Langsung ke konten

Langsung ke menu sekunder

Langsung ke daftar isi

Saksi-Saksi Yehuwa

Dayak Ngaju

Mambarita—Edisi Palajaran  |  Agustus 2017

Cara Mahapan tuntang Mahaga Pambelum Taheta

Cara Mahapan tuntang Mahaga Pambelum Taheta

”Keton wayah toh jari mandino pambelom je taheta.”KOLOSE 3:​10.

NYANYIN: 43106

1, 2. (a) Narai je manampa itah tau mahapan pambelum taheta? (b) Sipat taheta narai bewei hong Kolose 3:​10-​14 je akan imbahas itah?

HUANG Alkitab, tege due ayat je mambahas tahiu ”pambelom je taheta”. (Epesus 4:​24; Kolose 3:​10) Jite rima sipat je ”injapa manumon sonto ain Hatalla”. En itah tau mahapan pambelum taheta tuh? Iyoh. Awi Yehowa manampa kalunen manumun gambar-Ai, itah tau manyuntu kare sipat-Ai je bahalap.​—⁠Genesis 1:​26, 27; Epesus 5:⁠1.

2 Itah uras puna dia sempurna. Jadi, kanatek’ah itah tau tege kanahuang je sala. Kare hal hong kaliling itah kea tau mampengaruh itah. Tapi awi Yehowa pamasi tuntang tege pandohop bara Iye, itah tau manjadi uluh je Inyinta. Amun itah handak tutu manjadi uluh je kilau te, keleh itah mambahas pire-pire sipat je manjadi bagian bara pambelum taheta. (Mbasa Kolose 3:​10-​14.) Limbah te, itah akan mambahas cara malalus sipat tuh huang pelayanan.

”PAHARI HANDIAI URAS MANJADI IJE”

3. Narai ije sipat je manjadi bagian bara pambelum taheta?

3 Paulus mangesah amun sipat dia minti-mintih jite sipat je manjadi bagian penting bara pambelum taheta. Iye hamauh, ”Nihau kapisah je aton marak oloh Yehudi dengan oloh je dia Yehudi, oloh je basunat, dengan oloh je dia basunat; jaton hindai kabekee akan oloh tamuei dengan akan oloh je dia bahadat, atawa jipen dengan oloh je mardeka.” Hong ungkup, itah dia tau mangkeme labih tamam bara je beken awi suku, negara, atawa kaadaan pambelum itah. Mbuhen? Awi itah murid Kristus, itah ”uras manjadi ije”.​—⁠Kolose 3:​11; Galatia 3:​28.

Sikap itah dengan eweh bewei sama dia peduli suku atawa kaadaan pambelum ewen

4. (a) Kilen ampi sapuna sikap itah dengan uluh beken? (b) Mbuhen jituh kanatek’ah bahali?

4 Metuh itah mahapan pambelum taheta, itah akan mahormat uras uluh, dia peduli suku atawa kilen ampi kaadaan pambelum ewen. (Roma 2:​11) Hong pire-pire negara, malalus hal tuh mungkin bahali. Suntu, huran hong Afrika Selatan, pamarentah mamisah daerah eka ije biti uluh melai sasuai suku. Are uluh hong negara te, Saksi tuntang je beken, masih melai hong kare daerah kilau te. Badan Pimpinan handak mangat kawan pahari hong kanih ”muap atei” ewen. Jadi hong bulan Oktober 2013, ewen setuju uka ije rencana khusus ilalus mangat kawan pahari bara suku je hakabeken tau hakasene dengan labih bahalap.​—⁠2 Korintus 6:​13.

5, 6. (a) Narai je ilalus huang ije negara mangat kare Saksi tau sasar pakat? (Payah gambar hong tamparan artikel.) (b) Narai hasil’ah?

5 Mangat kare Saksi bara due ungkup je mahapan bahasa atawa bara suku je hakabeken tau hakumpul haya-hayak, kare pahari manampa rencana akan ilalus hong andau je iintih huang pire-pire minggu. Kawan pahari bara kadue ungkup te tau mangabar haya-hayak, pumpung haya-hayak, tuntang hakaja. Baratus ungkup malalus rencana tuh, tuntang kantor cabang are manarima laporan bahalap. Jituh mahin rajin inampayah awi uluh je beken Saksi. Suntu, ije biti pendeta hamauh, ”Aku beken Saksi, tapi jujur gawin menginjil ketun teratur tutu. Tuntang aluh hakabeken suku ketun tau pakat.” Limbah malalus rencana tuh, narai pengaruh’ah akan kawan pahari?

6 Sulak’ah Pahari Noma je mahapan bahasa Xhosa mahamen uka marawei kawan pahari bara ungkup bahasa Inggris uka dumah akan huma je sederhana. Tapi limbah iye mangabar dengan Saksi je upak’ah baputi tuntang maja human ewen, iye dia lalau mahamen hindai. Iye hamauh, ”Sama ih ampi ewen dengan ikei!” Jadi, metuh kawan pahari bara ungkup bahasa Inggris dumah akan ungkup bahasa Xhosa uka mangabar haya-hayak, Noma marawei pire-pire bara ewen uka kuman hong huma. Iye mangkeme hanjak metuh manampayah ije biti pahari je maja huma, iete bakas ungkup je upak’ah baputi, tatap hanjak aluh munduk hong keranjang plastik. Awi malalus rencana tuh, are kawan pahari bara suku tuntang bahasa je hakabeken mandinun kawal taheta tuntang sasar mangasene ije dengan je beken.

KELEH HAPAN SIPAT PAMASI TUNTANG BAHALAP ATEI

7. Mbuhen itah perlu santar mamparahan asi?

7 Katahin belum hong dunia Setan, rewar Yehowa akan manaharep masalah, kilau bahali manggau gawi, kahaban, ingapehe, bencana alam, irampok, atawa je beken. Uka tau hakadohop, itah perlu buju-bujur pamasi. Amun itah tege sipat pamasi, itah tagerek uka mamparahan kahalap atei. (Epesus 4:​32) Due sipat tuh bagian bara pambelum taheta je akan mandohop itah manyuntu Hatalla tuntang mahibur je beken.​—⁠2 Korintus 1:​3, 4.

8. Narai hasil’ah amun itah pamasi tuntang bahalap atei dengan uras uluh hong ungkup? Nenga suntu.

8 Kilen ampi itah tau mamparahan kahalap atei dengan kare uluh hong ungkup je pindah bara negara beken atawa je kaadaa kurang bahalap? Itah handak manambang ewen, manjadi kawal ewen, tuntang mandohop ewen mangkeme amun ewen imerlu hong ungkup itah. (1 Korintus 12:​22, 25) Suntu, Dannykarl pindah bara Filipina akan Japang. Awi iye bara negara beken, iye iawi dia adil hong eka bagawi. Hong ije katika, iye dumah akan pumpung. Iye hamauh, ”Handak uras uluh je dumah hong kanih iete uluh Japang. Tapi, ewen manarima aku kilau jadi tahi kasene.” Kahalap atei kare pahari te mandohop Dannykarl sasar rantep dengan Yehowa. Kajaria, iye impandui tuntang wayah tuh melayani menjadi bakas ungkup. Kare kakawalan bakas ungkup hong eka melayani hanjak awi iye tuntang sawa je ara Jennifer ije ungkup dengan ewen. Ewen hamauh, ”Dannykarl tuntang Jennifer belum sederhana, ewen manjadi perintis tuntang manjadi suntu bahalap akan pasangan je manomor ije Karajaan.​—⁠Lukas 12:⁠31.

9, 10. Huang pelayanan, amun itah mamparahan asi narai hasil’ah?

9 Metuh itah mangabar tege kesempatan akan itah uka malalus ”gawi bahalap akan oloh handiai”. (Galatia 6:​10) Are Saksi mamparahan asi dengan uluh asing tuntang bausaha balajar bahasa ewen. (1 Korintus 9:​23) Hasil’ah bahalap tutu. Suntu, ije biti perintis hong Australia je ara Tiffany balajar bahasa Swahili mangat tau mandohop ungkup je mahapan bahasa Swahili hong kota Brisbane. Aluh dia purah uka balajar bahasa te, iye mangkeme pambelum’ah labih sanang. Iye mangesah, ”Amun ketun handak pelayanan je labih menantang, coba melayani hong ungkup je beken bahasa. Angat’ah kilau manampa tanjung jalanan, tapi masih hong kota je sama. Ketun kabuat akan mangkeme kahinje kare pahari hong hapus dunia tuntang manampayah kapakat je tamam tutu.”

Mbuhen uluh Kristen handak mandohop uluh asing? (Payah paragrap 10)

10 Ije keluarga hong Japang malalus hal je sama. Sakiko, anak bawi keluarga te hamauh, ”Metuh badinas, ikei rancak hasundau uluh je dumah bara Brasil. Ikei mamparahan ayat bara Alkitab bahasa Portugis ayun ewen kabuat, kilau Pangarinah 21:​3, 4 atawa Masmur 37:​10, 11, 29. Ewen tutu-tutu manantuani tuntang kanatek’ah sampai manangis.” Keluarga tuh masi dengan uluh je dumah bara negara beken te tuntang handak majar ewen katutu. Jadi, ewen batelu balajar bahasa Portugis. Rahian andau, keluarga tuh umba mampendeng ungkup bahasa Portugis. Katahin banyelu-nyelu, ewen bahasil mandohop are uluh je dumah bara negara beken uka manjadi rewar Yehowa. Sakiko mangesah, ”Ikei karas bausaha uka balajar bahasa Portugis. Tapi, berkat’ah hai tutu bara usaha ikei. Ikei basukur tutu dengan Yehowa.”​—⁠Mbasa Gawin Rasul 10:​34, 35.

HAPAN KARANDAH ATEI

11, 12. (a) Narai je manggerek itah uka mahapan pambelum taheta? (b) Kilen ampi itah tau tatap randah atei?

11 Metuh mahapan pambelum taheta, itah handak jite mimbit tara akan Yehowa tuntang beken mangat mandinun tara bara kalunen. Keleh mingat kea amun malekat je sempurna tau bajuhu tuntang badosa. (Payah kea Esekhiel 28:17.) Jadi, labi-labih hindai itah je dia sempurna. Aluh kalute, itah tau mahapan karandah atei. Kilen ampi cara?

12 Ije bara kare cara iete dengan mambasa Alkitab genep andau tuntang mangumang’ah. (Deuteronomium 17:​18-​20) Je utama, itah perlu manantuani narai je iajar Yesus tuntang suntu karandah atei’ah. (Mateus 20:28) Yesus randah atei tutu nyamah iye handak menyau pain murid ayu. (Yohanes 13:​12-​17) Hal beken je tau ilalus itah iete balaku roh barasih Yehowa mahalau lakudoa. Roh barasih-Ai tau mandohop itah malawan angat atei labih tamam bara uluh beken.​—⁠Galatia 6:​3, 4; Pilippi 2:⁠3.

Amun itah randah atei, ungkup akan sasar damai tuntang hinje

13. Narai berkat amun itah randah atei?

13 Mbasa Sewut Salomo 22:⁠4. Uras rewar Yehowa perlu randah atei, tuntang hal tuh akan mahasil are berkat. Amun itah randah atei, ungkup akan sasar damai tuntang hinje. Yehowa kea akan manenga itah kahalap atei-Ai je tamam tutu. Rasul Petrus hamauh, ”Pahari handiai musti mamparandah arep tuntang mandohop sama arep keton hapan karandah atei. Basa huang Surat Barasih tarasurat kalotoh, ’Hatalla malawan oloh je bajoho, tapi sinta oloh je randah atei.’”​—⁠1 Petrus 5:⁠5.

KELEH MAHAPAN KAJENTA TUNTANG KASABAR

14. Eweh suntu pangkahalap huang mamparahan kajenta tuntang kasabar?

14 Hong dunia tuh, uluh je bajenta tuntang sabar rancak inilai balemu. Tapi jituh dia bujur. Due sipat bahalap tuh lembut bara Yehowa, Hatalla je abas hong alam semesta. Iye suntu pangkahalap huang mamparahan kajenta tuntang kasabar. (2 Petrus 3:⁠9) Suntu, mikir kilen ampi kasabar Yehowa metuh manjawab Abraham tuntang Lot mahalau malekat-Ai. (Genesis 18:​22-​33; 19:​18-​21) Coba mikir kea kilen ampi kasabar Yehowa dengan bangsa Israel je rajin malawan katahin labih bara 1.500 nyelu.​—⁠Esekhiel 33:⁠11.

15. Bara kueh itah katawan amun Yesus te bajenta tuntang sabar?

15 Yesus ”balemo”, atawa bajenta. (Mateus 11:29) Iye sabar tutu manaharep kakurang kare murid’ah. Metuh melayani hong bumi, Yesus rancak indawa tuntang imapa. Tapi, iye tatap bajenta tuntang sabar sampai matei. Metuh Yesus manyarenan kapehe hong tihang siksa, iye balaku mangat Bapa maampun kare uluh je mampatei iye. Iye hamauh, ”Ewen jaton katawan taloh je iawi ewen.” (Lukas 23:34) Jadi, aluh metuh Yesus stres atawa manyarenan kapehe, iye tatap bajenta tuntang sabar.​—⁠Mbasa 1 Petrus 2:​21-​23.

16. Kilen ampi itah tau mamparahan kajenta tuntang kasabar?

16 Paulus mangesah tahiu ije bara kare cara uka mamparahan kajenta tuntang kasabar. Iye manulis, ”Keton musti sabar dengan sama arep keton, tuntang tau mampun amon aton oloh je mingkes kasingi dengan kolae. Dengan sanang atei Tuhan handak mampun keton, jadi keton kea musti handak mampun sama arep keton.” (Kolose 3:​13) Mangat tau maampun uluh beken, itah perlu bajenta tuntang sabar. Hal tuh akan mampaabas tuntang mahaga kapakat huang ungkup.

17. Mbuhen kajenta tuntang kasabar penting?

17 Uras rewar Yehowa perlu bajenta tuntang sabar dengan uluh beken. Due sipat tuh penting tutu amun itah handak tame akan dunia taheta. (Mateus 5:5; Yakobus 1:​21) Amun itah bajenta tuntang sabar, itah akan mimbit tara akan Yehowa tuntang mandohop uluh beken uka malalus hal je sama.​—⁠Galatia 6:1; 2 Timoteus 2:​24, 25.

 KELEH MAHAPAN SINTA

18. Narai hubunga sinta tuntang sikap dia minti-mintih?

18 Uras sipat je jadi imbahas itah tege hubunga dengan sinta. Suntu, Yakobus puji manasehat kawan pahari awi sikap ewen dengan uluh tatau labih bahalap bara dengan uluh susah. Iye mangesah amun hal tuh hakalawan dengan parentah Hatalla uka ”sinta sama arep keton sama kilau keton sinta arep keton kabuat”. Limbah te iye manyambung, ”Amon keton mangabeken-mangabeken ampin oloh mahapan kare hal je gitan, keton mawi dosa.” (Yakobus 2:​8, 9) Amun itah sinta sama arep, itah dia akan minti-mintih dengan eweh bewei, dia peduli sakula ewen, suku, atawa kaadaan pambelum ewen. Sikap dia minti-mintih je imparahan itah perlu balua bara atei tuntang dia inampa-nampa.

19. Mbuhen penting mahapan sinta?

19 Sinta kea ”sabar tuntang bahalap atei” tuntang kea ”dia balecak” (1 Korintus 13:⁠4) Itah kea perlu sabar, bahalap atei, tuntang randah atei mangat tau tarus mangabar akan uluh. (Mateus 28:19) Dengan mahapan kare sipat tuh, itah akan labih purah pakat dengan uras kawan pahari hong ungkup. Amun itah hasinta, ungkup akan hinje tuntang aran Yehowa akan inara. Uluh beken akan manampayah kapakat tuh tuntang tagerek uka balajar katutu. Jadi, cocok amun Alkitab manutup kesah tahiu pambelum taheta dengan hamauh, ”Tuntang je paling mambatang iete: keton musti hasinta sama arep keton basa sinta te je mampahinje-mambulat kare pahari samandiai sampai keton manjadi tinduh-barasih.”​—⁠Kolose 3:​14.

HARAJUR INAHETA

20. (a) Narai bewei je perlu imikir itah, tuntang mbuhen? (b) Narai je ientai itah?

20 Itah uras perlu bapikir, ’Narai hindai je perlu iubahku uka malekak tuntang manganan sipat je usang?’ Itah perlu balaku pandohop Yehowa mahalau lakudoa. Itah perlu bausaha dengan karas uka maubah pikiran atawa taluh gawin itah je sala mangat tau ”mandino bagi huang karadjaan Hatalla”. (Galatia 5:​19-​21, Surat Barasih 1983) Itah kea perlu mamikir, ’En aku masih harajur mangambuah cara bapikirku uka manyanang Yehowa?’ (Epesus 4:​23, 24) Awi itah dia sempurna, itah perlu karas bausaha uka mahapan tuntang mahaga pambelum taheta. Itah perlu harajur malalus hal tuh. Coba mikir kilen ampi kasanang pambelum kareh metuh uras uluh mahapan pambelum taheta tuntang manyuntu dengan sempurna kare sipat Yehowa je bahalap tutu!