Langsung ke konten

Langsung ke menu sekunder

Langsung ke daftar isi

Saksi-Saksi Yehuwa

Dayak Ngaju

Majar Anak Ketun

 PALAJARAN 3

Rahab Percaya dengan Yehowa

Rahab Percaya dengan Yehowa

Coba ikau mikir kilenampi amun ikau melai Yerikho. Kota te tege hong Kanaan. Uluh hong sambil gantaum dia percaya dengan Yehowa. Tege ije biti bawi je melai hong kota te, ara Rahab.

Metuh Rahab kurik, iye are mahining uluh mangesah uluh Israel. Suntu ah, kesah Musa je mamimpin uluh Israel balua bara Mesir palus dimpah Laut Bahandang. Iye kea mahining Yehowa mandohop ewen manang hong kare parang kalahi. Metuh jadi hai, iye mahining kabar uluh Israel bakemah tukep Yerikho!

Rahab mangalindung due utusan rahasia tuh awi iye percaya dengan Yehowa

Ije alem, due utusan rahasia Israel tame benye-benyem akan Yerikho uka manampayah kaadaan hong hete. Ewen dumah akan huma Rahab. Balalu, Rahab marawei ewen bamalem melai ekaa. Alem te kea, raja Yerikho mahining kabar, tege utusan rahasia hong kota ah je bamalem hong huma Rahab. Raja dia rajin, maka iye manyuhu tentara uka manekap ewen. Tapi, Rahab manyahukan ewen hong hunjun huma. Balalu iye hamauh dengan tentara te, ’Endau puna melai hetuh ewen, tapi ewen jadi balua bara kota tuh. Amun ketun capat manyasah ewen, ketun pasti sampet manekap ewen!’ En kuam, buhen Rahab mangalindung utusan rahasia te?— Awi iye percaya dengan Yehowa, iye kea yakin Yehowa pasti manenga petak Kanaan akan uluh Israel.

Helu bara utusan rahasia te buhau bara huma Rahab, ewen bajanji metuh Yerikho inyarang kareh, Rahab dengan kaluarga inyalamat. Tapi, tege ije je musti inggawi Rahab. En katawam narai jite?— Kuan ewen, ’Tali bahandang musti inguakmu melai basenguk. Dengan mawi jite, uras uluh je tege melai humam tau salamat.’ Rahab manumun kuan ewen. Narai je manjadi limbas te?—

Yehowa manyalamat Rahab dengan kaluarga

Pire-pire andau limbas te, uluh Israel baris mangaliling kota te. Tapi ewen dia hamauh narai bewei. Ewen mangaliling kota te sinde kali jandau, ewen kea manggawi katahin jahawen andau. Tapi, andau kauju, ewen mangaliling ah uju kali. Limbas te, ewen mangombak haya-hayak.  Palus Yehowa mampalungkang tembok kota te. Tapi, huma je tege tali bahandang ah dia rusak. Nah, coba payah hong gambar. Je kueh huma te?— Iyoh, Rahab dengan kaluarga salamat!

Narai je ilajar muh bara kesah Rahab?— Rahab percaya dengan Yehowa awi iye jadi mahining kahebat Yehowa. Metuh tuh ikau balajar kea kilenampi kahebat Yehowa. Pasti ikau percaya dengan Yehowa kea, ie dia?— Bahalap tutu!

MBASA BARA ALKITABMU

  • Yosua 2:1-24; 6:1-5, 14, 15, 20-25

  • Ibrani 11:31