Langsung ke konten

Langsung ke menu sekunder

Langsung ke daftar isi

Saksi-Saksi Yehuwa

Dayak Ngaju

Mambarita—Edisi Palajaran  |  Agustus 2017

 BARA CATATAN SEJARAH ITAH

”Pea Itah Kebaktian Hindai?”

”Pea Itah Kebaktian Hindai?”

HONG bulan November 1932, imasang lampu lalu lintas je pangkasulak intu Mexico City, kota je rami dengan labih bara ije juta kalunen je melai hong hete. Tapi baya ije minggu limbah te, kesah tahiu lampu taheta tuh dia inahiu hindai. Kawan wartawan hong kota te mangganti kesah je labih rami. Sambil manyiap kamera, ewen manunggu tamu khusus hong stasiun kereta api. Uluh je inunggu te Joseph F. Rutherford, presiden Watch Tower Society metuh te. Kawan Saksi hong hete dia sabar kea manambang Pahari Rutherford, je dumah akan kebaktian nasional katahin telu andau.

The Golden Age hamauh, ”Pasti, kebaktian tuh tarus iingat manjadi sejarah je penting tutu” je mambuka jalan akan mambarita katutu hong Meksiko. Tapi hong kebaktian tuh baya 150 biti je dumah. Jadi, narai je manampa kebaktian tuh penting tutu?

Helu bara kebaktian tuh, gawin mangabar hong Meksiko dia hai hasil’ah. Bara nyelu 1919, pire-pire kebaktian kurik ilalus. Tapi limbah te, ungkup malah sasar bakurang. Metuh kantor cabang imbuka hong Mexico City nyelu 1929, ampi gawin mangabar akan sasar bahalap. Tapi, tege pire-pire masalah. Ije biti kolportir, sewut akan perintis metuh te, mangabar sambil malalus bisnis. Metuh iye iningak, iye basingi tuntang manampa kelompok Alkitab kabuat. Hong katika je sama, pengawas cabang hong kanih mawi gawi je sala tuntang musti ingganti. Awi te, kare Saksi hong Meksiko perlu impaabas.

Katahin iye hong kanih, Pahari Rutherford mampaabas kawan pahari je baketep dengan manyampai due hotbah je manggerek hong kebaktian tuntang lime hotbah umum je inyampai mahalau radio. Jite je pangkasulak akan kare pahari hong Meksiko manyampai barita bahalap hong hapus Meksiko mahapan siaran radio. Limbah kebaktian te, inunjuk ije biti pengawas cabang je taheta akan maatur gawin mangabar. Awi berkat Yehowa, kawan Saksi tau tarus malalus gawi te dengan kuntep semangat.

Kebaktian 1941, Mexico City

Ije nyelu limbah te, nyelu 1933, due kebaktian ilalus hong Meksiko. Ije hong kota Veracruz, ije hindai hong kota Mexico City. Usaha kawan pahari nampara mahasil. Hong nyelu 1931, tege 82 penyiar. Tapi sapuluh nyelu limbah te, penyiar sapuluh kali labih are! Hong Kebaktian Teokratis nyelu 1941, labih bara 1.000 biti je dumah akan Mexico City.

 ”ARE ULUH MUHUN AKAN JALAN”

Hong nyelu 1943, kawan Saksi mambagi barita tahiu Kebaktian Teokratis ”Bangsa je Mardeka”, je akan ilalus hong 12 kota intu Meksiko. * (Payah catatan penda.) Ewen mahapan due poster je imasang hong biti hapan tali, ije manaharep baun, ije hindai hong likut. Jituh cara je ihapan Saksi bara nyelu 1936 uka mambagi barita tahiu kebaktian je handak ilalus.

Bagian majalah nyelu 1944 je mamparahan kare Saksi je mahapan poster hong Mexico City

Jituh bahasil tutu hong Mexico City. Majalah La Nación mansanan, ”Hong andau pangkasulak kebaktian, kare Saksi ilaku uka marawei labih are uluh. Hong andau kadue, uluh je dumah labih bara je ulih inampung.” Jituh manampa Gereja Katolik dia rajin. Awi te, ewen malawan Saksi. Aluh tege je malawan ewen, kare Saksi dia mikeh tuntang tatap muhun akan jalan. La Nación kea mansanan, ”Hapus kota manampayah ewen . . . hatue tuntang bawi hubah manjadi ’iklan miar’.” Hong majalah te, tege gambar pire-pire pahari hong jalan Mexico City dengan keterangan hong penda: ”Are uluh muhun akan jalan”.

”TILAM JE LABIH MANGAT BARA LASEH SEMEN”

Hong jaman te, are Saksi perlu bakorban hai uka tau dumah akan kebaktian je ilalus baya hong pire-pire kota intu Meksiko. Are je melai hong lewu je kejau, je jatun jalur kareta api atawa jalan. Ije ungkup manulis, ”Baya tege ije jalur je tege iete jalur komunikasi telegram.” Jadi, baya uka tau mandai kareta api je mangguang kota kebaktian, ewen musti manungkang kalidai atawa mananjung pire-pire andau.

Are bara Saksi metuh te belum susah. Uka tau sampai kota kebaktian, ewen handak dia ulih maongkos arep. Metuh sampai hong kanih, kare Saksi je bajenta hong kanih marawei ewen je dumah mangat tau bamalem hong human ewen. Je beken bamalem hong Balai Karajaan. Sinde katika, kurang labih 90 pahari bamalem hong kantor cabang. Ewen mahapan kare kotak buku akan eka batiruh. Yearbook mansanan amun kare pahari te basukur tutu tuntang mansanan amun ewen mandinun ”tilam je labih mangat bara laseh semen”.

Akan kare Saksi te, pengorbanan hai je inampa ewen jatun narai-narai amun imbanding dengan kahanjak awi tau kumpul dengan kawan paharin ewen. Wayah tuh, tege labih bara 850.000 biti Saksi hong Meksiko. Tapi, semangat tuntang angat tarima kasih ewen masih sama kilau huran. * (Payah catatan penda.) Yearbook 1949 mansanan amun semangat kare pahari akan melayani Yehowa dia bakurang aluh musti bakorban manaharep kaadaan je bahali. Genep kebaktian manjadi ”ije bara kare bahan utama je akan inahiu sampai pire-pire katahi limbah te”. Tuntang ewen akan harajur misek, ”Pea Itah Kebaktian Hindai?” Sampai wayah tuh, jite masih manjadi gambaran semangat kare Saksi hong Meksiko.​—⁠Bara catatan sejarah itah hong Amerika Tengah.

^ par. 9 Kuan buku 1944 Yearbook, kebaktian tuh manampa Saksi-Saksi Yehowa ingasene are uluh hong Meksiko.

^ par. 14 Hong Meksiko, 2.262.646 biti dumah akan Pampingat hong nyelu 2016.