Langsung ke konten

Langsung ke menu sekunder

Langsung ke daftar isi

Saksi-Saksi Yehuwa

Dayak Ngaju

Majar Anak Ketun

 PALAJARAN 7

En Puji Ikau Mangkeme Kabuat tuntang Mikeh?

En Puji Ikau Mangkeme Kabuat tuntang Mikeh?

Coba payah gambar anak kurik tuh. Iye mangkeme kabuat tuntang mikeh ampi. En ikau puji mangkeme kilau te?— Uras uluh puji mangkeme kilau te. Alkitab bakesah tahiu sobat-sobat Yehowa je puji mangkeme kabuat tuntang mikeh. Ije bara uluh te Elia. Ayo itah balajar tahiu iye.

Isebel handak mampatei Elia

Elia belum tahi helu bara Yesus dumah. Iye melai hong Israel. Metuh te, Ahab manjadi raja. Iye dia menyembah Yehowa. Ahab tuntang sawa, Isebel, menyembah Baal, Hatalla palsu. Awi te, are uluh Israel umba-umba menyembah Baal. Ratu Isebel jahat tutu. Iye handak mampatei uras uluh je menyembah Yehowa. Iye kea handak mampatei Elia! Maka, narai je inggawi Elia?—

 Elia mandari arep ah! Iye buhau kan padang pasir tuntang manyahukan arep ah huang goa. Kuam, buhen iye manyahukan arep ah?— Iyoh, awi iye mikeh. Sapuna, Elia dia perlu mikeh, awi iye katawan Yehowa tau mandohop iye. Yehowa jadi puji mamparahan kuasa akan Elia. Suntu ah, Yehowa puji manjawab doa Elia dengan mampuhun apui bara langit. Yehowa kea pasti tau mandohop Elia hong kaadaan tuh!

Kilenampi Yehowa mandohop Elia?

Metuh Elia melai goa, Yehowa misek denga, ’Narai gawim hong hetuh?’ Elia manumbah, ’Baya aku ih je menyembah ikau. Tuh tisa aku kabuat, aku mikeh kana patei.’ Elia manyangka penyembah Yehowa jadi lepah kana patei. Tapi Yehowa mahibur Elia, ’Dia, masih tege 7.000 biti je menyembahku. Ela mikeh. Are tugas beken je musti nggawim!’ Kuam, en Elia hanjak mahining te?—

Narai je ilajarmu bara kesah Elia?— Ikau dia perlu mangkeme kabuat tuntang mikeh. Masih tege kakawalam je sinta dengan Yehowa tuntang sinta dengam kea. Beken bara te, Yehowa paham kuat tuntang handak mandohop ikau! Jadi sapuna ikau dia kabuat. En jite manampa ikau hanjak?—

MBASA HONG ALKITABMU

  • 1 Raja 19:3-18

  • Masmur 145:18

  • 1 Petrus 5:9