Langsung ke konten

Langsung ke menu sekunder

Langsung ke daftar isi

Saksi-Saksi Yehuwa

Dayak Ngaju

Mambarita—Edisi Palajaran  |  Agustus 2017

Cara Malekak tuntang Manganan Sipat je Usang

Cara Malekak tuntang Manganan Sipat je Usang

”Pambelom je usang dengan kare sipate jari ilekak keton.”KOLOSE 3:⁠9.

NYANYIN: 83129

1, 2. Kilen ampi uluh manilai Saksi-Saksi Yehowa?

ARE uluh manantuani amun Saksi-Saksi Yehowa te beken bara je beken. Akan suntu, ije biti penulis je ara Anton Gill manara Saksi metuh jaman Nazi hong Jerman. Iye manulis, ”Nazi bajilek tutu dengan Saksi-Saksi Yehowa. . . . Hong nyelu 1939, tege 6.000 Saksi je inamean huang [kamp konsentrasi].” Iye mangesah aluh Saksi ingapehe, ewen ingasene dengan sipat tau imercaya, tenang hong kaadaan je bahali, baketep dengan Hatalla, tuntang pakat.

2 Haru-harun tuh, uluh hong Afrika Selatan kea manantuani amun Saksi-Saksi Yehowa te beken bara je beken. Hong negeri te, Saksi Yehowa je hakabeken warna upak’ah, sampet ingahana kumpul haya-hayak. Tapi hong andau Minggu, 18 Desember 2011, labih bara 78.000 Saksi bara kare suku hong Afrika Selatan tuntang kare negeri je tege hong tukep hete dumah uka hakumpul hong acara khusus hong stadion paling hai intu Johannesburg. Ije bara manajer stadion hamauh, ”Ketuh uluh je paling teratur je puji inyundauku hong stadion tuh. Uras’ah bapakaian dengan bahalap. Ketun kea manampa stadion tuh buju-bujur barasih. Tapi je paling penting, aluh hakabeken, ketun tatap pakat.”

3. Mbuhen kapakat itah dengan kawan pahari hong hapus dunia beken bara je beken?

3 Jadi, uluh je beken Saksi mahin tau batantu manampayah amun kapakat itah dengan kawan pahari hong hapus dunia beken bara je beken. (1 Petrus 5:⁠9) Mbuhen itah dia sama dengan organisasi je beken? Awi dengan pandohop Alkitab tuntang roh barasih, itah karas bausaha uka maubah narai bewei hong arep itah je dia irajin awi Yehowa. ”Pambelom je usang dengan kare sipate jari ilekak” itah, tuntang itah mahapan ”pambelom je taheta”.​—⁠Kolose 3:​9, 10.

Uluh je puji mawi gawi je papa tutu mahin tau hubah

4. Narai je akan imbahas itah hong artikel jituh, tuntang mbuhen?

4 Limbah malekak sipat je usang, itah perlu mangana. Hong artikel tuh, itah perlu balajar mbuhen penting malekak sipat je usang tuntang cara malalus’ah. Itah akan mambahas uluh je puji mawi gawi je papa tutu mahin tau hubah. Limbah te, itah akan manggau narai bewei je tau ilalus uluh je jadi tahi huang katutu uka malekak sipat je usang. Mbuhen itah perlu mambahas hal tuh? Je mangapehe atei, pire-pire uluh je puji manempu Yehowa dia tarus barendeng. Ewen nampara bapikir tuntang manggawi je sama kilau metuh ewen hindai mangasene Yehowa. Itah uras perlu manantuani pingat tuh, ”Oloh je manyangka arepe mendeng segah, keleh rende-rendeng; ela sampai balongkang.”​—⁠1 Korintus 10:⁠12.

NGANAN URAS KANAHUANG SEKSUAL JE SALA

5. (a) Nenga suntu mbuhen penting uka bajeleng malekak sipat je usang. (Payah gambar hong tamparan artikel.) (b) Hal narai bewei je manjadi bagian bara sipat je usang je inyewut huang Kolose 3:​5-9?

5 Narai je ilalus Pahari metuh mangatawan amun baju Pahari papa tuntang bahewau? Pahari pasti bajeleng malekak’ah. Kalute kea, amun itah mangatawan amun itah mawi gawi je injilek Yehowa, itah perlu bajeleng hubah. Paulus manasehat itah tahiu gawi je sala, ”Keleh keton manganan kare taloh je papa bara arep keton.” Keleh itah mambahas due bara kare hal tuh, karayap tuntang kare gawi je dia sanunuh.​—⁠Mbasa Kolose 3:​5-9.

6 Karayap. Hong Alkitab, ije bara kare gawi ”karayap” iete hubungan seks dengan eweh bewei je beken bara kabali. Paulus mansanan amun uluh Kristen musti ”mampatei . . . kare kipen” je tege hubunga dengan karayap. Rima, itah perlu buju-bujur bausaha manganan kanahuang je sala. Jituh mungkin dia purah, tapi itah tau bahasil!

7 Coba nantuani kesah paharin bawi itah, Sakura bara Japang. * (Payah catatan penda.) Bara kurik, Sakura rancak mangkeme dia inarima tuntang pehe atei. Mangat mangkeme inarima, iye mawi hubungan seks dengan are uluh bara umur 15 nyelu. Awi te, iye aborsi telu kali. Iye hamauh, ”Sulak’ah, aku mangkeme inarima tuntang inyayang metuh mawi hubungan seks. Tapi, sasar rancak aku manggawi, aku sasar mangkeme dia barega.” Sakura tarus manggawi hal tuh sampai iye umur 23. Limbah te, iye balajar Alkitab dengan Saksi-Saksi Yehowa. Iye sanang dengan narai je ilajar’ah. Dengan pandohop Yehowa, Iye tau malihi cara belum je papa tuntang dia hindai mangkeme basala tuntang dia barega je mamparise iye. Wayah tuh, Sakura melayani manjadi perintis biasa, tuntang dia hindai mangkeme dia inarima. Iye hamauh, ”Aku hanjak tutu awi genep andau aku mangkeme sintan Yehowa.”

TERAI MAWI KARE HAL JE DIA SANUNUH

8. Gawi narai bewei je tau manampa itah dia barasih hong taharep Hatalla?

8 Kare hal je dia sanunuh. Hong Alkitab ”kare hal je dia sanonoh” dia baya karayap, tapi kea kare gawi kilau maroko atawa mangesah bakahureh cabul. (2 Korintus 7:1; Epesus 5:⁠3, 4) Jite kea tau ihapan akan gawi papa je inggawi uluh benye-benyem, kilau mambasa buku je mampalembut kanahuang seksual atawa manampayah pornografi. Kare hal tuh tau mimbit gawi dia sanunuh beken, kilau masturbasi. (Kolose 3:⁠5) *​—⁠Payah catatan penda.

9. Narai je tau manjadi amun ije biti uluh dia mangendali ”kipen je papa”?

9 Uluh je patuh manampayah pornografi manampa ”kipen” ewen dia ingandali tuntang tau kecanduan seks. Kare peneliti manantuani amun kecanduan pornografi sama kilau uluh je kecanduan taluh ihup je mambusau atawa obat. Jadi, tame akal amun patuh manampayah pornografi te puna bahaya. Jituh tau manampa angat atei dia barega, bahali bapikir metuh bagawi, pambelum keluarga bamasalah, cerai, sampai mampatei arep. Ije biti uluh hatue hamauh amun iye haru mangkeme arep’ah barega limbah ije nyelu lapas bara kecanduan pornografi.

10. Narai je mandohop Ribeiro lapas bara kecanduan pornografi?

10 Are uluh mangkeme bahali lapas bara pornografi. Tapi ewen tau bahasil. Nantuani kesah Ribeiro bara Brasil. Metuh tabela, iye malihi huma tuntang bagawi hong pabrik je mendaur ulang karatas. Hong kanih, iye dinun basaan pornografi. Ribeiro hamauh, ”Rangka-rangkah, aku nampara kecanduan. Jite parah tutu sampai aku dia sabar manunggu pacarku je ije kahuma dengangku balua helu bara huma mangat aku tau manonton pornografi.” Ije katika metuh bagawi, Ribeiro mandinun buku Rahasia Kebahagiaan Keluarga hong marak tuyuk buku je akan indaur ulang. Iye manduan buku te tuntang mambasa. Limbah te, iye mamutus uka balajar Alkitab dengan Saksi-Saksi Yehowa. Tapi, Ribeiro dia tau salenga lapas bara kecanduan te. Narai je mandohop iye? Iye mangesah, ”Awi lakudoa, balajar Alkitab, tuntang mangumang narai je ilajarku, aku sasar marega kare sipat Hatalla. Awi te, sintangku dengan Yehowa labih abas bara kanahuangku manampayah pornografi.” Dengan pandohop Alkitab tuntang roh barasih, Ribeiro hubah, impandui, tuntang wayah tuh melayani manjadi bakas ungkup.

Itah musti buju-bujur sinta Yehowa tuntang bajilek dengan je papa

11. Narai je tau mandohop ije biti uluh uka lapas bara pornografi?

11 Uka tau lapas bara pornografi, Ribeiro dia baya balajar Alkitab. Iye kea musti mangumang narai je imbasa hong Alkitab mangat jite tau mangana atei’ah. Iye musti balakudoa balaku pandohop Yehowa. Uras hal te manampa sintan Ribeiro akan Hatalla sasar abas. Sinta te je mampakalah kanahuang’ah uka manampayah pornografi. Uka tau lapas bara pornografi, itah kea musti buju-bujur sinta Yehowa tuntang bajilek dengan je papa.​—⁠Mbasa Masmur 97:⁠10.

KELEH NGANAN KALAIT, SAPA, TUNTANG TANJARU

12. Narai je mandohop Stephen manganan kalait tuntang auh je kasar?

12 Tege uluh je purah tutu balait tuntang mampalua auh je kasar tuntang mahina. Jituh mimbit masalah huang keluarga ewen. Ije biti bapa je ara Stephen bara Australia, bihin rajin manyapa tuntang balait awi hal kurik. Iye hamauh, ”Aku tuntang sawangku puji hapisah telu kali tuntang handak cerai.” Limbah te, ewen balajar Alkitab dengan Saksi. Stephen bausaha malalus narai je ilajar’ah. Iye mangesah amun sahindai mangasene Yehowa, genep tege je manampa iye dia rajin, kalait’ah sama kilau bom je handak manyalentup. Limbah Stephen manumun nasehat Alkitab, kaadaa sasar bahalap. Iye bakesah, ”Pambelum keluarga ikei jadi kejau labih bahalap. Dengan pandohop Yehowa, wayah tuh aku mangkeme salawah tuntang damai.” Stephen wayah tuh melayani manjadi hamba pelayanan, tuntang sawa jadi merintis katahin pire-pire nyelu. Kare bakas ungkup hong ungkup Stephen hamauh, ”Stephen te pahari je pambenyem, rajin bagawi, tuntang randah atei.” Ewen kea hamauh amun ewen dia puji manampayah iye balait. Stephen mangaku amun iye hubah beken awi usaha kabuat. Iye hamauh, ”Aku dia mungkin kilau tuh amun dia mandinun pandohop Yehowa. Awi Yehowa, aku tau mangambuah sipatku lepa-lepah.”

13. Mbuhen kalait te bahaya, tuntang pingat narai je inenga Alkitab?

13 Alkitab manasehat itah mangat mahakan kalait, auh je kasar, tuntang mangarahang. (Epesus 4:​31) Kare hal tuh rancak manampa kakaras. Are uluh mangkeme amun kalait tuntang kakaras jite dia sala. Tapi jituh sapuna malah mamapa aran Panjapa itah. Are paharin itah jadi maubah sipat ewen tuntang mahapan sipat je taheta.​—⁠Mbasa Masmur 37:​8-​11.

14. En kah uluh je kasar tau hubah manjadi bajenta?

14 Hans melayani manjadi bakas ungkup hong Austria. Koordinator bakas ungkup ewen hamauh, ”Hans ije biti pahari je paling bajenta.” Tapi, bihin Hans dia kilau te. Metuh tabela, iye pamihup tuntang uluh je kasar. Ije katika, metuh iye babusau iye balait tutu sampai mampatei pacar’ah. Awi te, Hans imenjara katahin 20 nyelu. Tapi, pambelum hong penjara dia maubah iye. Limbah te, indu balaku ije biti bakas ungkup uka hasupa denga, tuntang Hans nampara balajar Alkitab. Hans mangesah, ”Bahali tutu akangku malekak sipat je helu. Tapi tege ayat Alkitab je mandohop aku. Yesaya 55:7 hamauh, ’Keleh oloh papa mangambuah pambelome.’ Limbah te 1 Korintus 6:11 hamauh, ’Pire-pire bara keton bihin puna kilau te hadat dasare.’ Ayat te mangesah tahiu kare uluh je bahasil malihi cara belum ewen je kuntep dosa. Katahin banyelu-nyelu, Yehowa tatap sabar mandohop aku tuntang manenga roh barasih-Ai mangat aku tau mangkepan sipat taheta.” Hans impandui metuh masih hong penjara. Limbah te, iye impalua limbah imenjara 17 nyelu satengah. Iye hamauh, ”Aku basukur tutu awi sinta asi tuntang ampun bara Yehowa je hai tutu.”

15. Narai bewei hal beken je manjadi bagian bara sipat je usang, tuntang narai kuan Alkitab tahiu hal te?

15 Hal beken je manjadi bagian bara sipat je usang iete mananjaru. Suntu, are uluh mananjaru mangat dia perlu mambayar pajak atawa mangat dia perlu batanggung jawab awi kasalan ewen. Tapi, Yehowa te ”Hatallan katoto.” (Masmur 31:​6, Surat Barasih 1983) Jadi, Hatalla marentah kare rewar-Ai uka ”bujur” tuntang ”ela hatanjaro”. (Epesus 4:​25; Kolose 3:⁠9) Maka, itah musti jujur aluh mungkin jite bahali atawa tau manampa itah mahamen.​—⁠Sewut Salomo 6:​16-​19.

CARA EWEN TAU BAHASIL

16. Narai je tau mandohop itah malekak sipat je usang?

16 Itah dia tau malekak sipat je usang dengan usaha kabuat. Sakura, Ribeiro, Stephen, tuntang Hans musti karas bausaha uka hubah. Je mandohop ewen iete Firman Hatalla tuntang roh barasih. (Lukas 11:13; Ibrani 4:​12) Cara mangat Firman Hatalla tuntang roh barasih tau mandohop iete dengan mambasa Alkitab genep andau, mangumang’ah, tuntang harajur balakudoa balaku kapintar-kaharati tuntang kaabas uka malalus narai je jadi ilajar itah. (Yosua 1:8; Masmur 119:97; 1 Tesalonika 5:​17) Beken bara te, itah perlu hapumpung tuntang manyiap bahan je akan imbahas. (Ibrani 10:​24, 25) Itah perlu mangguna narai bewei je inyadia awi organisasi Yehowa, kilau majalah, JW Broadcasting, JW Library, tuntang jw.org.​—⁠Lukas 12:⁠42.

Kilen ampi cara malekak sipat je usang? (Payah paragrap 16)

17. Narai je akan imbahas itah hong artikel limbah tuh?

17 Itah jadi mambahas pire-pire hadat papa je musti ilekak tuntang inganan uluh Kristen mangat tau manyanang Yehowa. Tapi, tege hal beken je perlu ilalus itah hindai. Itah perlu mahapan sipat taheta tuntang mahaga. Hong artikel limbah tuh, itah akan mambahas cara malalus’ah.

^ par. 7 Pire-pire aran hong artikel tuh jadi iubah.

^ par. 8 Payah buku Pertanyaan Kaum Muda—Jawaban yang Praktis, Jilid 1, pasal 25.