Langsung ke konten

Langsung ke menu sekunder

Langsung ke daftar isi

Saksi-Saksi Yehuwa

Dayak Ngaju

Jawaban Akan 10 Paisek Anak Tabela

 PAISEK 2

Mbuhen Aku Khawatir tahiu Penampilangku?

Mbuhen Aku Khawatir tahiu Penampilangku?

MBUHEN PENTING

Sapuna tege pire-pire hal je labih penting bara narai je inampayahmu hong saramin.

NARAI JE INGGAWIM?

Mikir kesah jituh: Metuh Yulia basaramin, iye nampayah amun iye baseput. ”Aku musti mangurang ehat bitiku,” kua hong atei—aluh uluh bakas tuntang kakawala manyewut amun iye ”paringkung.”

Pire-pire andau, Yulia bapikir mahapan pire-pire cara je tapahalau malabien akan mangurang ehat biti ”baya pire-pire kilo.” Iye musti manahan kalau katahin pire-pire andau . . .

Amun ikau mangkeme sama kilau Yulia, narai je inggawim?

TENDE TUNTANG MIKIR!

Cara ikau manampayah arepmu tau kilau ikau manampayah hong saramin je rusak

Dia sala amun ikau khawatir tahiu penampilam. Malah, Alkitab mangesah pire-pire uluh hatue tuntang bawi je bahalap biti bereng tuntang bau mata, kilau Sarah, Rahel, Abigail, Yosep (Yusuf), tuntang Dawid (Daud). Alkitab mansanan amun ije biti bawi je ara Abisag ”bahalap toto.”1 Raja 1:4.

Tapi, are anak tabela tapahalau khawatir dengan penampilan ewen. Jite tau mampalembut masalah babehat. Coba mikir:

  • Huang ije penelitian, 58 persen uluh bawi mangaku baseput. Padahal, baya 17 persen bara ewen je kalute.

  • Manumun penelitian beken, 45 persen uluh bawi je sapuna paringkung, manyangka arep ewen lalau baseput!

  • Mangat mangurang ehat biti, pire-pire anak tabela manjadi korban anoreksia—kebiasaan kuman je mambahaya pambelum, je sapuna sama dengan manampa arep balau.

 Amun ikau tege kebiasaan kuman je mambahaya pambelum kilau anoreksia, nggau pandohop. Nampara dengan mangesah akan uluh bakasmu atawa uluh dewasa beken je tau imercaya. Alkitab mansanan, ”Ije biti sobat harajur baketep dengan kawale, tapi ije biti pahari omba mananggong kasusah.”—Sewut Salomo 17:17.

Perubahan Pangkahalap Je Tau Inampam!

Pasti ih, hal te bagantung dengan uluh jite kabuat je manampa sesuatu te ampi bahalap atawa dia. Mikir anak Raja Dawid, Absalom. Alkitab mansanan,

”Jaton oloh je labih bakena bara ie. Bara tatap paie sampai lawin balaue jaton kasalae.”2 Samuel 14:25.

Tapi, hatue tabela tuh gantung atei, dia kasene arep, bakhianat! Awi te, aluh iye bakena, Alkitab dia manenga gambaran je bahalap tahiu Absalom; tapi iye ije biti uluh je dia satia tuntang pamunu.

Akan alasan je bahalap, Alkitab manenga peteh tuh:

”Hapakajan dasar taheta.”Kolose 3:10, Surat Barasih 1983.

”Ela kahalap keton baya gitan intu luar bewei. . . , tapi keleh kahalap keton te lembut bara huang atei keton.”1 Petrus 3:3, 4.

Dia sala amun itah handak inampayah bahalap awi uluh, tapi je labih penting iete sipat bara penampilan. Sasar tahi, kare sipat je bahalap tau mandohop ikau labih tukep dengan uluh beken bara biti je gagah atawa penampilan je bahalap! ”Penampilan je bahalap hanjulu ih inantuani,” kuan ije biti bawi ara Phylicia, ”tapi narai je tege huang arepmu tuntang kare sipat bahalapmu jite je paling iingat awi uluh tahiu ikau.”

MARIKSA KILENAMPI CARA IKAU NAMPAYAH

En ikau rancak mangkeme dia puas dengan baum matam?

En ikau puji bapikir handak operasi kecantikan atawa diet malabien mangat biti kilau je ingahandakmu?

Amun tau, narai bagian bitim je handak iubahmu? (Mintih je cocok.)

  • KAGANTUNG BITI

  • EHAT BITI

  • BALAU

  • AMPIN BERENG

  • BAUM MATAM

  • SUARA

Amun ikau manjawab iyoh akan paisek je sulak tuntang je kadue tuntang mintih telu atawa labih hong paisek katelu, keleh mikir jituh: Amun ikau bapikir penampilanmu dia bahalap, hai kemungkinan uluh beken dia bapikir kalute. Purah uka bapikir malabien tuntang lalau khawatir dengan penampilan itah.1 Samuel 16:7.