Langsung ke konten

Langsung ke menu sekunder

Langsung ke daftar isi

Saksi-Saksi Yehuwa

Dayak Ngaju

Mambarita—Edisi Palajaran  |  Agustus 2017

Sinta​—⁠Sipat je Barega Tutu

Sinta​—⁠Sipat je Barega Tutu

YEHOWA manantiring rasul Paulus uka manulis tahiu jalatien sipat hasil roh barasih huang ije biti uluh. (Galatia 5:​22, 23, Surat Barasih 1983) Jalatien sipat tuh inyewut ”buah Roch”. * (Payah catatan penda.) Kare sipat tuh bagian bara ”pambelom taheta” je musti ihapan awi uluh Kristen. (Kolose 3:​10) Sama kilau batang bua akan mahasil amun mandinun sukup danum, ije biti uluh kea akan mahasil kare sipat bahalap tuh amun iye handak inantiring awi roh barasih.​—⁠Masmur 1:​1-3.

Sipat pangkasulak je inyewut Paulus iete sinta. Sapire penting sipat jituh? Paulus hamauh amun iye jatun sinta, iye ”jaton rimae en-en”. (1 Korintus 13:⁠2) Tapi, narai sinta te? Kilen ampi mangat sintan itah sasar hai, tuntang kilen ampi itah mamparaha genep andau?

NARAI SINTA TE?

Aluh bahali manjelas narai sinta te, tapi Alkitab mansanan akan itah kilen ampi uluh je tege sinta te. Suntu, uluh je tege sinta te ”sabar tuntang bahalap atei” tuntang ”rajin dengan taloh bahalap”. Beken bara te, uluh je tege sinta tau ”manyarenan kare taloh handiai tuntang handak percaya dengan taloh je pangkahalape akan oloh handiai; huang keadaan en bewei, sinta te dia puji nihau kaharape tuntang sabar mentai kare taloh handiai”. Iye buju-bujur sinta dengan uluh beken, peduli dengan ewen, tuntang baketep. Tapi, uluh je jatun sinta te rajin bahiri, bajuhu, dia bahadat, mamikir arep kabuat, tuntang dia rajin mampun. Itah dia handak mamparahan kare sipat papa tuh, tapi itah handak buju-bujur sinta uluh beken tuntang dia manantuani kepentingan arep kabuat.​—⁠1 Korintus 13:​4-8.

YEHOWA TUNTANG YESUS SUNTU PANGKAHALAP

”Hatalla te sinta.” (1 Yohanes 4:⁠8) Jituh imbukti bara taluh je Injapa tuntang taluh gawin-Ai. Bukti paling hai amun Iye sinta kalunen iete dengan mautus Yesus akan bumi uka matei akan itah. Rasul Yohanes hamauh, ”Hatalla mansanan, Ie sinta itah hayak manyoho Anake je tonggal akan kalunen mangat itah mandino pambelom mahalau Anake te. Jetoh ie sinta te: Dia ie itah je jari sinta Hatalla, tapi Hatalla je sinta itah tuntang manyoho Anake mangat mahalau Ie itah mandino ampun bara kare dosan itah.” (1 Yohanes 4:​9, 10) Awi Hatalla sinta itah, dosa itah tau iampun tuntang itah tau tege harapan tuntang belum katatahi.

Yesus mangorban pambelum ai uka malalus kahandak Hatalla. Jite bukti amun iye sinta kalunen. Rasul Paulus hamauh, ”Yesus Kristus jari malalus kare taloh je ingahandak Hatalla tuntang manyarah Arepe kilau parapah. Hapan parapah te, je ilalus sinde bewei palus sampai katatahie, itah samandiai imparasih bara dosa.” (Ibrani 10:​9, 10) Jatun kalunen je tau mamparahan sinta kahain te. Yesus hamauh, ”Djaton sinta idje malabien bara te, ie te bara oloh manjarach pambelome gantin sobate.” (Yohanes 15:​13, Surat Barasih 1983) En itah kalunen je dia sempurna tau manyuntu sinta je imparahan awi Yehowa tuntang Yesus? Iyoh! Ayo itah mambahas cara malalus’ah.

”PAMBELOM KETON KELEH INYUANGAWI ASI”

Paulus manasehat itah, ”Keton toh anak Hatalla je inyinta, awi te keton musti manggau jalan uka manumon sonto bara Hatalla. Pambelom keton keleh inyuang awi asi, sama kilau Kristus kea masi itah. Ie mangorban bitin Aie akan itah.” (Epesus 5:​1, 2) Narai rima ”pambelom keton keleh inyuang awi asi”? Jite rima mamparahan sinta genep katika, tuntang dia hong biwih bewei, tapi kea mahalau taluh gawi. Yohanes manulis, ”O kare anakku! Ela keton sinta baya huang totok biwih atawa baya kotak bewei. Keleh itah sinta hapan sinta je bujur, je imbukti hapan gawin itah.” (1 Yohanes 3:​18) Suntu, awi itah sinta Yehowa tuntang sama arep, itah mambarita barita bahalap karajaan. (Mateus 24:14; Lukas 10:27) Pambelum itah kea inyuang awi asi amun itah sabar, bahalap atei, tuntang rajin maampun. Itah manumun nasehat Alkitab tuh, ”Dengan sanang atei [Yehowa] handak mampun keton, jadi keton kea musti handak mampun sama arep keton.”​—⁠Kolose 3:​13.

Amun itah manasehat atawa maningak uluh beken, jite beken rima itah dia pamasi. Suntu, tege uluh bakas je manumun uras kanahuang anak’ah mangat tende manangis. Tapi, uluh bakas je buju-bujur sinta anak’ah tau tegas amun perlu. Kalute kea, aluh Hatalla te sinta, Iye ”mandjara oloh, idje eka huange”. (Ibrani 12:​6, Surat Barasih 1983) Jadi, tingak ajar te bukti sinta. (Sewut Salomo 3:​11, 12) Tapi, itah uras badosa tuntang rancak kalapean mamparahan sinta. Jadi, kilen ampi mangat sintan itah sasar hai? Ayo itah mambahas telu cara.

KILEN AMPI MANGAT SINTAN ITAH SASAR HAI?

Ije, balakudoa mangat Hatalla manenga Pahari roh barasih-Ai, je mahasil sinta. Yesus hamauh amun Yehowa ”manenga Roh Ayue akan ewen je balaku intu Ie”. (Lukas 11:13) Jadi, amun itah balaku roh barasih mahalau lakudoa tuntang handak inantiring awi roh te, sintan itah pasti akan sasar hai. (Galatia 5:16) Suntu, amun Pahari ije biti bakas ungkup tuntang musti manenga nasehat bara Alkitab, Pahari tau balaku roh barasih mangat tau malalus’ah dengan pamasi. Atawa, amun Pahari tege anak, Pahari tau balaku roh barasih mangat tau maningak anak Pahari dengan pamasi, dia dengan kasingi.

Due, mikir suntu Yesus je tatap mamparahan sinta aluh ingapehe. (1 Petrus 2:​21, 23) Amun Pahari ingapehe atawa iawi dia adil, mikir, ’Amun Yesus manaharep hal tuh, narai je akan ilalus’ah?’ Suntu pangalaman ije biti pahari bawi je ara Leigh mamparahan dengan mamikir suntu Yesus, iye tau tatap tenang tuntang dia kajeng-kisu manduan tindakan. Iye hamauh, ”Tege kawal ije kantor je puji mangirim e-mail akan kakawalan je beken. Iye mamapa-mapa aku tuntang gawingku. Pehe tutu ateiku. Tapi, aku bapikir, ’Kilen ampi aku tau manyuntu Yesus huang kaadaan tuh?’ Limbah mamikir suntu Yesus, aku mamutus uka mangalapean masalah tuh. Harian andau, aku haru katawan amun kawalku te tege panyakit babehat tuntang stres. Jadi, aku bapikir iye sapuna dia handak mamapa-mapa aku. Awi mamikir suntu Yesus je tatap mamparahan sinta aluh ingapehe, aku kea tau tatap sinta dengan kawalku te.” Amun itah manyuntu Yesus, itah akan santar sinta dengan uluh beken.

Telu, keleh harajur mamparahan sinta je pahias bakorban. Sinta kilau te tanda murid Yesus je bujur. (Yohanes 13:​34, 35) Yesus manenga suntu pangkahalap huang mamparahan sinta kilau te. Iye malihi sorga tuntang ”malekak taloh handiai” akan kepentingan itah, nyamah ”sampai matei”. (Pilippi 2:​5-8) Amun itah manyuntu sinta je pahias bakorban kilau je imparahan Yesus, pikiran tuntang angat atei itah sasar mirip denga, tuntang itah akan manomor ije kepentingan uluh beken.

MANPAAT MAMPARAHAN SINTA

Tege are manpaat amun itah mamparahan sinta. Nantuani due suntu:

Narai manpaat’ah mamparahan sinta?

  • KAWAN PAHARI HONG HAPUS DUNIA: Awi sinta, itah tau yakin amun itah maja akan ungkup kueh bewei hong hapus dunia, kawan pahari hong kanih pasti akan manarima itah dengan bajenta. Itah basukur tutu awi inyinta kawan paharin itah hong hapus dunia! (1 Petrus 5:⁠9) Sinta kilau te baya tege hong marak rewar Hatalla.

  • KADAMAI: Awi mamparahan ’sinta’, itah tau mangkeme ”kahinje je injapa awi Roh Hatalla”. (Epesus 4:​2, 3) Itah tau mangkeme hal te hong pumpung tuntang kebaktian. Hong dunia je tapisa-pisah tuh, kadamai macam te buju-bujur tamam tutu. (Masmur 119:165; Yesaya 54:13) Amun itah bausaha badamai dengan uluh beken, jite rima itah buju-bujur sinta ewen, tuntang jite manyanang Bapa itah je hong sorga.​—⁠Masmur 133:​1-3; Mateus 5:⁠9.

”SINTA MAMPAHALAP”

Paulus mansanan amun ”sinta mampahalap”. (1 Korintus 8:⁠1) Narai rima? Hong 1 Korintus pasal 13, je kanatek’ah inyewut ”Nyanyin Sinta”, Paulus mangesah kilen ampi sinta te mampahalap. Uluh je tege sinta manomor ije kepentingan uluh beken tuntang peduli dengan narai je imerlu ewen. (1 Korintus 10:24; 13:⁠5) Iye kea mamikir uluh beken, sabar, tuntang bahalap atei. Kare sipat tuh manampa keluarga sanang tuntang ungkup sasar hinje.​—⁠Kolose 3:⁠14.

Tege are cara uka mamparahan sinta, tapi sintan itah dengan Hatalla te je paling penting tuntang baguna. Mbuhen? Awi sinta te mampahinje itah! Narai bewei kaadaan pambelum, suku, tuntang bahasa uluh, uras’ah tau haya-hayak manempu Yehowa. (Sepanya 3:⁠9) Awi te, keleh itah mamparahan sipat bahalap tuh genep andau.

^ par. 2 Jituh artikel pangkasulak bara jalatien artikel je akan mambahas jalatien sipat bua roh.