Langsung ke konten

Langsung ke menu sekunder

Langsung ke daftar isi

Saksi-Saksi Yehuwa

Dayak Ngaju

Mambarita—Edisi Palajaran  |  Agustus 2017

Paisek Bara je Mambasa

Paisek Bara je Mambasa

Mbuhen catatan Mateus tahiu tamparan pambelum Yesus dia sama dengan catatan Lukas?

Catatan Mateus tahiu kesah Yesus inakan tuntang tamparan pambelum’ah dia sama bara catatan Lukas awi ewen mangesah kajadian te dengan cara je hakabeken.

Catatan Mateus labih are mangesah kajadian je tege hubunga dengan Yosep. Mateus mangesah narai je inggawi Yosep metuh mangatawan amun Maria batihi, nupin Yosep tahiu malekat je mandohop Yosep harati tahiu narai je sapuna manjadi, tuntang kilen ampi Yosep manumun petunjuk malekat te. (Mateus 1:​19-​25) Limbah te Mateus mangesah amun Yosep nupi tahiu malekat je marentah iye uka mimbit keluarga buhau akan Misir, tuntang iye manumun parentah te. Mateus kea mangesah amun Yosep manupi hindai tahiu malekat je manyuhu iye haluli akan Israel, tuntang iye haluli dengan keluarga tuntang manduan keputusan uka manetep hong Nasaret. (Mateus 2:​13, 14, 19-​23) Hong due pasal pangkasulak hong Injil Mateus, aran Yosep lembut hanya kali, tapi aran Maria baya epat kali.

Tapi, catatan Lukas labih are mangesah tahiu Maria. Lukas mangesah amun malekat Gabriel maja Maria, Maria maja kula Elisabet, tuntang auh tara Maria akan Yehowa. (Lukas 1:​26-​56) Injil tuh kea mancatat auh Simeon akan Maria tahiu kapehe je akan inaharep Yesus. Limbah te Lukas mangesah tahiu kejadian metuh Yesus, je baumur 12 nyelu, dumah dengan keluarga akan bait. Huang kejadian te, Lukas mahin mancatat auh Maria, beken auh Yosep. Lukas mangesah amun kare kejadian te bapengaruh tutu akan Maria. (Lukas 2:​19, 34, 35, 48, 51) Hong due pasal pangkasulak huang injil Lukas, aran Maria lembut 12 kali, tapi aran Yosep baya 3 kali. Jadi Mateus labih are mangesah tahiu narai je imikir tuntang inggawi Yosep. Tapi, Lukas labih are mangesah tahiu narai je imikir tuntang inaharep Maria.

Due injil tuh kea mancatat tahiu utus rinting Yesus bara hila je hakabeken. Mateus mancatat utus rinting Yosep tuntang mamparahan amun Yesus, anak angkat Yosep, sasuai hukum tege hak mawaris padadusan Dawid. Mbuhen? Awi Yosep turunan Raja Dawid mahalau anak’ah, Salomo. (Mateus 1:​6, 16, Surat Barasih 1983) Tapi, Lukas mancatat utus rinting Maria tuntang mamparahan amun Yesus puna turunan Raja Dawid sasuai daha tuntang tege hak ”secara olon” uka mawaris padadusan Dawid. (Roma 1:⁠3) Mbuhen? Awi Maria turunan Raja Dawid mahalau anak’ah, Natan. (Lukas 3:​31) Tapi, mbuhen Lukas dia mancatat Maria te anak Heli aluh sapuna Heli te puna bapa Maria? Awi catatan hurui rinting je resmi bahut baya manamean aran uluh hatue hong keluarga te. Jadi, metuh Lukas mancatat Yosep te anak Heli, jite rima Yosep te manantun hatue Heli.​—⁠Lukas 3:⁠23.

Catatan utus rinting Yesus hong Injil Mateus tuntang Lukas manjadi bukti amun Yesus puna Mesias je injanji Hatalla. Bukti amun Yesus turunan Raja Dawid ingatawan awi uluh are sampai uluh Farisi tuntang Saduki mahin dia ulih malawan bukti te. Catatan Mateus tuntang Lukas tahiu utus rinting Yesus mampaabas iman itah. Jituh manampa itah yakin amun uras janjin Hatalla pasti akan manjadi.