Lö’ö. Ira Samaduhu’ö Yehowa faduhu dödöra wa fefu hadia ia oi nifazökhi Lowalangi. Hiza’i, fao dödöma ba kreasionisme. Hadia mbörö? Börö me so wamaha’ö kreasionisme si fabö’ö moroi ba wamaha’ö Zura Ni’amoni’ö. Faigi duma-dumania:

  1. Fa’ara ngaluo wamazökhi. Molo’ö niha sifaduhu tödö ba kreasionisme, si önö ngaluo wamazökhi niwa’ö ba Zura Ni’amoni’ö sindruhu-ndruhu önö kali 24 za. Hiza’i, bakha ba Zura Ni’amoni’ö, eluaha ’ngaluo’ tola da’ö geluahania inötö sara sibai.I Moze 2:4; Zinunö 90:4.

  2. Fa’ara gulidanö. Lamane ira sifaduhu tödö ba kreasionisme fa’ara gulidanö andre awena ha’uga ribu fakhe. Sindruhunia, molo’ö Sura Ni’amoni’ö, ulidanö awö mbanua no so i’otarai fatua lö si önö ngaluo wamazökhi. (I Moze 1:1) Börö da’ö, ira Samaduhu’ö Yehowa lö fabu’a-bu’a ira wa ulidanö andre tola manö miliaran fakhe wa’ara.

Hewa’ae na ya’aga, Samaduhu’ö Yehowa, faduhu dödöma fefu hadia ia oi niwöwöi Lowalangi, fatuwu ndra’aga ba ilmu pengetahuan ilmiah. Faduhu dödöma Sura Ni’amoni’ö sindruhunia tefaudu ba sains.