Langsung ke konten

Langsung ke menu sekunder

Langsung ke daftar isi

Saksi-Saksi Yehuwa

Dayak Ngaju

Barita Bahalap bara Hatalla!

 PALAJARAN 8

Mbuhen Hatalla Manalua Taluh Papa tuntang Kapehe?

Mbuhen Hatalla Manalua Taluh Papa tuntang Kapehe?

1. Kilenampi taluh papa nampara tege?

Hatalla manalua kalunen mamarentah sampai wayah tuh uka mamparahan bahwa ewen dia ulih mamberes masalah kalunen

Taluh papa nampara tege hong bumi metuh Setan mander tanjaru je sulak ah. Metuh sulak ah, Setan ije malekat je sempurna. Tapi, iye dia setia dengan Hatalla. (Yohanes 8:44) Iye handak inyembah padahal jite Ain Hatalla. Setan mananjaru Hawa, tuntang marayu iye mangat manumun iye, beken Hatalla. Adam umba-umba kea dia manumun Hatalla. Gawin te Adam mimbit kapehe tuntang pampatei.​—Mbasa Genesis 3:1-6, 19.

Metuh Setan marayu Hawa uka dia manumun auh Hatalla, iye manampara pambarontakan malawan Hatalla sebagai Pribadi je paling kuasa. Kakaren ulun kalunen labih mamintih Setan dengan manolak Hatalla sebagai Panguasa ewen. Awi te, Setan manjadi ”panguasa kalunen [dunia]”.​—Mbasa Yohanes 14:30; 1 Yohanes 5:19.

2. En Taluh Nampa Hatalla je rusak?

Taluh gawin Hatalla halajur sempurna. Kalunen tuntang malekat je Hatalla nampa sanggup manumun dengan sempurna. (Deuteronomium 32:4, 5) Hatalla manampa itah dengan kabebasan uka mawi narai je bahalap atawa papa. Hal te manenga itah kesempatan uka mamparahan sinta itah dengan Hatalla.​—Mbasa Yakobus 1:13-15; 1 Yohanes 5:3.

3. Mbuhen Hatalla manalua kapehe sampai wayah tuh?

Yehowa manalua uluh malawan Iye sampai wayah tuh. Narai alasa? Uka mamparahan amun dia Iye, pamarentahan kueh bewei dia tau mahasil taluh je bahalap akan kalunen. (Pangabar 7:29; 8:9) Katahin 6.000 nyelu sajarah kalunen, hal te puna tutu. Kare pemimpin dunia dia ulih mahapus  parang kalahi, taluh papa tuntang je dia adil, atawa panyakit.​—Mbasa Yeremia 10:23; Roma 9:17.

Kabalika, pamarentahan Hatalla mimbit manfaat akan uluh je maku manumun. (Yesaya 48:17, 18) Dia pire hindai, Yehowa akan mampaterai uras pamarentahan kalunen. Tikas uluh je mamintih pamarentahan Hatalla je akan melai bumi.​—Yesaya 11:9.​—Mbasa Daniel 2:44.

4. Awi kasabar Hatalla, kesempatan narai je tabuka akan itah?

Setan hamauh jatunti ulun je manempu Yehowa awi sinta je tutu. En Pahari handak mambukti bahwa hal te dia bujur? Pahari tau! Awi Hatalla sabar, itah uras tau mandinun kesempatan uka mamparahan en kah itah mamintih pamarentahan Hatalla atawa pamarentahan kalunen. Pilihan itah nyata bara pambelum itah.​—Mbasa Yob 1:8-12; Sewut Salomo 27:11.

5. Narai bukti bahwa itah mintih Hatalla akan Panguasa?

Narai je intih itah mamparahan en kah itah handak manumun Hatalla atawa dia

Itah mintih Hatalla akan Panguasa dengan manggau tuntang malalus ibadat sejati je indasar bara Firman Hatalla, Alkitab. (Yohanes 4:23) Itah tau manolak Setan sebagai panguasa dengan dia umba huang urusan politik tuntang parang, kilau Yesus kea.​—Mbasa Yohanes 17:14.

Setan mahapan kuasa uka pipen uluh mangat mawi pergaulan bebas je mamparugi. Amun itah dia maku mawi hal te, mungkin sobat atawa kaluarga akan mambaka atawa mangahana itah. (1 Petrus 4:3, 4) Jadi, itah musti mamintih. En kah itah akan umba dengan uluh-uluh je sinta Hatalla? En kah itah akan manumun paraturan-Ah? Amun kalute, itah mambukti bahwa Setan mananjaru metuh iye mander bahwa huang penda tekanan, jatunti ije biti uluh je akan malalus narai kuan Hatalla.​—Mbasa 1 Korintus 6:9, 10; 15:33.

Awi Hatalla sinta ulun kalunen, Iye pasti akan manganan kare taluh papa tuntang kapehe. Uluh-uluh je percaya akan belum katatahi hunjun bumi.​—Mbasa Yohanes 3:16.