Langsung ke konten

Langsung ke menu sekunder

Langsung ke daftar isi

Saksi-Saksi Yehuwa

Dayak Ngaju

Jawaban Akan 10 Paisek Anak Tabela

 PAISEK 3

Kilenampi Aku Tau Bapander dengan Uluh Bakasku?

Kilenampi Aku Tau Bapander dengan Uluh Bakasku?

MBUHEN PENTING

Amun ikau damai dengan uluh bakasmu, pambelummu lancar.

NARAI JE INGGAWIM?

Mikir kesah jituh: Metuh te Raba hamalem. Jefri, 17 nyelu, jadi mamberes gawi hong huma, maka iye handak santa-santai! Iye mambelum TV limbah te munduk hong karusi je rancak ihapa.

Metuh te, Bapa dumah tuntang mendeng hong baun pintu, ampi iye bajilek.

”Jefri! Sapuna ikau musti mandohop andim manampa PR, mbuhen ikau manganan waktu nonton TV? Ikau dia puji manggawi je inyuhu akam!”

”Ampin bahut hindai,” Jefri hamauh luwa-luwah, tapi ihining Bapa.

Bapa maju manukep. ”Narai kuam nah?”

”Jatun ih,” kuan Jefri manarik tahaseng sambil manganan bau.

”Ela bapander kalute dengangku!” kuan Bapa basingi.

Amun ikau manjadi Jefri, narai je inggawim mangat dia lembut masalah kilau tuh?

TENDE TUNTANG MIKIR!

Bapander dengan uluh bakasmu sama kilau manyupir mobil. Amun tege je mahalang hong hila baum, ikau tau manggau jalan beken.

 AKAN SUNTU:

”Kadang bahali bapander dengan bapaku,” kuan Leah, ije biti bawi tabela. ”Sadang katahi aku jadi bapander denga, iye salenga hamauh, ’Oh, ikau bapander dengangku, kah?’”

SADADIA LEAH TEGE TELU PILIHAN.

  1. Manangkariak bapa.

    Leah nangkariak, ”Tuh penting tutu, Pa! Coba hining!”

  2. Dia handak hindai bapander dengan bapa.

    Leah dia handak hindai mamander masalah ayu dengan bapa.

  3. Manunggu waktu je pas, haru limbah te mancoba mambahas hindai masalah te.

    Leah bapander langsung dengan bapa hong beken katika, atawa iye manulis masalah ayu mangat tau imbasa bapa.

Kuam, je kueh je tau iintih?

MIKIR: Bapa, dia manantuani— jituh manampa Leah basingi. Jadi amun Leah mintih Pilihan A, bapa dia paham mbuhen Leah manangkariak denga. Jituh mungkin manampa bapa sasar dia paham je insanan Leah, tuntang jite dia mahormat bapa. (Epesus 6:2) Pasti jituh dia baguna akan eweh bewei.

Amun tege je mahalang jalanam, ikau tau manggau jalan beken. Kalute kea amun ikau handak bapander dengan uluh bakasmu

Pilihan B mungkin je paling mangat inggawi, tapi beken je paling bahalap. Awi narai? Mangat mamberes masalah ayu, Leah musti bapander dengan bapa—mangat bapa tau mandohop iye, bapa musti mangatawan narai je ingkeme. Benyem dia manyelesai narai bewei.

Dengan mintih Pilihan C, Leah dia manalua halangan tuh mampatende usaha mangat tau bapander dengan bapa. Tapi, iye mancoba mangesah masalah hong beken katika. Amun iye mintih manulis surat akan bapa, Leah mungkin mangkeme labih mangat.

Manulis surat kea tau mandohop Leah manjelas narai sapuna je handak insanan. Metuh bapa mambasa surat te, bapa paham narai je handak ingesah Leah denga, tuntang mandohop iye mangatawan narai je manderoh atei Leah. Pilihan C tege guna akan Leah tuntang bapa. En mansanan langsung atawa manulis surat, pilihan jituh manumun nasehat Alkitab mangat itah ”manggoang taloh idje akan kasanang.”Roma 14:19, Surat Barasih 1983.

Narai pilihan beken je tau induan Leah?

Mikir ije pilihan beken. Mikir kea narai kira-kira hasil pilihan te.

 ELA MANYAMPAI PETEH DIA JELAS

Mingat, kadang peteh je inyampaimu dia sama dengan narai je imikir awi uluh bakasmu.

AKAN SUNTU:

Uluh bakasmu misek mbuhen ikau gitan pehe atei. Ikau hamauh, ”Aku dia handak manahiu jite.”

Tapi uluh bakasmu bapikir ikau hamauh, ”Aku dia percaya dengan ketun. Keleh aku bapander dengan kakawalan—dia dengan ketun.”

Mikir amun ikau manaharep masalah hai tuntang uluh bakasmu handak mandohop. Amun ikau hamauh, ”Dia narai. Aku ulih manyelesai kabuat.”

  • Narai je ihining uluh bakasmu?

  • Narai jawaban je labih bahalap je tau imandermu?