Faigi nösi

Faigi ba menu sekunder

Faigi ba gangolifa

Samaduhu’ö Yehowa

Nias

Manuriaigö  |  No. 1 2017

 TUHO SI OFÖNA | TEMA MBUA MOROI BA WOMBASO SURA NI’AMONI’Ö

Hewisa Ena’ö Tola So Wa’adöni Dödö?

Hewisa Ena’ö Tola So Wa’adöni Dödö?

Aföli? Mazui tobali fangomuso dödö? Hewisa molo’ö ya’ugö wombaso Zura Ni’amoni’ö andrö? Te’odaligö fefu da’ö molo’ö hewisa wombasou ya’ia. Datafaigi hewisa ena’ö itugu adöni dödöu hegöi wa’omasiu.

Fili wamo’eluaha si tola mu’odaligö ba salio mu’ila eluaha. Lö khöu fa’omuso dödö ba wombaso na lö aboto ba dödöu nibasou mazui na fehede me föna ni’oguna’ö si lö ö’ila eluaha. Alui Zura Ni’amoni’ö zangoguna’ö ngawua wehede salio mu’ila eluaha zi tola fagöna ba dödöu. Hewa’ae simanö, moguna ötatugöi ena’ö atulö ba tefaudu wamo’eluaha ya’ia. *

Oguna’ö teknologi. Iada’a tenga ha ba mbuku tercetak tehenaigö Zura Ni’amoni’ö hiza’i so göi ia ba bentuk elektronik. So ösa Zura Ni’amoni’ö si tola mubaso ba Internet mazui mu-download ba komputer, tablet, mazui ba HP ena’ö tola öbaso samösa. So göi aplikasi tanö bö’ö si tola manolo ya’ugö, ena’ö tola alio ösöndra ayati Zura Ni’amoni’ö tanö bö’ö ba duho si fagölö mazui tobali fanolo khöu ba wofatimbaisi famo’eluaha tanö bö’ö. Na abölö omasi ndra’ugö wamondro-ndrongo moroi ba wombaso, tehenaigö göi Zura Ni’amoni’ö si no larekam. Ato niha sabölö omasi mamondro-ndrongo na ba wofanö-fanö, manasa, mazui na lahalöwögöigö hadia ia zi tola mame’e aoha khöra ba wamondro-ndrongo. Hana wa lö ötandraigö lala sabölö tefaudu ö’oguna’ö?

Oguna’ö ngawalö fakake ba wamaha’ö Zura Ni’amoni’ö. Fakake ba wamaha’ö ba Zura Ni’amoni’ö tola tobali fanolo khöu ena’ö tola ösöndra wamaha’ö  moroi ba nibasou andrö. So peta danö Zura Ni’amoni’ö, si tola manolo ya’ugö ena’ö ö’ila hezo so gamaudu alua nibasou andrö ba ökhalaigö hadia zalua. Artikel simane si so ba majalah andre mazui ba faosatö ”Ajaran Alkitab” si so ba situs Web jw.org/id, tola tobali fanolo khöu ena’ö aboto ba dödöu nösi Zura Ni’amoni’ö.

Fabö’ö-bö’öni lala ni’oguna’öu. Na abua khöu wombaso Sura Ni’amoni’ö i’otarai ba wamobörö irugi awai, hana wa lö ö’alui zi tola mame’e khöu fa’adöni dödö simane na ö’alui duho-tuho zomasi’ö? Na omasi’ö oya ö’ila niha si tehöngö ba Zura Ni’amoni’ö, tola ötandraigö öbaso ia. So duma-duma si so ba kotak ” Dou’ö ba Wangi’ila Niha si So ba Zura Ni’amoni’ö”. Mazui tola öbaso Zura Ni’amoni’ö molo’ö tuho hegöi waö-waö salua. Hana wa lö ötandraigö öfalua fasambua moroi ba zi so ba kotak andrö?

^ par. 4 Ato zi no motandraigö wa Kitab Suci Terjemahan Dunia Baru tola nifaduhusi tödö, tefaudu, ba aoha wombaso ya’ia. Sura Ni’amoni’ö da’a nifazökhi ndra Samaduhu’ö Yehowa, ba tehenaigö ia ba zi töra 130 ngawalö li. Tola ö-download ia moroi ba jw.org mazui ö-download aplikasi JW Library. Mazui na omasi’ö, tola lafasao khöu ba nomo ira Samaduhu’ö Yehowa.