Langsung ke konten

Langsung ke menu sekunder

Langsung ke daftar isi

Saksi-Saksi Yehuwa

Dayak Ngaju

Jawaban Akan 10 Paisek Anak Tabela

 PAISEK 8

Narai je Musti Ingatawangku tahiu Penganiayaan Seksual?

Narai je Musti Ingatawangku tahiu Penganiayaan Seksual?

MBUHEN PENTING

Genep nyelu bajuta uluh imerkosa atawa inyarang secara seksual tuntang anak tabela je manjadi sasaran utama.

NARAI JE INGGAWIM?

Uluh je manyarang Annette mambanting iye akan petak limbah te iye haru mangatawan kajadia. ”Aku mancoba uras cara akan malawan iye,” Annette bakesah. ”Aku mancoba nangkariak, tapi jatun auh balua. Aku manjuju, manyepak, mamukul, tuntang mangaramak. Metuh te aku mangkeme upakku inusuk lading. Aku dia ulih malawan hindai.”

Amun ikau hong kaadaan kilau te, narai je inggawim?

TENDE TUNTANG MIKIR!

Metuh ikau basiap handak nanju-nanjung—aluh jadi bua-buah—kajadian papa tau kana ikau. ”Halanja dia harajur manang awi je capat hadari,” kuan Alkitab, ”kea kare oloh je apik hong kare gawi harajur jadi oloh basewut. Basa eweh bewei kajariae tau buah sial.”—Pangabar 9:11.

Pire-pire anak tabela, kilau Annette, inyarang awi uluh je dia ingasene. Je beken inyarang awi uluh je ingasene atawa keluarga. Kilau Natalie, anak tabela sapuluh nyelu je inyarang secara seksual awi uluh tabela je melai hong tukep huma. ”Aku mikeh tuntang mahamen tutu je manampa aku sulak ah dia mangesah dengan eweh bewei,” iye bakesah.

 IKAU DIA BASALA

Annette masih mingkes kanyasal dengan kajadian te. ”Kajadian alem te dia ulih impanihauku bara untek,” kuan Annette. ”Sapuna aku musti labih bausaha malawan iye. Tapi, limbah inusuk, aku mikeh tutu. Aku dia tau narai bewei, tapi aku mangkeme sapuna aku musti malawa.”

Natalie kea bausaha malawan angat basala. ”Aku musti ah dia purah percaya uluh,” kuan Natalie. ”Tege aturan bara uluh bakasku aku dia tau kejau bara paharingku, tapi aku dia tumun. Jadi aku bapikir awi te tetangga tege kesempatan manyarang aku. Kajadian te mangapehe keluargaku, tuntang aku mangkeme basala awi jite. Jite je paling babehat akangku.”

Amun ikau mangkeme sama kilau Annette atawa Natalie, tatap mingat amun uluh je imerkosa dia mangahandak hal te. Tege je maanggap kurik masalah tuh, ewen baalasan amun je manyarang te ”uluh hatue” atawa awi je inyarang puna ”gau-gau”. Tapi, sapuna jatun je patut imerkosa. Amun ikau manjadi korban gawin papa te, beken ikau je sala!

Puna purah mambasa auh ”beken ikau je sala”; tapi labih bahali percaya hal te. Tapi tege je mambenyem masalah te tuntang hancur awi mangkeme kanyasal tuntang angat atei papa je beken. Tapi eweh je untung awi mambenyem masalah te—ikau atawa je manyarang? Jadi, akan kahalapmu, ikau musti mamikir pilihan beken.

NGESAH KAJADIA

Alkitab mangesah metuh Yob (Ayub) pehe atei tutu, uluh hatue je bujur atei tuh hamauh, ”Aku mampalua angat kapehen hambaruangku!” (Yob 10:1) Ikau tau mandinu manpaat dengan manggawi je sama. Bapander dengan uluh je ulih imercaya tau mandohop ikau labih tenang tuntang lapas bara kapehen atei.

Angat ateimu mungkin tapahalau babehat inyarenan kabuat. Je inyarenam bakurang amun ikau bapander dengan uluh beken tahiu masalah te

Annette mangkeme amun jite tutu. Iye hamauh, ”Aku bapander dengan ije sobat, tuntang iye mandasak aku bapander dengan due biti bakas ungkup. Sukur aku tumun narai kua. Ewen mambahas hal te dengangku pire-pire kali tuntang manyampai auh je buju-bujur imerluku—jite beken kasalangku. Samasinde beken kasalangku.”

Natalie bapander dengan uluh bakas tahiu kajadian papa te. ”Ewen mandukung aku,” kuan Natalie. ”Ewen maanjur aku mangat mamander jite. Aku dia tarus mingkes kapehen atei tuntang kasingi.”

Natalie kea mangkeme tenang awi balakudoa. ”Bapander dengan Hatalla mandohop aku,” kuan Natalie, ”metuh aku mangkeme dia ulih bapander dengan uluh beken. Metuh balakudoa, aku tau bebas bapander. Jite manampa aku mangkeme buju-bujur damai tuntang tenang.”

Ikau kea tau mangkeme puna tege ”katika akan mampakeleh.” (Pangabar 3:3) Nantuani kea karigas bereng tuntang pikiram. Sukup istirahat. Tuntang je paling penting, keleh maandal Yehowa, Hatalla je mahibur.2 Korintus 1:3, 4.

 AMUN IKAU SUKUP UMUR AKAN BAPACAR

Amun ikau anak bawi tuntang inggoda manggawi gawin papa, dia sala amun ikau hamauh dengan bahanyi, ”Ela macam-macam!” atawa, ”Ela manggulei aku!” Ela mikeh ikau imutus pacarmu. Amun awi te iye mamutus ikau, iye puna dia patut manjadi pacarmu! Ikau patut mandinun uluh hatue je bujur, uluh je mahormat bitim tuntang imanmu.

KUIS

”Metuh SMP, anak hatue manarik talin kutangku tuntang bapander papa—suntu, ewen bapander mangat tutu amun bahubungan seks dengan ewen.”—Coretta.

Narai gawin kawan hatue te?

  1. Bakalea denga?

  2. Marayu iye?

  3. Maleceh iye secara seksual?

”Hong bis, ije biti anak hatue bapander papa limbah te mimbing lengengku. Aku mamukul lenge limbah te manyuhu iye mangejau. Iye mananture aku kilau aku jadi gila.”—Candice.

Narai je inggawi anak hatue te dengan Candice

  1. Bakalea denga?

  2. Marayu iye?

  3. Maleceh iye secara seksual?

”Jadi ije nyelu tuh, Ije biti hatue tabela bapander amun iye handak dengangku tuntang handak nanju-nanjung dengangku, aluh aku jadi mansanan dia. Ije katika, iye manggayap lengengku. Aku manyuhu iye tende, tapi iye dia handak. Limbah te, metuh aku mameteng talin sapatu, iye manapuk paraku.”—Bethany.

Narai gawin hatue jite?

  1. Bakalea denga?

  2. Marayu iye?

  3. Maleceh iye secara seksual?

Pilihan je bujur akan uras paisek te iete C.

Narai je mambeda pelecehan seksual dengan marayu atawa bakahureh?

Pelecehan seksual mamenting kahandak ije uluh. Jite manjadi aluh je ileceh balaku uluh je maleceh tende.

Pelecehan seksual dia bakahureh. Jite tau sasar hai manjadi penganiayaan seksual kilau pemerkosaan.