Langsung ke konten

Langsung ke menu sekunder

Langsung ke daftar isi

Saksi-Saksi Yehuwa

Dayak Ngaju

Barita Bahalap bara Hatalla!

 PALAJARAN 4

Eweh Yesus Kristus?

Eweh Yesus Kristus?

1. Kilenampi tampara pambelum Yesus?

Sifat narai bewei je manampa Yesus purah uluh nukep ah?​—MATEUS 11:29; MARKUS 10:13-16.

Hong pangkasulak gawi, Hatalla manampa Yesus. Dia kilau kalunen beken, Yesus belum melai surga dengan bereng roh helu bara kan bumi. (Yohanes 8:23) Iye dia dilahirkan awi ije biti bawi bara surga. Iye injadian langsung awi bapa surgawi, Yehowa. Jadi, cocok amun Yesus inyewut anak Hatalla. Iye kea inyewut ”Firman” awi iye manjadi juru bahasa Hatalla. (Yohanes 1:14) Yesus kea umba manampa hal-hal beken.​—Mbasa Sewut Salomo 8:22, 23, 30; Kolose 1:15, 16.

2. Mbuhen Yesus dumah kan bumi?

Hatalla manyuhu anak-Aie kan bumi dengan mamindah pambelum ah bara surga kan kanai ije biti bawi bujang Yahudi je ara Maria. Jadi, Yesus jatunti bapa kalunen. (Lukas 1:30-35) Yesus dumah kan bumi uka (1) majar katutu tahiu Hatalla, (2) manenga suntu uka malalus kahandak Hatalla bahkan metuh keadaan je bahali, tuntang (3) manenga pambelum ah je sempurna akan ”tewusan”.​—Mbasa Mateus 20:28.

3. Mbuhen itah musti inewus?

Tewusan iete rega je harus imbayar uka mambebas uluh bara ancaman pampatei. (Eksodus 21:29, 30) Metuh manjadian kalunen, Hatalla dia maku ewen manjadi bakas tuntang matei . Narai bukti? Hatalla hamauh dengan kalunen je sulak ah, Adam, amun ewen manggawi dosa, ewen tau matei. Jadi, jaka adam dia mawi dosa, iye dia akan matei. (Genesis 2:16, 17; 5:5)  Alkitab mansanan, pampatei ”tame” kan dunia ulun kalunen mahalau Adam. Jadi, awi kasalan Adam, uras ulun kalunen matei. Itah mamerlu tewusan mangat imbebas bara hukuman pampatei je itah dinun bara Adam.​—Mbasa Roma 5:12; 6:23.

Eweh je tau mambayar tewusan uka mambebas itah bara pampatei? Metuh itah matei, itah baya mambayar hukuman akan dosa itah kabuat. Kalunen je dia sempurna dia tau mambayar tewusan akan dosa uluh beken.​—Mbasa Masmur 49:7-9.

4. Mbuhen Yesus musti matei?

Dia kilau itah, Yesus sempurna awi iye lahir mahalau mukjijat. Iye dia puji mawi dosa. Jadi, iye dia perlu matei awi dosa kabuat, tapi iye matei akan uluh beken je badosa. Hatalla manyuhu iye awi Iye sinta tutu ulun kalunen. Yesus kea mamparahan sinta ah akan itah dengan manumun Bapa tuntang manenga pambelum ah akan itah.​—Mbasa Yohanes 3:16; Roma 5:18, 19.

5. Narai gawin Yesus wayah tuh?

Metuh melai bumi, Yesus mampakeleh uluh haban, mampisik uluh matei, tuntang mandohop uluh je manaharep kasusah. Dengan kalute, iye mamparahan je akan inggawi ah huang andau harian akan ulun je manumun. (Mateus 15:30, 31; Yohanes 5:28) Limbas Yesus matei, Hatalla mampisik iye haluli dengan bereng roh. (1 Petrus 3:18) Limbas te, Yesus manunggu hong silan gantau Hatalla sampai iye mandinun kuasa bara Hatalla uka mamarentah sebagai Raja hong bumi. (Ibrani 10:12, 13) Wayah tuh, Yesus manjadi Raja hong surga, tuntang kare rewar ah mansuman barita bahalap hong hapus dunia.​—Mbasa Daniel 7:13, 14; Mateus 24:14.

Dia pire hindai, Yesus akan mahapan kuasa ah sebagai Raja uka mampaterai uras kapehe tuntang uras uluh je mawi kapapa. Uras uluh je percaya dengan Yesus tuntang manumun ah, akan mangkeme pambelum huang firdaus hong bumi.​—Mbasa Masmur 37:9-11.