuntang sapuna itah beken korban kadiaadil. Amun jituh je manjadi, itah pasti hanjak awi dia manambah papa masalah’ah dengan mansanan kare hal papa tahiu paharin itah akan uluh beken. Tapi, dia soal eweh je bujur atawa sala, mansanan hal je papa tahiu uluh beken dia akan manampa kaadaa manjadi labih bahalap. Amun itah baketep dengan Yehowa tuntang dengan kare paharin itah, itah dia akan manahiu. Je manulis masmur mansanan amun uluh ”je belom dia bara kasalan . . . je dia mamapa oloh beken, dia mawi kapapa dengan kolae, tuntang dia manawah aran oloh sansila humae”.​—⁠Masmur 15:​2, 3; Yakobus 3:⁠5.

ELA MANGALAPEAN HUBUNGAN PAHARI JE PALING BAREGA

15. Akan Yosep, narai manpaat basobat dengan Yehowa?

15 Tege palajaran penting beken bara kesah Yosep. Katahin 13 nyelu manyarenan kapehe, Yosep mamparahan amun iye ulih manilai masalah’ah dengan cara Yehowa. (Genesis 45:​5-8) Iye dia puji manyalan Yehowa akan kaadaan je manjadi. Memang, Yosep katawan amun iye mangkeme kadiaadil, tapi iye dia nihau kaharap. Je penting, kasalan tuntang sipat dia sempurna uluh beken dia mangejau Yosep bara Yehowa. Awi iye baketep, Yosep tau manampayah cara Yehowa manyalurui kaadil tuntang mamberkat iye tuntang kea keluarga.

Kasalan tuntang sipat dia sempurna uluh beken dia mangejau Yosep bara Yehowa

16. Mbuhen itah musti harajur manukep dengan Yehowa metuh mangkeme kadiaadil hong ungkup?

16 Kilau Yosep, itah kea musti marega tuntang mangalindung hubungan itah dengan Yehowa. Ela sampai sipat dia sempurna paharin itah manampa itah kejau bara Hatalla je inyinta tuntang inempu itah. (Roma 8:​38, 39) Kabalika, amun itah mangkeme kadiaadil hong ungkup, nyuntu Yosep tuntang harajur manukep dengan Yehowa. Keleh bausaha manilai kaadaa sama kilau Yehowa manilai’ah. Limbah bausaha malalus narai bewei uka mamberes masalah’ah manumun prinsip Alkitab, itah perlu manyarah’ah akan lengen Yehowa. Itah tau yakin Yehowa akan mamberes masalah’ah huang waktu tuntang cara je Inilai’ah bahalap.

PERCAYA DENGAN ”HAKIM SALEPAH KALUNEN”

17. Kilen ampi itah tau mamparahan amun itah percaya dengan ”Hakim salepah kalunen”?

17 Katahin itah belum hong dunia je jahat tuh, itah pasti akan mangkeme kadiaadil. Tege katika, itah atawa uluh beken je ingasene itah mungkin mangkeme atawa manampayah ije hal je ampi dia adil hong ungkup. Amun jituh je manjadi, ela manjatu. (Masmur 119:165) Kabalika, keleh baketep dengan Hatalla, badoa laku Pandohop’ah, tuntang maandal Iye. Mingat, awi dia sempurna, Pahari tau sala paham. Tuntang Pahari mungkin dia katawan uras fakta. Jadi, nyuntu Yosep tuntang ela bagosip je tau mampahai masalah. Tuntang je terakhir, bara maandal arep kabuat, keleh batekad uka baketep dengan Yehowa tuntang manunggu Iye mamberes masalah’ah. Dengan kalute, Yehowa akan sanang dengan Pahari, kilau Iye sanang dengan Yosep. Pahari tau yakin amun ”Hakim akan salepah kalunen” santar malalus hal je bujur awi, ”kare jalae uras adil”.​—⁠Genesis 18:25; Deuteronomium 32:⁠4.

18. Narai je akan ilajar itah bara artikel limbah tuh?

18 Hong artikel limbah tuh, itah akan mambahas due suntu kadiaadil beken je manjadi hong ungkup Yehowa metuh jaman Alkitab. Bara suntu tuh, itah akan balajar kilen ampi karandah atei tuntang maampun mandohop itah manyuntu pikiran Yehowa tahiu kaadil.

^ par. 7 Payah kesah pambelum Willi Diehl je bajudul, ”Yehuwa Allahku yang Kupercayai” hong Menara Pengawal 1 November 1991.