Langsung ke konten

Langsung ke menu sekunder

Langsung ke daftar isi

Saksi-Saksi Yehuwa

Dayak Ngaju

Mambarita—Edisi Palajaran  |  April 2017

En Cara Pahari Manilai Kaadil Sama Kilau Cara Yehowa?

En Cara Pahari Manilai Kaadil Sama Kilau Cara Yehowa?

”Aku kareh manara aran [Yehowa] . . . , Hatallan keton baketep, dia aton katulas intu Ie.”​—DEUTERONOMIUM 32:3, 4.

NYANYIN: 1102

1, 2. (a) Kadiaadil narai je ingkeme Nabot tuntang kawan anak’ah? (b) Due sipat narai je akan imbahas huang artikel jituh?

DUE biti hatue je jahat mandawa ije biti uluh hatue mawi dosa je hai. Narai je indawa ewen dia bujur. Tapi, uluh hatue tuh indawa basala tuntang ihukum matei. Hatue je dia basala tuh dengan kare anak’ah imedak hapan batu sampai matei. Coba niruk, kilen ampi pangkeme kare uluh je sinta kaadil manampayah hal tuh! Jituh beken baya kesah. Hal tuh puna manjadi dengan Nabot, rewar Hatalla je baketep je belum hong wayah pamarentahan Raja Ahab hong Israel.—1 Raja 21:​11-​13; 2 Raja 9:​26.

2 Hong artikel jituh, itah akan mambahas narai je manjadi dengan Nabot. Itah kea akan mambahas kasalan hai je inggawi awi bakas ungkup je beketep hong ije bara kare ungkup Kristen abad je pangkasulak. Bara due suntu jituh, itah akan balajar mbuhen penting randah atei tuntang rajin maampun amun itah handak manyuntu cara Yehowa manilai kaadil.

KADIAADIL JE MANGAMPEHE ATEI

3, 4. Uluh kilen ampi Nabot, tuntang mbuhen iye dia maku manjual kabun anggur’ah akan Raja Ahab?

3 Nabot tatap baketep dengan Yehowa aluh are uluh Israel metuh te umba suntu papa Raja Ahab tuntang sawa, Ratu Isebel je jahat. Ewen manyembah dewa Baal tuntang dia mahormat Yehowa atawa hukum-Ai. Tapi, akan Nabot hubunga dengan Yehowa te barega, labih barega bara pambelum’ah kabuat.

4 Mbasa 1 Raja 21:​1-3. Metuh Ahab handak mamili kabun anggur Nabot, atawa manangkiri dengan kabun anggur beken je labih bahalap, Nabot dia handak. Mbuhen? Iye dengan hormat manjelas, ”Kabon anggor te warisan tato hiangku. Tagal Hatalla, aku dia tau manenga akan Tuan Raja!” Nabot dia maku manarima tawaran Raja Ahab awi hukum Yehowa mangahana uluh Israel manjual petak warisan keluarga. (Lewitikus 25:23; Numeri 36:⁠7) Jituh bukti amun Nabot baketep dengan Yehowa.

5. Narai je inggawi Isebel mangat mandinun kabun anggur Nabot?

5 Awi Nabot dia handak manjual kabun anggur’ah, Raja Ahab tuntang sawa malalus hal je papa. Awi handak mandinun kabun anggur jituh, Ratu Isebel manyuhu due biti uluh hatue mandawa Nabot malalus kapapa je dia inggawi. Kajaria, Nabot tuntang kare anak’ah impatei. Narai je inggawi Yehowa akan kadiaadil je mangapehe atei tuh?

KAADIL HATALLA

6, 7. Narai je ilalus Yehowa uka mamparahan amun Iye sinta kaadil? (b) Mbuhen je ilalus Yehowa tuh mahibur keluarga tuntang kakawalan Nabot?

6 Yehowa palus manyuhu Elia uka maningak Ahab. Elia mansanan akan Ahab amun iye pamunu tuntang panakau. Hukuman narai je ingenga Yehowa akan ewen? Ahab, sawa, tuntang anak jaria akan impatei, kilau je manjadi dengan Nabot tuntang kawan anak’ah.​—⁠1 Raja 21:​17-25.

7 Keluarga tuntang kakawalan Nabot pehe atei dengan gawin Ahab je kejam. Tapi, Yehowa manampayah kadiaadil tuh. Tanggapan Ayu dia manunggu-nunggu. Pasti jituh mahibur ewen. Tapi, karandah atei tuntang iman ewen akan Yehowa mungkin iuji awi narai je manjadi limbah te.

Elia mansanan akan Ahab awi iye marandah arep’ah, Yehowa dia mahukum iye

8. Narai tanggapan Ahab metuh iye mahining hukuman bara Yehowa, tuntang narai hasil’ah?

8 Metuh mahining hukuman Yehowa aka, ”Ahab marabit pakaiae tuntang mangkepan tapih karong kilau tanda kanyasal palus puasa. Hong katika batiroh kea ie mangkepan tapih karong. Tuntang amun mananjong, baue harajur masem”. Ahab marandah arep’ah! Narai hasil’ah? Yehowa mansanan akan Elia, awi Ahab jadi marandah arep’ah, ”Aku dia akan mawi calaka katahin ie magon belom. Hong wayah anake marentah harue Aku mawi calaka te akan keluargae”. (1 Raja 21:​27-​29; 2 Raja 10:​10, 11, 17) Hatalla mamparahan asi dengan Ahab awi Iye mangatawan huang atei kalunen, awi ”atei oloh iuji awi [Yehowa]”.​—⁠Sewut Salomo 17:⁠3.

PENTING’AH KARANDAH ATEI

9. Mbuhen keluarga tuntang kakawalan Nabot perlu mamparahan karandah atei?

9 Metuh keluarga tuntang kakawalan Nabot mahining hukuman akan keluarga Ahab dia ilalus katahin iye belum, iman ewen iuji. Tapi, karandah atei tau mangalindung iman ewen. Mbuhen? Amun ewen randah atei, ewen akan tetep manyembah Yehowa awi ewen percaya amun Yehowa pasti malalus kaadil. (Mbasa Deuteronomium 32:​3, 4.) Hong andau harian, Nabot tuntang keluarga akan mandinun kaadil je sempurna metuh Yehowa mampisik uras uluh je baketep bara pampatei. (Yob 14:​14, 15; Yohanes 5:​28, 29) Uluh je randah atei katawan amun ”Hatalla kareh mahakim kare gawin itah; Je bahalap tuntang je papa, je basilim mahin kea”. (Pangabar 12:14) Yehowa mangatawan uras fakta je dia ingatawan itah. Jadi, amun itah randah atei, itah tau tatap baiman dengan Yehowa.

Amun itah randah atei, itah tau tatap baiman dengan Yehowa

10, 11. (a) Kaadaan narai je tau mauji cara itah manampayah kaadil? (b) Kilen ampi karandah atei tau mandohop itah?

10 Narai tanggapan Pahari amun kare bakas ungkup manampa keputusan je dia Pahari harati atawa je dia inyetuju Pahari? Suntu, narai je akan ilalus Pahari amun Pahari atawa uluh je inyinta Pahari nihau hak istimewa? Kilen ampi amun kabalin Pahari, anak, atawa sobat Pahari impalua, tuntang Pahari dia setuju dengan keputusan kare bakas ungkup? Kilen ampi tanggapan Pahari amun kare bakas ungkup manenga asi akan uluh je badosa, tapi Pahari mangkeme keputusan ewen sala? Kare kaadaan kilau tuh tau mauji iman itah dengan Yehowa tuntang cara Iye maatur ungkup wayah tuh. Amun Pahari mangkeme ije bara kare masalah kilau tuh, kilen ampi karandah atei tau mandohop? Ayo itah mambahas due cara karandah atei tau mandohop itah.

Narai tanggapan Pahari amun kare bakas ungkup manampa keputusan je dia inyetuju Pahari? (Payah paragrap 10, 11)

11 Je pangkasulak, amun itah randah atei, itah akan mangaku amun itah dia mangatawan uras narai je manjadi. Aluh itah mungkin bapikir amun itah mangatawan uras je manjadi, keleh mingat baya Yehowa je mangatawan atei uluh. (1 Samuel 16:⁠7) Dengan kalute, itah tau dengan randah atei mangaku amun itah tege kakurang tuntang amun cara bapikir itah perlu inyasuai. Je kadue, metuh itah manampayah atawa mangkeme kabuat kadiaadil, karandah atei tau mandohop itah tatap manumun, sabar, tuntang manunggu Yehowa mangambuah kaadaa. Alkitab mansanan, ”Eweh manumon auh Hatalla, musti pambelome uras mangat.” Alkitab mansanan kea, ”Kabalikae oloh je papa mandino are kasusah . . .  ie kareh matei katika umure magon tabela.” (Pangabar 8:​12, 13) Amun itah tatap randah atei, itah tuntang uluh beken akan mandinun manpaat.—Mbasa 1 Petrus 5:​5.

SIPAT PURA-PURA HUANG UNGKUP ABAD PANGKASULAK

12. Kajadian narai je akan imbahas itah, tuntang narai tujua?

12 Uluh Kristen abad pangkasulak hong Antiokhia Siria manaharep ije kajadian je mauji karandah atei tuntang kahias ewen maampun. Itah akan mambahas kajadian jituh uka mariksa sikap itah huang hal maampun tuntang mangatawan mbuhen Yehowa tau mahapan uluh je dia sempurna dengan dia mampamuhun standar-Ai.

13, 14. Tugas narai je imercaya akan Rasul Petrus, tuntang kilen ampi iye mamparahan kahanyi?

13 Rasul Petrus iete bakas ungkup je ingasene awi are uluh Kristen hong abad pangkasulak. Iye sobat Yesus tuntang imercaya dengan tugas je penting. (Mateus 16:19) Suntu, metuh nyelu 36 M, Petrus inugas uka mambarita barita bahalap akan Kornelius tuntang uras je tege hong huma. Mbuhen hal tuh istimewa? Awi Kornelius beken uluh Yahudi tuntang iye dia inyunat. Metuh Kornelius tuntang ewen je tege hong huma manarima roh barasih, Petrus katawan amun ewen tau impandui manjadi uluh Kristen. Petrus hamauh, ”Coba ite, kare oloh toh jari mandino Roh Hatalla sama kilau itah. Jadi en tau oloh mahambang ewen mangat impandui hapan danum?”​—⁠Gawin Rasul 10:⁠47.

14 Metuh nyelu 49 M, kare rasul tuntang bakas ungkup hong Yerusalem hapumpung uka mamutus en uluh Kristen dia Yahudi perlu inyunat. Hong pumpung jituh, Petrus dengan bahanyi mampingat kare pahari hong hete amun iye manampayah kabuat uluh dia Yahudi je dia inyunat mandinun roh barasih. Pangalaman Petrus tuh hai pengaruh akan keputusan je inampa awi badan pimpinan. (Gawin Rasul 15:​6-​11, 13, 14, 28, 29) Uluh Yahudi tuntang uluh dia Yahudi pasti hanjak tutu awi Petrus bahanyi mangesah pangalama. Pasti uluh Kristen abad pangkasulak percaya tutu dengan hatue je baketep tuntang batue secara rohani tuh!—Ibrani 13:⁠7.

15. Kasala narai je inampa Petrus metuh hong Antiokhia Siria? (Payah gambar hong tamparan artikel.)

15 Dia tahi limbah malalus pumpung hong Yerusalem, Petrus mangguang Antiokhia Siria. Metuh hong kanih, iye manyampet bakawal dengan uluh Kristen dia Yahudi. Coba niruk dia lue-luen kahanjak ewen awi tau balajar bara pangatawan tuntang pangalaman Petrus! Tapi pasti ewen tarewen tuntang pehe atei metuh Petrus salenga dia handak hindai kuman hayak dengan ewen. Uluh Kristen Yahudi je beken, kilau Barnabas, tapangaruh kea uka malalus hal je sama. Mbuhen bakas ungkup Kristen je batue tuh tau sampai manampa kasala je hai kilau tuh, je tau mamisah-darai ungkup? Tapi je penting, narai je tau ilajar itah bara kasalan Petrus je tau mandohop itah metuh tersinggung dengan auh kutak atawa gawin ije biti bakas ungkup?

Kilen ampi tanggapan uluh Kristen dia Yahudi je pehe atei awi taluh gawin Petrus dengan kadiaadil tuh?

16. Kilen ampi Petrus iningak, tuntang paisek narai je lembut?

16 Mbasa Galatia 2:​11-14. Petrus mikeh dengan kalunen. (Sewut Salomo 29:25) Petrus sapuna mangatawan kilen ampi pangkemen Yehowa dengan uluh dia Yahudi. Tapi, iye mikeh inilai randah awi uluh Kristen Yahudi je basunat awi bakawal dengan uluh dia Yahudi. Rasul Paulus maningak Petrus awi sipat pura-pura. Mbuhen? Awi Paulus manampayah kabuat kilen ampi Petrus mambela uluh dia Yahudi metuh pumpung hong Yerusalem nyelu 49 M. (Gawin Rasul 15:12; Galatia 2:​13.) Kilen ampi tanggapan uluh Kristen dia Yahudi je pehe atei awi taluh gawin Petrus? En ewen tersinggung? En Petrus akan nihau hak istimewa awi kasala tuh?

 PAHIAS MAAMPUN

17. Narai manpaat je indinun Petrus awi iampun Yehowa?

17 Petrus randah atei tuntang manarima tingak Paulus. Alkitab dia mansanan amun Petrus nihau hak istimewa. Malah, rahian andau limbah te iye hong penda kuasan Hatalla ihapan uka manyurat due surat je manjadi bagian bara Alkitab. Hong surat kadue, Petrus manyewut Paulus ”paharin itah je inyinta”. (2 Petrus 3:​15) Kasalan Petrus pasti jadi mangapehe atei uluh Kristen dia Yahudi. Tapi, Yesus, kapala ungkup, tatap mahapan iye. (Epesus 1:​22) Jadi, kare pahari huang ungkup te kea manyuntu Yesus tuntang Bapa dengan maampun Petrus. Awi te, keleh itah dia tersinggung dengan kasalan uluh je dia sempurna.

18. Hong kaadaan narai itah labih manantuani cara itah manilai kaadil kilau cara Yehowa?

18 Kilau ungkup Kristen abad pangkasulak, jatunti bakas ungkup je sempurna wayah tuh. Alkitab mansanan, ”Itah samandiai uras mawi kasalan”. (Yakobus 3:⁠2) Itah uras tau manarima auh tuh. Tapi, amun itah kabuat ingapehe atawa mangkeme kadiaadil, kilen ampi tanggapan itah? En itah akan manyuntu cara Yehowa manilai kaadil? Suntu, narai tanggapan Pahari amun ije biti bakas ungkup tege komentar ayu je ampi dia adil? En Pahari akan tersinggung atawa pehe atei amun ije biti bakas ungkup mansanan taluh je dia imikir helu? Bara langsung manduan kesimpulan amun pahari jite dia pantas manjadi bakas ungkup, en Pahari dengan sabar manunggu Yesus, kapala ungkup, je manduan tindakan? Bara manantuani kasalan uluh tuh, en tau Pahari mingat pelayana je baketep katahin banyelu-nyelu? Amun uluh je manampa dosa dengan Pahari tatap manjadi bakas ungkup atawa mahin mandinun labih are tanggung jawab, en Pahari umba hanjak? Amun Pahari pahias maampun, jite rima Pahari manyuntu cara Yehowa manilai kaadil.​—⁠Mbasa Mateus 6:​14, 15.

19. Narai tekad itah?

19 Itah pasti sanang manampayah kaadil. Itah pasti dia sabar manunggu Yehowa manganan uras kadiaadil je lembut awi Setan tuntang dunia je jahat. (Yesaya 65:17) Helu bara jituh manjadi, keleh itah manyuntu cara Yehowa manilai kaadil, iete dengan randah atei mangaku amun itah mungkin dia katawan uras fakta tuntang dengan kahias maampun uluh je basala dengan itah.