Metuh Samuel masih kurik, iye melai hong tabernakel tuntang mandohop melai hete. Tabernakel iete eka uluh baibadat dengan Yehowa. En katawam buhen Samuel tau sampai melai hete? Je sulak ah, itah payah helu kesah tahiu Hana, indu Samuel.

Sulak ah, Hana handak tutu tege anak, tapi dia tau. Awi te iye balakudoa. Iye bajanji dengan Yehowa, amun iye tege anak, iye akan manenga anak te uka melai tuntang mandohop hong tabernakel. Yehowa mahining lakudoa tuntang Hana ahir ah manak anak hatue. Hana manenga aran anak ah Samuel. Maka Hana malalus janji. Metuh umur Samuel telu atau epat nyelu, Hana mimbit iye akan tabernakel mangat Samuel manempu Yehowa melai hete.

Metuh te, imam hai hong tabernakel iete Eli. Due anak ah te imam kea. Nah, tabernakel iete eka uluh baibadat dengan Yehowa. Uluh je melai hete musti bahalap taluh gawi. Tapi, kawan anak Eli papa tutu taluh gawi. Samuel mangatawan uras taluh gawin ewen. En Samuel umba-umba manggawi taluh papa?— Ampi dia, iye tatap manjadi anak je bahalap, kilau je iajar uluh bakas ah.

Kuam, awi kawan anak Eli papa taluh gawi, narai je musti inggawi Eli?— Sapuna Eli musti malait anak ah tuntang mangahana ewen bagawi hong huma Yehowa. Tapi Eli manalua ewen. Jadi, Yehowa basingi dengan Eli tuntang kawan anak ah. Maka Yehowa handak mahukum ewen.

Samuel manyampai peteh Yehowa akan Eli

Ije alem, metuh Samuel lagi batiruh, iye mahining tege je mantehau iye, ’Samuel!’ Iye langsung hadari mangguang Eli. Tapi kuan Eli, ’Aku jatun mantehau ikau.’ Kajadian te baulang sampai telu kali. Metuh Samuel dumah akan je katelu kali, Eli hamauh denga amun iye kana tehau hindai maka iye musti tumbah, ’Hamauh ih Yehowa, aku mahining.’  Samuel manumun kuan Eli. Dia pire limbas te, Yehowa hamauh dengan Samuel, ’Sanan akan Eli, aku akan mahukum kaluarga ewen awi taluh gawi ewen je papa.’ Kuam, en mangat manyampai peteh kilau te akan Eli?— Akan Samuel, jite bahali. Iye mikeh manyampai peteh te. Aluh kalute, iye tatap malalus narai je inyuhu Yehowa. Tuntang, narai je ander Yehowa tutu manjadi. Kadadue anak Eli matei, tuntang Eli kea matei.

Samuel manenga suntu je bahalap akan itah. Iye tatap manjadi anak je bahalap aluh uluh je tukep iye papa taluh gawi. Kilenampi dengam? En ikau handak manjadi anak je bahalap kilau Samuel? Amun ikau manyuntu iye, ikau tau manampa Yehowa tuntang uluh bakasmu hanjak.

MBASA HONG ALKITABMU