Langsung ke konten

Langsung ke menu sekunder

Langsung ke daftar isi

Saksi-Saksi Yehuwa

Dayak Ngaju

Jawaban Akan 10 Paisek Anak Tabela

 PAISEK 4

Kilenampi Aku Mangambuah Kasalangku?

Kilenampi Aku Mangambuah Kasalangku?

MBUHEN PENTING

Dengan mangaku kasalam akan manampa ikau labih batanggung jawab tuntang ulih imercaya.

NARAI JE INGGAWIM?

Mikir kesah jituh: Metuh busik dengan kakawala, Tom mamedak bola sampai mamusit kaca ayun tetangga.

Amun ikau manjadi Tom, narai je inggawim?

TENDE TUNTANG MIKIR!

IKAU TEGE TELU PILIHAN:

  1. Hadari.

  2. Manyalan uluh beken.

  3. Mansanan dengan tetangga kilenampi sapuna kajadia, tuntang misek bua-buah en perlu mangganti rugi.

Hai kemungkinan ikau mipen mintih je A. Tapi, santar tarus tege alasan je bahalap akan mangaku kasalam—en jite mamusit kaca atawa kasalan beken.

 TELU ALASAN MANGAKU KASALAM

  1. Jite hal bujur akan inggawi.

    Alkitab hamauh, ”Huang kakare hal ikei harajur handak malalus taloh je bujur.”Ibrani 13:18.

  2. Uluh beken handak maampun uluh je mangaku kasala.

    Alkitab hamauh, ’Je milim kare kasala, jatun untung; tapi je mangaku tuntang manganan te sundau asi.’—Sewut Salomo 28:13, Surat Barasih 1983.

  3. Je paling penting, jite manyanang Hatalla.

    Alkitab hamauh, ”[Yehowa] basingi dengan oloh je malalus kapapa, tapi heret dengan oloh je belom bujur.”—Sewut Salomo 3:32.

Karina, je umur ah 20 nyelu, manyahukan kartu tilang ayu bara bapa. Tapi iye dia ulih manyahukan jite katatahi. ”Kurang labih ije nyelu limbah te,” kuan Karina, ”Bapaku mandinu ije surat tilang dengan arangku. Aku dinun masalah hai!”

Narai palajara? Karina hamauh, ”Manyahukan kasalan baya mampahai masalah. Ikau musti mananggung akibat limbah te!”

KILENAMPI BALAJAR BARA KASALAM

Alkitab hamauh, ”Itah samandiai uras [”puna kindjap”, Surat Barasih 1983] mawi kasalan.” (Yakobus 3:2) Itah katawan, mangaku kasalan mamparahan karandah atei tuntang kabakas. Jadi ela manahan arep manggawi jite.

Langkah kadue iete balajar bara kasalam. Vera, ije biti bawi tabela hamauh, ”Aku bausaha manampayah genep kasalangku kilau ije pangalaman balajar tuntang manduan palajaran bara genep kasalan je mandohopku manjadi uluh je labih bahalap tuntang mahapan cara beken metuh manaharep kaadaan hong andau harian.” Coba mariksa kilenampi ikau tau manggawi jite.

Ikau minjam sapeda bapam, limbah te sapeda rusak awim. Narai je inggawim limbah te?

  • Benyem tuntang maharap bapam dia mangatawa.

  • Mansanan akan bapam kilenampi sapuna kajadia.

  • Mansanan akan bapam tapi manyalan uluh beken.

Ikau mandinu nilai dia bahalap hong ulangan awi dia balajar. Narai je inggawim limbah te?

  • Manyala ulangan te.

  • Manarima tugas akan mangambuah nilai je dia bahalap.

  • Atawa manyewut guru bajilek dengam.

Mingat kasalam je jadi mahalau kilau manampayah bara spion metuh manyupir mobil

 Sambil mikir narai je inggawim hong kaadaan kilau te, mikir kea amun ikau manjadi (1) bapam tuntang (2) gurum. Narai kuan bapam tuntang gurum amun ikau handak mangaku kasalam? Narai kuan ewen amun ikau manyahukan kasalam?

Coba mingat hindai kasalan je inampam katahin ije nyelu tuh tuntang jawab paisek hong penda.

Narai kasalam? Narai je inggawim limbah manggawi kasalan te?

  • Aku manyahuka.

  • Aku manyalan uluh beken.

  • Aku mangaku.

Amun ikau dia mangaku kasalam, narai je ingkemem limbah te?

  • Mangat—Aku aman!

  • Manyasal—Aku musti mansanan je bujur.

Narai je musti inggawim mangat kaadaan labih bahalap?

Narai je ilajarmu bara kasalam?

KILENAMPI KUAM?

Mbuhen tege uluh manahan arep ah mangaku kasalan ewen?

Narai kuan uluh tahiu ikau amun ikau santar bausaha manyahukan kasalam, tapi narai kuan ewen tahiu ikau amun ikau mangaku kasalam?Lukas 16:10.