Langsung ke konten

Langsung ke menu sekunder

Langsung ke daftar isi

Saksi-Saksi Yehuwa

Dayak Ngaju

Majar Anak Ketun

 PALAJARAN 2

Rebeka Handak Manampa Yehowa Hanjak

Rebeka Handak Manampa Yehowa Hanjak

Rebeka ije biti bawi je sinta dengan Yehowa. Aran bana Isaak. Iye kea sinta dengan Yehowa. Pea Rebeka hasundau dengan Isaak? Narai bukti Rebeka handak manampa Yehowa sanang? Ayo nantuani kesah ah.

Isaak te anak Abraham tuntang Sarah. Ewen melai hong Kanaan. Uluh je melai hete dia menyembah Yehowa. Nah, Abraham dia handak Isaak kawin dengan bawi je dia menyembah Yehowa. Awi te, iye manyuhu pambantu ah je satia haguet mangguang kula jalahan Abraham melai Haran. Aran pambantu te Elieser. Iye musti tulak akan Haran uka manggau sawan akan Isaak.

Rebeka handak lulang-luli manduan danum akan unta-unta

Elieser haguet dengan kare pambantu je beken. Tanjung jalanan ewen kejau tutu. Jadi, ewen mimbit sapuluh kungan unta uka metun bahata tuntang hadiah. Tapi, kilenampi Elieser tau manyundau bawi je pas akan Isaak? Nah, melai Haran, ewen tende tukep ije sumur awi ewen katawan are uluh bakumpul melai hete uka manduan danum. Limbas te, Elieser balaku doa dengan Yehowa, ’Amun aku kareh balaku danum dengan ije biti bawi melai hetuh, tuntang iye manenga akanku tuntang kawan untaku, baarti iye je intih-Muh.’

 Dia tahi limbas te, Rebeka dumah ka sumur. Iye bahalap tutu bau-mata, kuan Alkitab. Maka Elieser balaku danum denga, tuntang Rebeka tumbah, ’Yoh, aku duan akam. Akan kawan untam kea, lah.’ Coba mikir! Unta bahut are tutu mihup, jadi Rebeka musti lulang-luli manduan danum akan ewen. Coba payah melai gambar. Iye cangkal tutu, ie dia?— Elieser hanjak tutu awi Yehowa mahining doa.

Palus Elieser manenga hadiah je bahala-halap akan Rebeka. Awi te Rebeka marawei Elieser tuntang uluh je umba denga uka hasupa dengan kaluarga. Elieser mangesah akan ewen buhen iye dumah ka Haran. Iye kea hamauh, Yehowa jadi mamintih Rebeka uka manjadi sawan Isaak. Kaluarga Rebeka hanjak tutu, ewen dia mangahana Rebeka kawin dengan Isaak.

Rebeka umba ka Kanaan dengan Elieser tuntang kawin dengan Isaak

Tapi kuam, en Rebeka handak dengan Isaak?— Rebeka katawa amun Yehowa je mandohop Elieser. Jadi, metuh kaluarga Rebeka misek en handak iye umba ka Kanaan tuntang kawin dengan Isaak, iye numbah, ’Yoh, aku handak.’ Dia pire, Rebeka tulak dengan Elieser. Metuh sampai hong Kanaan, Rebeka kawin dengan Isaak.

Awi Rebeka manampa Yehowa hanjak, iye imberkat Yehowa tuntang manjadi tatu hiang Yesus! Amun ikau kilau Rebeka tuntang manampa Yehowa hanjak, ikau kea imberkat Yehowa.

MBASA BARA ALKITABMU

  • Genesis 12:4, 5; 24:1-58, 67