Faigi nösi

Faigi ba menu sekunder

Samaduhu’ö Yehowa

Nias

Hadia So Goi-Goi khö Ndra Samaduhu’ö Yehowa Na Omasi Ira Fakawa?

Hadia So Goi-Goi khö Ndra Samaduhu’ö Yehowa Na Omasi Ira Fakawa?

So. Hiza’i, tenga ira Samaduhu’ö Yehowa zame’e goi-goi andrö. La’o’ö fefu goi-goi hegöi fanuturu lala si so ba Zura Ni’amoni’ö si tobali fanolo ba wangai angetula si sökhi, si tefaudu ba zomasi Lowalangi. (Yesaya 48:17, 18) So goi-goi sanandrösa ba niha si fakawa si tola ta’angeraigö. *

  • Fangowalu no famaböbö sandrohu fa’auri. (Matai’o 19:6) Na khö ndra Samaduhu’ö Yehowa, tenga famai-mai nifotöi fakawa. Da’ö no sambua lala ba wogamö fangowalu.

  • Niha si fakawa ena’ö si no ibönö döfi hegöi fangera-ngera ba wogamö fangowalu. Eluahania, no ’latalu’i ginötö wame’e ya’ia’, mazui no latalui ginötö wa’ebua hokhara same’e fasala gangetula nihalöra.I Korindro 7:36.

  • Niha si no mangowalu tebai fakawa ba niha bö’ö. Hewa’ae no fabali zi darua niha molo’ö goi-goi nibe’e ndra samatörö, hiza’i na tenga börö wohorö, tebai ifuli mangowalu ira ba niha bö’ö börö me lö fao dödö Lowalangi.Matai’o 19:9..

  • Ha ba zi sara lala famati tola mangowalu niha Keriso. (I Korindro 7:39) Niha si sara lala ba wamati andre tenga da’ö geluahania niha sangosinangegö famatima. Eluahania sa, ha Samaduhu’ö Yehowa si no mubayagö idanö, si fao ba wanuriaigö, ba samalua goi-goi Zura Ni’amoni’ö ba wa’aurira. (II Korindro 6:14) I’otarai meföna, no ibe’e Lowalangi goroisa ba nono mbanuania ena’ö mangowalu ira ha ba zi sara lala famati khöra. (I Moze 24:3; Maleakhi 2:11) Irugi iada’a, lö si tebulö goroisa andrö. *

  • Moguna lafosumange zatuara iraono. (Gamaedola 1:8; Kolose 3:20) Iraono si toröi nasa ba ngai zatua moguna la’o’ö goi-goi nibe’e zatuara na omasi ira fakawa. Duma-dumania, hadia manö zi tola lafalua na fakawa ira hegöi hauga fakhe ndröfira awena tola fakawa.

  • Na so samösa Zamaduhu’ö Yehowa somasi fakawa, ya’ia zotatugöi ha’ökhö ba hawa’ara fakawa ia, asala tefaudu ba goi-goi Zura Ni’amoni’ö. Tefaudu da’a ba niwa’ö Zura Ni’amoni’ö, ”Ilu’i-lu’i sa noronia zamösana.” (Galatia 6:5) Hewa’ae simanö, niha satua-tua la’andrö wanuturu lala khö ndra Samaduhu’ö Yehowa si no irai manörö da’a hegöi saro ba wamati.Gamaedola 1:5.

  • Asese lafalua gamuata si lö baga niha si fakawa. Duma-dumania, no itegu ita Sura Ni’amoni’ö ena’ö böi tafalua gamuata wohorö, tenga ha fohorö ba gotalua zi darua niha si lö sangowalu, tobali na faoma labaya-baya zaila nawöra, seks oral, mazui seks anal. (I Korindro 6:9-11) Ogoro Lowalangi na so niha samalua gamuata simane da’ö. (Galatia 5:19-21) I’elifi göi Sura Ni’amoni’ö niha sanguma’ö ”fehede hokha”.Kolose 3:8, NW.

  • No tefuyu dödö niha. (Yeremia 17:9) So niha samalua amuata si fasala hewa’ae so khönia wa’aboto ba dödö. Ena’ö böi alua zi lö sökhi, abölö baga na lö fao ira daru-darua ba nahia si lö niha-niha ena’ö lö adöni dödöra ba wamalua horö. (Gamaedola 28:26) Motöi niha Keriso, lö la’alu-alu’i ba Internet haniha zinangea tobali fo’omora, börö me oya zi tobali te’ala.Zinunö 26:4.

^ par. 2 Itaria ba zi sambua mbanua no to’ölö nifotöi fakawa. Hiza’i, so göi zi lö’ö. Lö irai iwa’ö Sura Ni’amoni’ö wa moguna nifotöi fakawa mazui da’ö no sambua lala ena’ö tola mangowalu.

^ par. 6 Duma-dumania, so duho moroi ba mbuku Marriage & Family Review zanguma’ö ”ena’ö aro zi sambua ngambatö moguna mangowalu ira ba zi sara lala famati (i’otarai 25 irugi töra 50 fakhe)”.—Volume 38, edisi 1, nga’örö 88 (2005).