Faigi nösi

Faigi ba menu sekunder

Samaduhu’ö Yehowa

Nias

Hadia Ira Samaduhu’ö Yehowa Zanga’asogö Fa’udusa mazui Fa’ohahau Dödö ba zi Sambua Omo?

Hadia Ira Samaduhu’ö Yehowa Zanga’asogö Fa’udusa mazui Fa’ohahau Dödö ba zi Sambua Omo?

Börö me Samaduhu’ö Yehowa ndra’aga, ma’odödögö ena’ö so wa’ohahau dödö ba zi sambua omo. Mafosumange Lowalangi börö me ya’ia Zamobörö fongambatö. (I Moze 2:21-24; Efeso 3:14, 15) Ibe’e goi-goi ba Zura Ni’amoni’ö si tola manolo niha si no mongambatö ba zi sagörö ulidanö ena’ö so khöra wa’ohahau dödö.

Ira Samaduhu’ö Yehowa La’asogö Wa’ohahau Dödö ba zi Sambua Omo

Ma’odödögö sibai ba wolo’ö mene-mene si so ba Zura Ni’amoni’ö ena’ö tobali ndra’aga fo’omo ira matua, fo’omo ira alawe, ba satua si sökhi. (Gamaedola 31:10-31; Efeso 5:22–6:4; I Timoteo 5:8) Mene-mene si so ba Zura Ni’amoni’ö tola ibe’e wa’ohahu dödö ba zi sambua fongambatö hewa’ae no fabö’ö agamara. (I Fetero 3:1, 2) Datafaigi hewisa wehede niha me no tobali Samaduhu’ö Yehowa wo’omonia ira alawe mazui ira matua:

  • ”Ba zi önö fakhe fangowaluma, fakara-kara manö ndra’aga, ba oya manö gabula dödöma. Hiza’i, me no tobali Samaduhu’ö Yehowa Ivete, ya’ia andre tobali niha si so fa’omasi ba sebolo tödö. Börö me no fabö’ö gamuatania lua-luania aro wongambatöma.”—Clauir, moroi ba Brazil.

  • ”Me ibörögö ifaha’ö ia fo’omogu, Chansa, sanandrösa ba Zura Ni’amoni’ö khö ndra Samaduhu’ö Yehowa, lö fao dödögu, börö me so ba wangera-ngeragu wa ya’ira andrö sama’udu ösi nomo. Hiza’i, osi Zura Ni’amoni’ö zanolo fongambatöma.”—Agness, moroi ba Zambia.

Ba ginötö manuriaigö, matutunö ba niha mene-mene si so ba Zura Ni’amoni’ö si tobali fanolo khöra ena’ö

  • Atua-tua ira ba wangalui fo’omo si sökhi

  • Ohahau dödöra ba ndröfi wamobörö fangowalura

  • Ba wangokhögö fahuwusa si sökhi khö nama hegöi ina matua

  • Atua-tua ba wangoguna’ö kefe

  • Lö asese fa’udu

  • Faoma la’efasi zala nawöra

  • Lafaha’ö ndraonora

Hadia i’asogö gabula dödö ba zi sambua fongambatö na findra ba agama?

Tola manö alua zimanö da’ö. Duma-dumania, molo’ö nifatunö lembaga riset Sofres me döfi 1998, so 1 moroi ba zi 20 fongambatö la’okhögö gabula dödö na ha fo’omo ira matua mazui fo’omo ira alawe zi tobali Samaduhu’ö Yehowa.

No irai iwa’ö Yesu wa niha solo’ö khönia, latörö wanandraigö moroi ba nösi nomora. (Matai’o 10:32-36) Molo’ö Sejarawan Will Durant, ba ginötö wamatörö Romawi, ”laböbögö zi lö duhu ba niha Keriso wa ya’ira andre samabali ösi nomo”. * Ba ginötö iada’a, laböbögö göi zimane da’ö khö ndra Samaduhu’ö Yehowa. Tobali, hadia sindruhu wa so gabula dödö ba zi sambua omo börö me no tobali Samaduhu’ö Yehowa wo’omonia?

Mahkamah Eropa soguna ba Hak Asasi Manusia

Ba ginötö ihalö gangetula Mahkamah Eropa ba Hak Asasi Manusia börö me no mufobahulu ndra Samaduhu’ö Yehowa wa ya’ira samabali ösi nomo, imane wa ösi nomo si tenga Samaduhu’ö zasese manga’asogö gabula dödö ba nomo, börö me lö omasi ”itema ba i’osinangegö agama dalifusönia”. Imane nasa Mahkamah andre, ”Wa no si to’ölö alua da’a ba nösi nomo si lö fagölö agama, simanö göi ndra Samaduhu’ö Yehowa.” * Hewa’ae fatuwu niha ba zi no lafaduhusi tödö, ira Samaduhu’ö Yehowa la’o’ö mene-mene si so ba Zura Ni’amoni’ö ena’ö, ”Böi misulöni zi lö sökhi awönia si lö sökhi. . . . Na dali ami, ya’atulö ami ba niha fefu.”—Roma 12:17,18.

Dane-dane wa mangowalu ndra Samaduhu’ö Yehowa ha ba zi sara lala wamati khöra

Ira Samaduhu’ö Yehowa la’o’ö hadia niwa’ö ba Zura Ni’amoni’ö wa mangowalu ira ”ha ba khö Zo’aya”, ya’ia da’ö ha ba zi fagölö agama khöra. (I Korindro 7:39) Tenga ha börö me iwa’ö khöda Sura Ni’amoni’ö, hiza’i börö me sökhi lua-luania. Duma-dumania, imane artikel me döfi 2010 ba Journal of Marriage and Family (Jurnal Fangowalu hegöi zi Sambua Omo) wa si to’ölönia la’okhögö wahuwusa si sökhi na ”mangowalu zi samösa niha ba zi sara lala wamati khönia”. *

Hiza’i, lö irai lafarou ira Samaduhu’ö Yehowa ena’ö laröi wo’omora si tenga Samaduhu’ö. Imane Sura Ni’amoni’ö, ”Na so dalifusö, si so ira alawe si tenga samati, ba na edöna ndra alawe so so khönia, ba böi yamutibo’ö. Ba na so ndra alawe, si so ira matua si tenga samati, ba na edöna ndra matua so so khönia, ba böi yamuröi.” (I Korindro 7:12, 13) La’o’ö goroisa da’a ira Samaduhu’ö Yehowa.

^ par. 17 Faigi Caesar and Christ, nga’örö 647.

^ par. 18 Faigi gangetula salua khö ndra Saksi-Saksi Yehuwa Moskwa dan Yang Lainnya vs Rusia, ba nga’örö 26-27, ngenoli 111.

^ par. 20 Faigi Journal of Marriage and Family, Jilid 72, Numero 4, (Baŵa si Walu 2010), nga’örö 963.