Faigi nösi

Faigi ba menu sekunder

Samaduhu’ö Yehowa

Nias

Hadia Wa Möi Ndra Samaduhu’ö Yehowa Manuriaigö Misa ba Nomo Ena’ö Te’orifi Ira?

Hadia Wa Möi Ndra Samaduhu’ö Yehowa Manuriaigö Misa ba Nomo Ena’ö Te’orifi Ira?

Tenga. Lö adage-dage ndra’aga möi manuriaigö, hiza’i, faduhu dödöma tenga börö me no mafalua da’ö wa te’orifi ndra’aga. (Efeso 2:8) Hadia mbörö?

Fatimbaisi duma-duma da’a: Khalaigö atö samösa ndra matua ifabu’u ba niha wa ibe’e mbuala sebua böli na so zangondrasi nahia si no itatugöi ba ginötö si tefaudu. Na faduhu dödöu ba zi no ifabu’u andrö, hadia öfalua? Tatu manö! Tola göi öfatunö ba niha si fahuwu khöu ma khö ndra talifusöu zi no ifabu’u ena’ö göi latema mbuala andrö. Hewa’ae simanö, tenga da’ö geluahania ya’ugö zotatugöi buala andrö börö me no öfalua ni’andrönia. Buala andrö ha nibe’enia.

Simanö göi, faduhu dödö ndra Samaduhu’ö Yehowa wa’auri si lö aetu si no ifabu’u Lowalangi ba niha solo’ö niwaönia. (Roma 6:23) Ma’odödögö wangombakha ba niha zifaduhu dödöma andre, ena’ö göi latema howu-howu andrö moroi khö Lowalangi. Hiza’i, tenga me no möiga manuriaigö, hasambalö sa’e te’orifi ndra’aga. (Roma 1:17; 3:28) Sindruhunia, gofu hadia nifaluada, tenga sinangea ita wanema howu-howu sahöli-höli dödö moroi khö Lowalangi. ”I’orifi ita, tenga moroi ba mbua-mbuada, ba wa’atulö dödö, balazi wa’ahakhö dödönia andrö.”—Tito 3:5.