Langsung ke konten

Langsung ke menu sekunder

Langsung ke daftar isi

Saksi-Saksi Yehuwa

Dayak Ngaju

Kaluarga Pahari Tau Bahagia

 BAGIAN 6

Tege Awau Maubah Kaadaan

Tege Awau Maubah Kaadaan

”Kare anak jete panengan Hatalla.”—Masmur 127:3

Tege awau mimbit kahanjak akan je jadi kawin. Tapi, tau kea manampa kaderoh. Ketun mungkin dia tapikir maurus anak te perlu are waktu tuntang tanaga. Awi tapas tiruh, jite manampa emosi dia bahalap. Jite mimbit masalah hong hubungan ketun. Ketun due musti manampa panyasuaian uka maurus awau tuntang manjaga pangawin ketun tatap kuat. Kilenampi nasehat Alkitab tau mandohop Pahari?

 1 MAMAHAM KAADAAN AH

NARAI KUAN ALKITAB: ”Sinta te sabar tuntang bahalap atei.” Sinta kea ”dia mamaksa oloh beken uka manumon kanahuang ayue kabuat, dia kea murah tersinggung.” (1 Korintus 13:4, 5) Metuh haru tege anak, dia sala amun Pahari mamikir anak Pahari. Tapi, kabalin Pahari mungkin mangkeme inalua. Jadi, ela manalingau amun iye perlu kea imperhati. Dengan sabar tuntang pamasi, Pahari tau manampa iye mangkeme imerlu tuntang imbit iye maurus anak ketun.

”Kare banan . . . Keleh keton belom hapan salepah kaharatin keton dengan sawan keton.” (1 Petrus 3:7) Pahari musti paham kabalin Pahari are lepah tanaga uka maurus anak ketun. Iye mungkin tau stres, heka, atawa depresi awi tanggung jawab tambahan tuh. Kanetek ah, iye bahkan tau basingi dengan Pahari. Tapi, tatap tenang, awi uluh je ”dia murah sangit labih bahalap bara mingkes kuasa”. (Sewut Salomo 16:32) Parahan pengertian tuntang dohop iye.—Sewut Salomo 14:29.

JE TAU PAHARI LALUS:

  • Bapa: Dohop sawan Pahari maurus anak ketun, aluh bentuk alem. Ngurang waktu akan urusan beken mangat are waktu akan kaluarga Pahari

  • Indu: Ela manolak pandohop bara banan Pahari amun iye handak mandohop maurus anak ketun. Amun ampi iye dia tau mawi dengan bahalap, ela capat basingi, tapi dengan sabar parahan cara je bujur

 2 ELA NALUA HUBUNGAN KETUN BALEMU

NARAI KUAN ALKITAB: Uluh je jadi kawin ”Manjadi ije.” (Kejadian 2:24) Aluh wayah tuh jadi tege anak, mingat Pahari tuntang kabalin Pahari tatap ”ije”. Mausaha mangat hubungan ketun due tatap kuat.

Uluh bawi, manarima kasih akan pandohop tuntang dukungan kabalin Pahari. Amun Pahari marega, hal te tau ’mampakeleh’, rima mampakuat hubungan ketun huang kaadaan je haru inaharep. (Sewut Salomo 12:18) Uluh hatue, mander akan sawan Pahari bahwa Pahari tutu manyinta tuntang marega iye. Nenga pujian aka awi pandohop ah.—Sewut Salomo 31:10, 28.

”Genep bitin oloh musti manggau jalan akan mandohop oloh beken.” (1 Korintus 10:24) Lalus narai je paling bahalap akan kabalin Pahari. Ketun due musti manyadia waktu hapan mahining, bapander tuntang batarima kasih dengan kabalin Pahari. Ela mikir arep bewei huang hubungan intim ketun. Mikir kea kebutuhan kabalin Pahari. Alkitab mansanan, ”Ela mangejau arep keton bara kabalin keton. Tapi tau kea amun hanjulo asal jete puna jari imakat awi keton due.” (1 Korintus 7:3-5) Jadi, mbahas kaadaa dengan jujur. Kasabar tuntang pengertian ketun tau mampakuat hubungan ketun.

JE TAU PAHARI LALUS:

  • Nyadia waktu husus akan ketun due ih

  • Nenga hadiah akan kabalin Pahari mangat iye mangkeme inyinta

 3 MAJAR ANAK PAHARI

NARAI KUAN ALKITAB: ”Bara korik ikau jari mangasene Surat Barasih. Surat Barasih te tau manenga akam kaharati uka mandino salamat.” (2 Timoteus 3:15) Nampa rencana kilenampi ketun majar anak ketun. Anak uluhan capat tutu balajar, bahkan metuh masih melai kanai. Iye tau mangasene kare kutak ketun tuntang narai je kamean ketun tege pangaruh aka. Keleh mbasa buku aka metuh iye awau. Aluh iye mungkin hindai paham, jituh tau mandohop ah uka rajin mambasa metuh iye jadi hai.

Ela bapikir lalau capat majar iye tahiu Hatalla. Imbit iye balakudoa dengan Yehowa. (Deuteronomium 11:19) Metuh Pahari bangang denga, ngesah taluh je nampa Hatalla. (Masmur 78:3, 4) Metuh iye sasar hai, iye mangkeme ketun sinta tutu dengan Yehowa tuntang anak Pahari tau balajar uka sinta Yehowa kea.

JE TAU PAHARI LALUS:

  • Badoa balaku bimbingan uka majar anak Pahari

  • Keleh sabar majar iye baulang-ulang sampai iye paham aluh masih kurik