Faigi nösi

Faigi ba menu sekunder

Samaduhu’ö Yehowa

Nias

Hana Wa Lö La’owasaini Mbaŵa Wa’atumbu Ira Samaduhu’ö Yehowa?

Hana Wa Lö La’owasaini Mbaŵa Wa’atumbu Ira Samaduhu’ö Yehowa?

Lö la’owasaini mbaŵa wa’atumbu ira Samaduhu’ö Yehowa, börö me faduhu dödöma wa lö omasi Lowalangi ba gowasa andrö. Hewa’ae lö niwa’ö ba Zura Ni’amoni’ö wa tebai la’owasaini mbaŵa wa’atumbu, hiza’i so zinangea ta’angeraigö. So öfa waö-waö zi no irai alua nitutunö ba Zura Ni’amoni’ö hegöi goi-goi si tola ö’angeraigö.

  1. Fangowasaini baŵa wa’atumbu tehalö moroi ba wamaha’ö niha baero. Molo’ö buku Funk & Wagnalls Standard Dictionary of Folklore, Mythology, and Legend, mufalua gowasa andre börö me faduhu dödö niha wa ba ginötö wanörö tödö baŵa wa’atumbura, ”tola ifakao ira bekhu” ba ”na tohare ndra awö-awönia wama’ema fehede famahowu’ö, tola telumö’ö ia.” Molo’ö buku The Lore of Birthdays, meföna, mutöngöni sibai mbaŵa wa’atumbu andrö ”börö mu’oguna’ö ia ba wokhalaigö fozu wa’auri niha molo’ö ilmu perbintangan.” Imane nasa mbuku da’ö wa molo’ö zi faduhu dödö niha meföna, so wa’abölö si otarai ba mbekhu ba lili ni’oguna’ö ba wo’owasaini mbaŵa wa’atumbu, ena’ö tefondro-ndrongo wangandrö niha da’ö.”

    Hiza’i, i’elifi Sura Ni’amoni’ö niha sanahö lawuo, samaigi su’a danga, si fakelemu mazui ”tanö bö’önia”. (V Moze 18:14, NW; Galatia 5:19-21) Andrö wa ihuku Mbabeli meföna Lowalangi börö me la’oguna’ö ilmu perbintangan ba wama’ele’ö. (Yesaya 47:11-15) Lö la’alu-alui ira Samaduhu’ö Yehowa hezo moroi mböröta gowasa sasese lafalu niha. Hiza’i, lö ma’osilö’ögö na so wanuturu lala si tefaudu moroi ba Zura Ni’amoni’ö.

  2. Lö la’owasaini mbaŵa wa’atumbura niha Keriso si föföna. Imane buku The World Book Encyclopedia wa ”fangowasaini mbaŵa wa’atumbu no famaha’ö moroi ba niha baero”. Ifatunö khöda Sura Ni’amoni’ö wa fefu niha Keriso moguna la’o’ö duma-duma nibe’e ndra nifaha’ö, börö me Yesu zamaha’ö ya’ira.II Tesalonika 3:6.

  3. Ha sambua ni’owasaini niha Keriso, ya’ia da’ö fa’amate Yesu, tenga baŵa wa’atumbunia. (Luka 22:17-20) Imane Sura Ni’amoni’ö wa ”sökhi mbaŵa wa’amate, moroi ba mbaŵa wa’atumbu”. (Zangombakha 7:1) Me mate Yesu, no tohude döinia föna Lowalangi. Andrö wa abölö sökhi mbaŵa wa’amatenia moroi ba mbaŵa wa’atumbunia.Heberai’o 1:4.

  4. Lö nisura Zura Ni’amoni’ö wa so nono mbanua Lowalangi sangowasaini mbaŵa wa’atumbura. Tobali, nitutunö Zura Ni’amoni’ö ya’ia da’ö so dombua fangowasaini mbaŵa wa’atumbu nifalua niha si lö mamosumange Lowalangi. Fefu nifaluara andrö lö tefaudu.I Moze 40:20-22; Mareko 6:21-29.

Hadia afatö dödö ndraono Samaduhu’ö Yehowa börö me lö la’owasaini mbaŵa wa’atumbura?

La’omasi’ö ndraonora ira Samaduhu’ö Yehowa, simane satua bö’ö. Labe’e mbuala hegöi inötöra ena’ö fao ira khö ndraonora. La’o’ö duma-duma nibe’e Lowalangi, same’e zi sökhi ba ndraononia gofu hawa’ara manö. (Matai’o 7:11) Andrö, lö afatö dödö ndraono Samaduhu’ö Yehowa. Lamane wanguma’ö:

  • ”Omuso sibai dödögu na labe’e khögu mbuala ba ginötö si lö udöna-döna.”—Tammy, 12 fakhe.

  • ”Lö hadöi same’e mbuala khögu ba ginötö baŵa wa’atumbugu börö me lö u’owasaini ia. Hiza’i, labe’e khögu mbuala ira satuagu ba ginötö bö’ö. Omuso sibai dödögu börö me labe’e ba ginötö si lö udöna-döna.”—Gregory, 11 fakhe.

  • ”Molo’ö ya’ugö, hadia no sambua owasa na so kue ba sinunö? Ae’e ba nomogu na omasi’ö ö’ila hewisa zindruhunia nifotöi owasa andrö!”—Eric, 6 fakhe.