Faigi nösi

Faigi ba menu sekunder

Samaduhu’ö Yehowa

Nias

Hadia So Mbuku Ni’amoni’ö Ndra Samaduhu’ö Yehowa?

Hadia So Mbuku Ni’amoni’ö Ndra Samaduhu’ö Yehowa?

Oya Zura Ni’amoni’ö si no mufo’eluaha ni’oguna’ö ndra Samaduhu’ö Yehowa ena’ö lasöndra wa’aboto ba dödö. Hewa’ae simanö, na no tehenaigö Kitab Suci Terjemahan Dunia Baru ba li ni’oguna’öma, da’ö zabölö ma’oguna’ö börö me no tesura döi Lowalangi, tefaudu nösinia, ba alio aboto ba dödö zombaso.

  • No musura döi Lowalangi. Oya zamazökhi Sura Ni’amoni’ö si lö mamosumange Same’e Bua Gera-era Zura Ni’amoni’ö. Duma-dumania, so Zura Ni’amoni’ö si no lafazökhi lasura 70 döi niha samo’eluaha ya’ia. Hiza’i, lö lasura döi Zame’e Ösi mbuku andrö sotöi Lowalangi Yehowa!

    Sura Ni’amoni’ö Terjemahan Dunia Baru faehu ia moroi ba mbuku tanö bö’ö, börö me no tesura ngahönö döi Lowalangi molo’ö naskah si oföna. Hewa’ae so niha solului ba wamo’eluaha ya’ia, lö lasura döira.

  • Tefaudu. Lö fefu nösi Zura Ni’amoni’ö si no mufo’eluaha tefaudu wanura ya’ia molo’ö naskah si oföna. Duma-dumania, so zamo’eluaha Matai’o 23:15 simane da’a, ”Alai ami, sangila amakhoita ba farizai’o, samini tödö! Me no sanöröi asi, awö danö, ami, ba wamali’ö solo’ö huku khömi samösa niha, ba na no i’o’ö, ba mibali’ö ono narako, mendrua manö na sa moroi khömi.” Sindruhunia, ngawua wehede si no tesura ba teks si oföna ya’ia da’ö ”Gehena [eluahania ’Lembah Hinom’]”, tenga ”narako”. Nahia Lembah Hinom andre ahatö ba Yeruzalema. Mu’oguna’ö ia ba wanunu sasao. I’oguna’ö ngawua wehede Gehena andre Yesu ba wo’amaedolagö fanguhuku moroi khö Lowalangi. Te andrö wa lafo’eluaha ngawua wehede ”narako” ira samo’eluaha, börö me faduhu dödöra wa tehuku niha si lö sökhi ba galitö narako sagötö fa’ara. Sindruhunia, tenga da’ö niwa’ö Zura Ni’amoni’ö. Imane Zura Ni’amoni’ö Terjemahan Dunia Baru, ”Alai ami, sangila amakhoita, ba farizai’o, samini tödö! Me no sanöröi asi, awö danö, ami, ba wamali’ö solo’ö huku khömi samösa niha, ba na no i’o’ö, ba mibali’ö ono Ndraso Hinomo, mendrua manö na sa moroi khömi.”

  • Alio aboto ba dödöda. Nifotöi famo’eluaha si sökhi, tenga ha asala tefaudu nösinia, hiza’i moguna göi alio aboto ba dödö niha sombaso. Datafaigi sambua duma-dumania ba Matai’o 5:3, so wehede ni’oguna’ö Yesu ya’ia da’ö, ”Ya’ahowu zi numana tödö.” Tola manö ambö mu’ila geluaha ngawua wehede andrö. Börö da’ö, ibotokhi khöda Sura Ni’amoni’ö Terjemahan Dunia Baru wa eluaha wehede Yesu andrö ya’ia da’ö ”so’onorogö tödö gö ba wamati”.

Ba Zura Ni’amoni’ö Terjemahan Dunia Baru no tesura döi Lowalangi, tefaudu nösinia, ba alio aboto ba dödöda. Baero da’ö, so zabölö adöni dödöda nasa ya’ia da’ö, lö la’andrö mböli na mube’e ba niha. Hadia mbuania? Töra hauga zuta niha si tola mombaso Sura Ni’amoni’ö ba li ni’ilara, farahu ba da’ö niha si tebai mowoli Sura Ni’amoni’ö.