Langsung ke konten

Langsung ke menu sekunder

Langsung ke daftar isi

Saksi-Saksi Yehuwa

Dayak Ngaju

Mambarita—Edisi Palajaran  |  Agustus 2017

En Pahari Pahias Mentai dengan Sabar?

En Pahari Pahias Mentai dengan Sabar?

”Keleh keton sabar kea.”​—⁠YAKOBUS 5:⁠8.

NYANYIN: 78139

1, 2. (a) Mbuhen itah mungkin misek, ”Kilen katahie?” (b) Mbuhen suntu kare rewar Yehowa hong jaman huran tau mahibur itah?

NABI Yesaya je baketep puji misek, ”Kilen katahie?” Nabi Habakuk kea puji misek hal je sama. (Yesaya 6:​11; Habakuk 1:⁠2) Metuh Raja Dawid manulis Masmur 13, epat kali iye misek hal je sama kea. (Masmur 13:​1, 2) Tuntang metuh Yesus ingaliling awi uluh je dia baiman, iye misek, ”Sampai hamparea?” (Mateus 17:17) Itah kea mungkin puji misek hal je sama.

2 Mbuhen itah misek, ”Kilen katahie?” Mungkin itah manaharep kaadaan je dia adil. Tau kea awi itah haban atawa sasar bakas. Mungkin, itah mangkeme stres awi belum hong andau ”pangkarahiae [je] are kasusah”. (2 Timoteus 3:⁠1) Atawa itah mungkin heka tuntang kurik atei awi hadat papa uluh hong kaliling itah. Narai bewei alasa, itah tahibur awi mangatawan Yehowa dia manyala kare rewar-Ai jaman huran je misek hal te.

3. Narai je tau mandohop itah metuh manaharep kaadaan je bahali?

3 Narai je tau mandohop itah batahan metuh mangkeme kapehe? Yakobus, pahari tiri Yesus, ingagalan uka manulis, ”Tagal te, keleh sabar pahari handiai, sampai [Tuan] dumah.” (Yakobus 5:⁠7) Jadi, itah uras perlu basabar. Tapi, narai kasabar te? Tuntang, kilen ampi itah tau mamparahan sipat bahalap tuh?

NARAI KASABAR TE?

4, 5. (a) Narai kasabar te, tuntang kilen ampi malalus’ah? (b) Narai kuan Yakobus tahiu kasabar? (Payah gambar hong tamparan artikel.)

4 Alkitab mansanan amun kasabar hasil bara roh barasih Hatalla. Amun jatun pandohop Hatalla, kalunen je dia sempurna bahali uka tau sabar hong kaadaan je pehe. Kasabar panengan bara Hatalla. Tuntang metuh itah mamparahan jite, itah mambukti amun itah sinta Yehowa tuntang uluh beken. Metuh itah dia sabar, sinta hong marak itah tuntang uluh beken tau balemu. (1 Korintus 13:4; Galatia 5:​22) Narai hindai cara mamparahan kasabar? Itah kea mamparaha dengan sabar manyarenan kapehe tuntang tatap tege pandangan je bahalap. (Kolose 1:​11; Yakobus 1:​3, 4) Itah akan tatap baketep dengan Yehowa aluh narai bewei masalah je inaharep itah. Itah kea dia akan mambaleh metuh ingapehe. Alkitab mansanan amun itah perlu mentai dengan kahias atei. Jituh palajaran penting je incatat hong Yakobus 5:​7, 8. (Mbasa.)

5 Mbuhen itah musti pahias mentai Yehowa malalus Janji? Yakobus manyama kaadaan itah dengan ije biti uluh pamalan. Aluh uluh pamalan te cangkal bagawi uka mimbul, iye dia tau maatur cuaca atawa mampacapat taluh imbul’ah belum. Iye perlu mentai dengan sabar ”hasil je barega akae”. Kalute kea, katahin itah mentai Yehowa malalus Janji, are hal je dia tau ingandali itah. (Markus 13:​32, 33; Gawin Rasul 1:⁠7) Kilau uluh pamalan te itah perlu mentai dengan sabar.

6. Narai je tau ilajar itah bara suntu Nabi Mikha?

6 Sama kilau itah, Nabi Mikha manaharep kaadaan je bahali. Iye belum metuh Raja Ahas marentah. Ahas iete raja je jahat tutu. Awi te, are kapapa hong hapus karajaa. Kaadaa papa tutu sampai-sampai Alkitab mansanan amun uluh ”apik nguan gawin kapapa”. (Mbasa Mikha 7:​1-3.) Mikha katawan amun iye dia tau mangambuah kaadaan te. Jadi narai je ilalus’ah? Iye hamauh, ”Tapi aku handak manantuneng mentai [Yehowa], aku handak mendeh Hatallan salamatku; Hatallangku kareh mahining auchku.” (Mikha 7:⁠7, Surat Barasih 1983) Kilau Mikha, itah kea perlu mamparahan sikap ”mentai [Yehowa]”.

7. Mbuhen dia sukup amun itah baya mentai Yehowa malalus janjin-Ai?

7 Amun itah baiman kilau Mikha, itah akan mentai Yehowa dengan kahias. Itah dia kilau penjahat hong penjara je manunggu ihukum matei. Iye dia mentai dengan kahias, tuntang iye dia maharap andau te dumah. Kaadaan itah dia sama! Itah pahias mentai Yehowa awi itah katawan amun Yehowa akan malalus janjin-Ai tahiu pambelum katatahi hong katika je pas. Jadi, itah akan ”manyarenan kakare kapehe dengan sabar tuntang dengan sanang atei”. (Kolose 1:​11, 12) Katahin mentai, itah dia akan protes mbuhen Yehowa dia capat malalus janji-Ai. Amun itah protes Yehowa dia rajin.​—⁠Kolose 3:​12.

SUNTU KASABAR

8. Suntu narai je inenga hatue tuntang bawi je baketep jaman huran?

8 Narai je tau manampa itah sasar pahias mentai? Itah tau mamikir tahiu hatue tuntang bawi je baketep jaman huran. Ewen sabar mentai Yehowa malalus janjin-Ai. (Roma 15:⁠4) Metuh mangumang suntu ewen, coba mikir kilen katahi ewen musti mentai, alasan ewen pahias mentai, tuntang berkat je inenga Yehowa awi kasabar ewen.

Abraham musti mentai bapuluh nyelu sampai esu, Esau tuntang Yakub, lahir (Payah paragrap 9, 10)

9, 10. Kilen katahi Abraham tuntang Sara mentai Yehowa?

9 Coba nantuani suntu Abraham tuntang Sara. Awi ewen ’percaya dengan Hatalla tuntang mentai dengan sabar’, ewen ”manarima taloh je injanji”. Alkitab mansanan amun limbah ”Abraham mentai dengan sabar”, Yehowa bajanji akan mamberkat iye tuntang manampa iye manjadi bapa bangsa je hai. (Ibrani 6:​12, 15) Mbuhen Abraham perlu basabar? Awi iye musti mentai tahi sahindai janji te manjadi. Hong tanggal 14 Nisan 1943 SM, Abraham tuntang Sara tuntang uras uluh hong human ewen dimpah Sungei Euprat tuntang tame akan Petak je Injanji. Tapi, Abraham masih musti mentai katahin 25 nyelu sahindai iye dinun anak, iete Ishak. Iye kea musti mentai 60 nyelu hindai sampai esu, Esau tuntang Yakub, lahir.​—⁠Ibrani 11:⁠9.

10 Kilen kalumbah petak janji je inarima Abraham? Alkitab mansanan amun ”isut mahin jaton bara daerah toh je jari inenga Hatalla akan Abraham uka ie tau mawarise; kalombah lokap mahin jaton jari inenga akae. Tapi Hatalla hajanji ie kareh manenga jete akan Abraham uka Abraham tuntang turonan ayue tau mawaris jete. Metoh te Abraham jaton dinon anak”. (Gawin Rasul 7:⁠5) 430 nyelu limbah Abraham dimpah Sungei Euprat, haru utus Abraham manjadi bangsa je mawaris petak je injanji te.​—⁠Eksodus 12:​40-​42; Galatia 3:​17.

11. Mbuhen Abraham pahias mentai, tuntang berkat narai je akan inarima awi iye sabar?

11 Abraham pahias mentai awi iye yakin amun Yehowa akan malalus kare janjin-Ai. Iye baiman dengan Yehowa. (Mbasa Ibrani 11:​8-​12.) Abraham tatap mentai dengan kahanjak, aluh dia uras janjin Hatalla sampet inarima. Coba mikir kilen angat kahanjak Abraham metuh iye imbelum haluli hong pirdaus huang bumi. Iye pasti tarewen metuh mambasa tahiu kesah pambelum’ah tuntang keluarga hong are bagian huang Alkitab. * (Payah catatan penda.) Iye pasti hanjak metuh mangatawan amun iye tege tugas penting mangat tujuan Yehowa tahiu Mesias je injanji tau ilalus. Itah tau yakin amun kare berkat te manampa iye dia mangkeme rugi awi tahi mentai.

12, 13. Mbuhen Yosep perlu basabar, tuntang sikap bahalap narai je imparaha?

12 Yosep, buyut Abraham, pahias basabar kea. Iye pire-pire kali iawi dia adil. Sulak’ah, kawan kaka manjual iye manjadi jipen metuh iye umur 17 nyelu. Limbah te, iye indawa hapan dawa je dia bujur mancoba memperkosa sawan tuan ayu, tuntang awi te imenjara. (Genesis 39:​11-​20; Masmur 105:​17, 18) Aluh Yosep rewar Hatalla je baketep, iye gitan kilau ihukum, beken manarima berkat. Tapi 13 nyelu limbah te, uras’ah hubah. Yosep impalua bara penjara tuntang manjadi uluh nomor due paling bakuasa hong Misir.⁠—Genesis 41:​14, 37-​43; Gawin Rasul 7:​9, 10.

Yosep yakin amun Yehowa je mangendali kaadaan tuntang kare berkat bara Yehowa manampa iye ia rugi mentai

13 En taluh dia adil je ingkeme Yosep manampa iye basingi? En iye mangkeme Yehowa jadi malihi iye? Dia. Yosep mentai dengan sabar. Narai je mandohop iye? Iman ayu dengan Yehowa. Iye yakin amun Yehowa je mangendali kaadaan. Jituh gitan bara narai kua dengan kawan pahari, ”Ela mikeh; awi aku mamenda Hatalla. Keton jari pakat mawi kapapa dengangku, tapi Hatalla mobah kapapa te jadi kahalap. Mangat hapan kare taloh je manjadi bihin te are oloh je belom metoh toh tau inyalamat.” (Genesis 50:​19, 20) Yosep mangatawan amun kare berkat bara Yehowa manampa iye dia rugi mentai.

14, 15. (a) Mbuhen kasabar Dawid tamam tutu? (b) Mbuhen Dawid ulih mentai dengan sabar?

14 Raja Dawid kea mangkeme are taluh je dia adil. Yehowa mintih Dawid manjadi raja Israel metuh iye masih tabela. Tapi, akan manjadi raja hong suku ayu kabuat, Dawid musti mentai katahin 15 nyelu. (2 Samuel 2:​3, 4) Katahin mentai, Dawid sampet musti mandari tuntang manyahukan arep bara Raja Saul je handak mampatei iye. * (Payah catatan penda.) Awi te, Dawid jatun eka melai manetep metuh te. Iye musti melai hong lewun uluh atawa hong huang kare gua intu padang pasir. Akhir’ah, Saul matei huang parang. Tapi, Dawid masih musti mentai uju nyelu hindai sampai kajaria iye manjadi raja akan hapus bangsa Israel.​—⁠2 Samuel 5:​4, 5.

15 Mbuhen Dawid pahias mentai dengan sabar? Alasa incatat huang Masmur je sama dengan Masmur eka iye misek epat kali, ”Sampai hamparea?” Iye mansanan, ”Awi aku maandal sintan Aim, maka aku kareh hanjak, awi Ikau manyalamat aku. Aku handak manyanyi akan [Yehowa], awi Ie jari malalus kahalap akangku!”. (Masmur 13:​5, 6) Dawid mangatawan amun Yehowa sinta denga tuntang dia akan malihi iye. Iye mamikir wayah katika Yehowa mandohop iye huran. Iye mentai Yehowa mampatende kapehe je ingkeme. Dawid mangatawan amun kare berkat Yehowa manampa iye dia rugi mentai.

Yehowa kea malalus narai je Ilaku bara itah

16, 17. Suntu tamam narai je inenga Yehowa tuntang Yesus huang hal pahias mentai?

16 Yehowa kea malalus narai je Ilaku bara itah. Iye manenga suntu paling bahalap huang hal pahias mentai. (Mbasa 2 Petrus 3:⁠9.) Suntu, baribu nyelu huran hong Kabun Eden, Setan mandawa amun Yehowa te Hatalla je dia adil. Yehowa ”enta-entai” sampai Ara imparasih bara uras dawa. Hasil’ah, uras je ”harap Ie” akan mandinun are berkat.​—⁠Yesaya 30:​18.

17 Yesus kea pahias mentai. Metuh iye hong bumi, iye baketep sampai matei. Hong nyelu 33 M, iye manenga nilai parapah tewusa akan Yehowa hong surga. Tapi, iye musti mentai sampai 1914 uka nampara marentah jadi Raja. (Gawin Rasul 2:​33-​35; Ibrani 10:​12, 13) Tapi aluh kalute, Yesus musti mentai hindai sampai pamarentahan Saribu Nyelu lepah, haru uras musuh ayu impalumus. (1 Korintus 15:25) Iye musti mentai tahi tutu. Tapi, berkat awi mentai manampa iye dia rugi mentai.

NARAI JE TAU MANDOHOP ITAH?

18, 19. Narai je tau mandohop itah uka mentai dengan sabar?

18 Bara kare bukti je jadi imbahas itah, itah mangatawan amun Yehowa handak itah sabar tuntang pahias mentai. Narai je tau mandohop itah? Itah perlu balakudoa balaku roh barasih Hatalla. Keleh mingat amun kasabar te ije bara kare sipat hasil roh barasih Hatalla. (Epesus 3:​16; 6:​18; 1 Tesalonika 5:​17-​19) Jadi, itah perlu balaku pandohop Yehowa mangat tau batahan tuntang mentai dengan sabar.

19 Beken bara te, keleh mingat suntun Abraham, Yosep, tuntang Dawid. Ewen tau tarus mentai dengan sabar janjin Yehowa manjadi awi iman tuntang percaya dengan Yehowa. Ewen dia baya mamikir kanahuang ewen kabuat. Amun itah mamikir kare berkat je indinun ewen, itah kea ianjur uka pahias mentai.

20. Narai je perlu manjadi tekad itah?

20 Jadi, aluh itah manaharep kapehe, itah batekad uka mamparahan ’kaharap’ atawa ”mentai [Yehowa]”. Kanatek’ah, itah mungkin bapikir, ”Kilen katahie, . . . [Yehowa]?” (Yesaya 6:11) Tapi dengan pandohop roh barasih, itah tau manyuntu nabi Yeremia tuntang hamauh, ”Panatau aingku baya tikas [Yehowa] bewei. Awi te aku harap dengae.”​—⁠Tatum 3:​21, 24.

^ par. 11 Hong buku Genesis, 15 pasal mangesah tahiu pambelum Abraham. Ewen je manulis kare kitab Yunani Kristen mangesah tahiu Abraham labih bara 70 kali.

^ par. 14 Yehowa manolak Saul limbah iye marentah katahin due nyelu labih. Tapi, Saul masih marentah katahin 38 nyelu sampai iye matei.​—⁠1 Samuel 13:​1, Surat Barasih 1983; Gawin Rasul 13:⁠21.