Langsung ke konten

Langsung ke menu sekunder

Langsung ke daftar isi

Saksi-Saksi Yehuwa

Dayak Ngaju

Majar Anak Ketun

 PALAJARAN 10

Yesus Santar Manumun

Yesus Santar Manumun

En kah ikau santar manumun uluh bakasmu?— Kadang, manumun uluh bakas te bahali. En katawam dia Yesus santar manumun Yehowa tuntang uluh bakas ah?— Amun ikau mbasa kesah tahiu Yesus, ikau tau labih manumun dengan uluh bakasmu, aluh jite bahali. Ayo itah payah kesah ah.

Helu bara Yesus belum hong bumi, iye melai hong surga dengan Bapa, Yehowa. Melai bumi, Yesus tege uluh bakas ah kea. Ara Yosep tuntang Maria. Kilenampi ewen sampai tau manjadi uluh bakas Yesus?—

Yesus, je sulak ah belum hong surga, imindah pambelum ah kan huang kanain Maria. Awi te, Yesus tau lahir tuntang belum melai bumi. Tikas Yehowa je tau mamindah pambelum Yesus kilau te! Limbas te, Yesus sasar hai huang kanain Maria, sama kilau awau beken je sasar hai huang kanain indu. Kira-kira jalatien bulan limbas te, ahir ah Yesus lahir. Kute kesah ah sampai Yesus manjadi anak Maria tuntang Yosep.

Yesus sinta tutu dengan Bapa, Yehowa. Metuh umur Yesus 12 nyelu, iye mamparahan sinta jite. Metuh te Yesus tuntang kaluarga mangguang Yerusalem uka malalus Paskah. Tanjung jalanan te kejau kea. Hong jalanan buli, Yosep tuntang Maria harun katawan amun Yesus jatun. Kuam, hong kueh Yesus?—

Narai je inggawi Yesus hong bait?

Yosep tuntang Maria capa-capat haluli kan Yerusalem tuntang manggau Yesus. Ewen pehe atei awi hindai sundau dengan Yesus. Tapi telu andau limbas te, ahir ah ewen manyundau Yesus. Iye tege melai bait! Narai je inggawi Yesus hong hete?— Iye balajar tahiu Bapa, Yehowa. Iye sinta tutu dengan Yehowa, tuntang iye handak mangatawan kilenampi cara mampahanjak Yehowa. Tuntang, metuh Yesus hai kea, Yesus santar manumun Yehowa. Yesus tatap manumun aluh kadang bahali tuntang dia mangat. En kah Yesus manumun Yosep tuntang Maria kea?— Iyoh, Alkitab mansanan, iye manumun ewen.

Narai je tau nyuntum bara Yesus?— Ikau musti tumun uluh bakasmu, aluh jite kadang bahali. Jadi, en ikau handak manumun ewen?—

MBASA HONG ALKITABMU

  • Lukas 1:30-35; 2:45-52

  • Epesus 6:1

  • Ibrani 5:8