Langsung ke konten

Langsung ke menu sekunder

Langsung ke daftar isi

Saksi-Saksi Yehuwa

Dayak Ngaju

Mambarita—Edisi Palajaran  |  Agustus 2017

”Kasanang bara Hatalla . . . Manangkalau Batas Kaharatin”

”Kasanang bara Hatalla . . . Manangkalau Batas Kaharatin”

”Kasanang bara Hatalla je manangkalau batas kaharatin itah, akan manjaga atei tuntang tirok keton.”​—⁠PILIPPI 4:⁠7.

NYANYIN: 76141

1, 2. Narai je manjadi dengan Paulus tuntang Silas hong Pilippi? (Payah gambar hong tamparan artikel.)

COBA niruk kaadaan Paulus tuntang Silas. Kira-kira bentuk alem, due utusan injil tuh ingurung hong kamar penjara je paling huang tuntang kaput hong ije penjara intu Pilippi. Ewen dia tau haguet kanih-kate awi pain ewen imasung, tuntang ewen manyarenan kapehe awi likut ewen ihewes paham. (Gawin Rasul 16:​23, 24) Helu bara uras tuh manjadi, uluh are mihir Paulus tuntang Silas akan pasar uka manaharep uluh je berwajib. Hong kanih ewen dengan kajeng-kisu iadil. Pakaian ewen irabit tuntang ewen ihewes. (Gawin Rasul 16:​16-​22) Buju-bujur dia adil! Paulus warga negara Roma, tuntang iye tege hak iadil dengan cara je patut. *​—⁠Payah catatan penda.

2 Hong penjara, Paulus mungkin maniruk kejadian andau te tuntang kea kare uluh hong Pilippi. Dia kilau are kota je puji ingguang’ah, kota Pilippi jatun sinagoga, atawa huma sombayang uluh Yahudi. Jadi, uluh Yahudi musti baibadat hong luar bauntunggang lewu, hong saran sungei. (Gawin Rasul 16:​13, 14) Mungkin, sinagoga dia imangun hong kota te awi uluh Yahudi hong kanih dia sampai sapuluh biti. Uluh hong kota Pilippi mangkeme tamam awi ewen warga negara Roma. (Gawin Rasul 16:21) Mungkin awi te ewen dia manyangka amun Paulus tuntang Silas, je uluh Yahudi, warga negara Roma kea. Narai bewei alasa, je pasti Paulus tuntang Silas imenjara dengan dia adil.

3. (a) Mbuhen Paulus mungkin bingung metuh imenjara? (b) Kilen ampi iye manaharep kaadaan te?

3 Paulus kea mungkin mamikir kilen ampi iye tau sampai hong Pilippi. Pire-pire bulan sahelu, Paulus tege hong hila timur Laut Aegea, hong Asia Kurik je kejau eka bara Pilippi. Hong kanih, roh barasih pire-pire kali mangahana iye mangabar hong pire-pire daerah, kila-kilau roh barasih manyuhu iye mangguang eka beken. (Gawin Rasul 16:​6, 7) Akan kueh? Metuh Paulus tege hong Troas, iye mandinun paite, tuntang irentah uka ”haguet akan Makedonia”. Jelas, jituh kahandak Yehowa. Jadi, Paulus bajeleng haguet akan Makedonia. (Mbasa Gawin Rasul 16:​8-​10.) Tapi, narai je manjadi limbah te? Dia tahi limbah sampai kanih, iye imenjara! Mbuhen Yehowa manalua hal tuh? Kilen katahi Paulus akan imenjara? Iye mungkin heran. Tapi, iman ayu tatap dehen tuntang iye tatap sanang. Iye tuntang Silas nampara ”balakudoa tuntang manyanyi nyanyi tara akan Hatalla”. (Gawin Rasul 16:25) Kadamai bara Hatalla mahibur atei tuntang pikiran ewen.

4, 5. (a) Kaadaan narai je mungkin inaharep itah je mirip dengan pangalaman Paulus? (b) Kejadian dia inyangka narai bewei je manjadi dengan Paulus?

4 En Pahari puji mangkeme kilau Paulus? Mungkin, Pahari puji balaku pandohop Hatalla uka manduan ije kaputusan tuntang mangkeme jadi maumba petunjuk bara roh barasih. Tapi limbah te, Pahari malah manaharep are tantangan atawa perlu manampa perubahan je hai. (Pangabar 9:​11) Pahari mungkin bingung mbuhen Yehowa manalua kare hal tuh manjadi. Narai je tau ilalus Pahari mangat tau hanjak aluh manaharep kapehe tuntang percaya salepah’ah dengan Yehowa? Jawaba tau indinun itah dengan balajar bara narai je limbah te manjadi dengan Paulus tuntang Silas.

5 Metuh Paulus tuntang Silas manyanyi, are hal je dia inyangka nampara manjadi. Sulak’ah, petak hagerek sampai uras bauntunggang penjara tabuka, limbah te uras pasung tahanan balekak. Limbah te, Paulus mampatende usaha panjaga penjara je handak mampatei arep. Hasil’ah, panjaga penjara te tuntang uras keluarga impandui. Metuh andau hanjewu, pejabat kota manyuhu polisi uka malapas Paulus tuntang Silas bara penjara tuntang manyuhu ewen haguet bara kota te dengan damai. Metuh kare pejabat te katawan amun Paulus tuntang Silas warga negara Roma, ewen haru sadar amun ewen jadi mawi kasala je hai. Kajaria, ewen kabuat dumah uka mampalua Paulus tuntang Silas. Tapi, helu bara Paulus tuntang Silas malihi kota te, ewen due bajuju uka hasundau dengan Lidia, ije biti pahari bawi je haru impandui, uka mansanan salamat bapisah. Ewen kea sampet mampaabas kawan pahari beken hong Pilippi. (Gawin Rasul 16:​26-​40) Capat tutu uras’ah hubah!

”MANANGKALAU BATAS KAHARATIN”

6. Narai je akan imbahas itah huang artikel jituh?

6 Narai je ilajar itah bara kare kajadian tuh? Yehowa tau malalus kare hal je dia inyangka itah. Jadi, itah dia perlu lalau mikeh metuh manaharep masalah. Paulus mangkeme kabuat katutu hal tuh. Jituh tau inampayah bara tulisa rahian andau akan kawan pahari hong Pilippi tahiu kikeh tuntang kadamai bara Hatalla. Hong artikel tuh, itah akan mambahas kare auh Paulus hong Pilippi 4:​6, 7. (Mbasa.) Limbah te, itah akan mambahas kare kesah Alkitab beken je mamparahan amun Yehowa malalus taluh je dia inyangka itah. Tuntang hong pangkahapus, itah akan mambahas kilen ampi ”kasanang bara Hatalla”, atawa kadamai bara Hatalla, tau mandohop itah manaharep masalah tuntang tatap yakin dengan Yehowa.

Yehowa tau malalus kare hal je dia inyangka itah. Jadi, itah dia perlu lalau mikeh metuh manaharep masalah

7. Narai je handak iajar Paulus akan kawan pahari hong Pilippi, tuntang narai palajara akan itah?

7 Metuh kawan pahari mambasa surat Paulus, narai je imikir ewen? Pasti are bara ewen mingat dengan kapehe je puji ingkeme Paulus tuntang Silas tuntang cara je dia inyangka je ihapan Yehowa uka mandohop ewen. Mahalau surat’ah, narai palajaran je handak inyampai Paulus akan kawan pahari hong Pilippi? Palajara iete: ’Ela mikeh. Keleh balakudoa, tuntang ketun akan mandinun kadamai bara Hatalla je ”manangkalau batas kaharatin”.’ Narai riman auh tuh? Hong pire-pire Alkitab auh tuh inerjemah manjadi ”manangkalau bara kare nupi itah” atawa ”manangkalau uras rencana kalunen”. Jadi, je handak inyampai awi Paulus iete amun ”kasanang bara Hatalla” labih tamam bara je ulih iniruk itah. Kanatek’ah, itah dia katawan cara mamberes masalah itah, tapi Yehowa katawan. Tuntang, Iye tau malalus hal je dia inyangka itah.​—⁠Mbasa 2 Petrus 2:⁠9.

8, 9. (a) Aluh Paulus manaharep kadiaadil hong Pilippi, hal bahalap narai je manjadi? (b) Mbuhen kare Pahari hong Pilippi tau percaya salepah’ah dengan auh Paulus?

8 Kawan pahari hong Pilippi pasti impaabas awi surat Paulus akan ewen tuntang ewen mingat narai je jadi ilalus Yehowa akan ewen huang sapuluh nyelu. Yehowa puna manalua Paulus tuntang Silas manaharep kadiaadil. Tapi dengan kalute, ewen tau ”mambela tuntang mandehen auh Barita Bahalap”. (Pilippi 1:⁠7) Hasil’ah kare pejabat kota hong Pilippi dia bahanyi mangapehe ungkup Kristen je taheta hong kanih. Lukas kea tau tatap melai hong Pilippi mungkin awi Paulus manyinggung tahiu kewarganegaraan Roma ayu. Jadi, Lukas tau labih are mandohop ungkup Kristen hong kanih.

9 Metuh kawan pahari hong Pilippi mambasa surat Paulus, ewen katawan amun kare auh Paulus beken baya auh. Paulus mangkeme kabuat kilen ampi ingapehe dengan kejam. Malah metuh manulis surat tuh, iye kanjera inahan hong huma kabuat intu Roma. Tapi, iye tarus mamparahan amun iye tege kadamai bara Hatalla.​—⁠Pilippi 1:​12-​14; 4:​7, 11, 22.

”ELA KETON MIKEH TAHIU TALOH EN BEWEI”

10, 11. Narai je perlu inggawi metuh itah stres mamikir masalah, tuntang narai je akan ilalus Yehowa?

10 Narai je tau mandohop itah mangat dia ”mikeh tahiu taloh en bewei”, tapi tege kadamai bara Hatalla? Kare auh Paulus akan kawan pahari hong Pilippi mamparahan amun itah pehe kuluk awi mamikir masalah, obat’ah iete lakudoa. Jadi, metuh itah mikeh, itah perlu balakudoa. (Mbasa 1 Petrus 5:​6, 7.) Metuh balakudoa dengan Yehowa, keleh yakin amun Iye peduli dengan Pahari. Ela kalapean uka batarima kasih akan uras berkat je inarima Pahari. Tuntang keleh mingat amun Yehowa tau ”malalus taloh je labih are bara je olih itah balakue atawa maniroke”.​—⁠Epesus 3:​20.

11 Kilau Paulus tuntang Silas, itah mungkin tarewen dengan cara Yehowa mandohop itah. Cara je Ihapa mungkin beken taluh je mampahengan, tapi jite je imerlu itah. (1 Korintus 10:13) Tapi, jite beken alasan akan itah baya mundu-munduk bewei, dia malalus nara-narai tuntang manunggu Yehowa mamberes masalah itah. Itah perlu malalus taluh je sasuai dengan lakudoan itah. (Roma 12:11) Taluh gawin itah musti bara atei tuntang Yehowa akan mamberkat jite. Ela mangalapean amun Yehowa tau malalus labih are hal bara je ilaku atawa je iharap itah. Kanatek’ah, itah mungkin tarewen awi Iye malalus hal je dia inyangka itah. Jadi, keleh itah mambahas pire-pire suntu je manampa itah sasar yakin akan kasanggup Yehowa malalus kare hal je dia inyangka akan itah.

YEHOWA MALALUS TALUH JE DIA INYANGKA ITAH

12. (a) Narai je inggawi Raja Hiskia metuh iancam Raja Sanherib? (b) Narai je ilajar itah bara cara Yehowa mamberes masalah tuh?

12 Huang Alkitab, are suntu je mamparahan amun Yehowa malalus hal je dia inyangka-nyangka. Suntu, hong jaman Raja Hiskia, uras kota Yuda jadi inguasa awi Raja Sanherib bara Asur, baya Yerusalem je dia. Limbah te, Sanherib dumah manyarang Yerusalem. (2 Raja 18:​1-3, 13) Narai je ilalus Hiskia? Je pangkasulak, iye balakudoa dengan Yehowa tuntang balaku nasehat bara Nabi Yesaya. (2 Raja 19:​5, 15-20) Limbah te, Hiskia kea mamparahan amun iye tame akal dengan mangirim panenga je ilaku Sanherib. (2 Raja 18:​14, 15) Akhir’ah, Hiskia manyiap Yerusalem manaharep kaadaan ingapung. (2 Kronika 32:​2-4) Narai hasil’ah? Yehowa mangirim ije malekat uka mampatei 185.000 tantara Sanherib huang ije alem. Hiskia pasti dia manyangka hal tuh akan manjadi!​—⁠2 Raja 19:⁠35.

Palajaran narai je indinun itah bara pangalaman Yosep?​—⁠Genesis 41:⁠42 (Payah paragrap 13)

13. (a) Palajaran narai je indinun itah bara pangalaman Yosep? (b) Narai hal dia inyangka je manjadi dengan Sara?

 13 Coba niruk narai je inaharep ije biti hatue tabela je ara Yosep. Metuh tege hong penjara intu Misir, Yosep dia puji tapikir amun iye akan manjadi uluh nomor due je paling bakuasa intu Misir. Iye kea dia puji tapikir amun Yehowa akan mahapan iye akan manyalamat keluarga bara wayah lau. (Genesis 40:15; 41:​39-​43; 50:20) Kare je ilalus Yehowa labih bara narai je iharap Yosep. Coba niruk kea tahiu Sara, datun Yosep. Sara je jadi bakas mungkin dia tapikir amun Yehowa akan manenga iye anak ayu kabuat, beken baya anak bara jipen bawi ayu. Manak Ishak pasti dia tapikir sulak’ah awi Sara.​—⁠Genesis 21:​1-3, 6, 7.

14. Itah yakin Yehowa akan malalus narai?

14 Itah dia baharap Yehowa dengan mujizat manganan uras masalah itah wayah tuh. Itah dia akan mamaksa mangat Yehowa malalus je tamam tutu huang pambelum itah. Tapi je pasti, Yehowa mandohop kare rewar-Ai je baketep jaman huran dengan cara je mampahengan. Tuntang, Iye hindai hubah. (Mbasa Yesaya 43:​10-​13.) Awi te, itah tau yakin amun Iye akan mampaabas itah mangat itah tau malalus kahandak-Ai. (2 Korintus 4:​7-9) Narai je tau ilajar itah bara suntu Hiskia, Yosep, tuntang Sara? Amun itah tatap baketep dengan Yehowa, Iye akan mandohop itah aluh hong kaadaan je paling bahali.

Amun itah tatap baketep dengan Yehowa, Iye akan mandohop itah aluh hong kaadaan je paling bahali

15. Kilen ampi itah tau tatap tege ”kasanang bara Hatalla” aluh metuh tege masalah, tuntang narai je manampa jite tau manjadi?

15 Narai je tau manampa itah tatap tege ”kasanang bara Hatalla” aluh metuh manaharep masalah? Itah perlu tatap rantep dengan Yehowa. Jite tau manjadi awi tege tewusan Yesus. Tewusan iete ije bara kare gawin Yehowa je hai tutu. Awi tewusan, Yehowa tau mampun dosan itah, itah tau rantep Denga, tuntang itah tau tege atei nurani je barasih hong taharep Iye.​—⁠ Yohanes 14:6; Yakobus 4:8; 1 Petrus 3:​21.

MAHAGA ATEI TUNTANG TIRUK ITAH

16. Narai hasil’ah amun itah mandinun ”kasanang bara Hatalla”? Nenga suntu.

16 Narai je manjadi metuh itah mandinun ”kasanang bara Hatalla je manangkalau batas kaharatin itah”? Alkitab mansanan amun jite akan ”manjaga” atei tuntang tiruk itah. (Pilippi 4:⁠7) Hong bahasa asli, ”manjaga” tege hubunga dengan pasukan je inugas akan mangalindung ije kota. Uluh hong kota Pilippi ingalindung awi pasukan kilau te. Awi te, ewen tau tiruh bakalis awi katawan amun kota ewen aman. Kalute kea, amun itah tege kadamai bara Hatalla, itah dia akan lalau mikeh hindai. Jite manampa atei tuntang tiruk itah tau tenang. Itah katawan amun Yehowa peduli dengan itah tuntang handak mangat itah bahasil. (1 Petrus 5:​10) Dengan kalute, itah dia akan impakalah awi kikeh atawa kurik atei.

17. Mbuhen itah tau tatap percaya dengan Yehowa metuh kasusah je hai?

17 Dia pire hindai kasusah je hai akan dumah. (Mateus 24:​21, 22) Itah dia katawan dengan pasti narai je inaharep itah kareh. Tapi, itah dia perlu lalau mikeh mamikir hal te. Aluh itah dia katawan uras hal je akan ilalus Yehowa, tapi itah mangasene Hatallan itah. Itah katawan narai je jadi ilalus’Ah akan rewar-Ai je baketep jaman huran. Itah jadi balajar amun narai bewei je manjadi, Yehowa akan mamasti mangat kahandak-Ai ilalus. Tuntang, Iye tau malalus hal te dengan cara je dia inyangka itah! Jadi, genep Yehowa malalus ije hal akan itah, itah mandinun kesempatan taheta uka mangkeme ”kasanang bara Hatalla je manangkalau batas kaharatin itah”.

^ par. 1 Ampi Silas kea warga negara Roma.​—⁠Gawin Rasul 16:⁠37.