Faigi nösi

Faigi ba menu sekunder

Samaduhu’ö Yehowa

Nias

Hadia Sambua Kultus Ndra Samaduhu’ö Yehowa?

Hadia Sambua Kultus Ndra Samaduhu’ö Yehowa?

Tenga, ira Samaduhu’ö Yehowa tenga sambua kultus. Hiza’i, ya’aga niha Keriso ma’odödögö wamalua duma-duma nibe’e Yesu Keriso ba mafalua zi no ifaha’ö.

Hadia geluahania kultus?

Oya wehede niha sanandrösa ba geluaha ”kultus”. Hiza’i, so dombua geluaha ”kultus” sasese lawa’ö niha, ba lö tefarahu ndra’aga ba zi dombua da’a.

  • So zanguma’ö, kultus eluahania nifaduhusi tödö mazui agama sawena lafasindro. Samaduhu’ö Yehowa tenga agama sawena lafasindro. Hiza’i, ma’o’ö duma-duma wamosumange Lowalangi nifalua niha Keriso si föföna. No tesura bakha ba Zura Ni’amoni’ö hewisa wamosumangera Lowalangi hegöi famaha’öra. (II Timoteo 3:16, 17) Ma’o’ö duma-duma nibe’e bakha ba Zura Ni’amoni’ö, börö me faduhu dödöma da’ö lala satulö ba wamosumange Lowalangi.

  • So göi zanguma’ö, kultus ya’ia da’ö sekte sata’u ita nidönia’ö zi samösa niha. Ya’aga, Samaduhu’ö Yehowa, lö mabali’ö sondrönia’ö zi samösa niha. Hiza’i, ma’o’ö niwa’ö Yesu khö ndra nifaha’önia, ”Ha samösa Zolohe ya’ami, Keriso.”Matai’o 23:10.

Ira Samaduhu’ö Yehowa atulö wa tebai tafaomagö ira ba kultus sata’u ita, börö me mafalua goi-goi simöi fanga’azökhi, he ya’aga samösa hegöi ba niha sato. Duma-dumania, matolo niha ena’ö laböhöli gamuata simöi famakiko, simane famadu-madu tuo ba fangoguna’ö narkoba. Mafalua wamaha’ö niha ba wombaso ba fanura ba zi sagörö ulidanö. Mabe’e göi wanolo ba zigöna abula dödö duma-dumania duru danö. Ma’odödögö sibai wamalua si sökhi ba niha fefu simane nifaha’ö Yesu.Matai’o 5:13-16.