Langsung ke konten

Langsung ke menu sekunder

Langsung ke daftar isi

Saksi-Saksi Yehuwa

Dayak Ngaju

Jawaban Akan 10 Paisek Anak Tabela

 PAISEK 6

Kilenampi Aku Tau Manolak Godaan bara Kakawalan?

Kilenampi Aku Tau Manolak Godaan bara Kakawalan?

MBUHEN PENTING

Amun ikau tege pendirian, ikau je maatur pambelummu, beken uluh je maatur ah.

NARAI JE INGGAWIM?

Mikir kesah jituh: Due kawal sakula manukep iye, Brian mangkeme gugup. Jadi due kali huang minggu tuh, ewen manawar aka rokok. Tuntang jituh usahan ewen je katelu uka manggoda.

Anak je sulak bapander:

”Kabuat hindai? Aku handak mangasene ikau dengan ’kawalku.’”

Iye manyewut auh ”kawal” enah, sambil mambirep mata manduan taluh je tege huang kantong ah tuntang manjuju lenge akan Brian.

Brian manampayah rokok hong helat tunjuk kawal ah. Metuh te kea Brian sasar gugup.

”Maaf,” kuan Brian. ”Aku jadi sanan akan ketun aku dia . . .”

Anak je kadue tumbah, ”Ela jadi pamikeh!”

”Aku dia mikeh!” Brian mampahanyi arep uka tau mamander ah.

Anak je kadue endau mimbing bahai Brian sambil habisik. ”Duan ih.”

Anak je sulak endau manjuju rokok labih tukep hong baun Brian sambil habisik, ”Ikei dia akan mander akan eweh bewei. Jatunti uluh je akan katawa.”

Amun ikau manaharep kaadaan kilau Brian, narai keputusam?

 TENDE TUNTANG MIKIR!

En kakawalan Brian mamikir narai je inggawi ewen? En ewen manampa keputusan ewen kabuat? Dia. Bahut ewen manyarah awi godaan uluh beken. Ewen handak inarima tuntang ianggap ”normal” sampai kajaria ewen manalua uluh beken maatur narai je handak inggawi ewen.

Amun ikau manaharep kaadaan kilau te, kilenampi ikau tau nampa keputusan je babeda tuntang manolak godaan kawal?

  1. MANYIAP AREP

    Alkitab mansanan, ”Oloh pintar harati mahakan amun mite bahaya; oloh humong mananjong palus tuntang buah celaka.”—Sewut Salomo 22:3.

    Biasa, ikau ulih mampakira amun cagar manaharep masalah. Akan suntu, hong baun ikau mite kakawalam metuh ewen marokok. Dengan manyiap arepmu, ikau tau manaharep masalah.

  2. BAPIKIR

    Alkitab mansanan, ”Keleh atei huang keton barasih.”1 Petrus 3:16.

    Misek arep kabuat, ’Kilenampi angat ateiku kareh amun aku umba-umba godaan uluh are?’ Memang, sulak ah kakawalan rajin dengam. Tapi kilenampi angat ateimu kareh? En ikau handak mangorban jati diri ayum baya akan manyanang kakawalam?—Eksodus 23:2.

  3. NAMPA KEPUTUSAN

    Alkitab mansanan, ”Oloh je bahalap budi basarae harajur bagawi barendeng tuntang mangejau kapapa.”—Sewut Salomo 14:16.

    Capat atawa lambat, itah musti manampa keputusan je mampengaruh pambelum itah. Alkitab mansanan kesah tahiu Yosep (Yusuf), Yob (Ayub), tuntang Yesus, uras ah manampa keputusan je bujur. Alkitab kea mangesah tahiu Esau tuntang Yudas je manampa keputusan je sala. Narai je akan ilalusmu?

Alkitab mansanan, ”Keleh percaya dengan [Yehowa], tuntang lalus taloh je bahalap.” (Masmur 37:3) Amun ikau jadi mamikir akibat ah tuntang manampa keputusan, purah akam uka manolak godaan bara kakawalam.

Ela khawatir—ikau dia perlu kilau maajar ewen. Bahut, manolak dengan auh je pandak tapi bahanyi jadi sukup. Atawa mangat manegas hindai amun keputusam dia tau iubah ikau tau mander:

  • ”Dia, makasih!”

  • ”Aku dia handak mawi kilau te!”

  • ”Dia, katawam ih aku dia handak!”

Kunci, ikau musti manjawab dengan yakin. Amun ikau manduan sikap kilau te, ikau akan tarewen dengan tanggapan kakawalam je tende manderoh ikau!

 Kilenampi Amun Imbaka

Amun ikau manyarah metuh inggoda awi kakawalam, ikau huang kendali ewen kilau robot

Kilenampi amun ewen mambaka? Kilenampi amun ewen mamander, ”Mbuhen? Mikeh kah?” Ela manyarah, bakalea te baya godaan bara kakawalam. Kilenampi manaharep ah? Tege due pilihan.

  • Ikau tau mambujur auh ewen. (”Yoh, aku puna mikeh!” Limbah te, sanan alasam dengan singkat.)

  • Ikau tau mambaleh godaan ewen. Sanan alasam manolak tuntang nyinggung pangatawan ewen tahiu hal te. (”Nyangkaku ketun katawan resiko mawi hal te!”)

Amun ewen tarus mambaka ikau, keleh ikau buhau! Sasar tahi ikau melai hete, sasar hai kea godaa. Dengan buhau bara hete, ikau mamparahan amun ikau dia manalua uluh beken maubah sikapmu.

Kanyataa, ikau dia tau nyahukan arepmu bara godaan kakawalam. Tapi, ikau tau mintih narai je handak inggawim, sanan pendirianmu, tuntang ikau je mimbing kendali. Akhir ah, ikau je manduan keputusan!Yosua 24:15.