Faigi nösi

Faigi ba menu sekunder

Faigi ba gangolifa

Samaduhu’ö Yehowa

Nias

Manuriaigö  |  No. 1 2017

 O’Ö WAMATIRA | KHENOKI

”No Somasi Lowalangi Ia”

”No Somasi Lowalangi Ia”

ANAU noso Khenoki. Tola manö abua khöda wokhalaigö, hiza’i fa’anau nosonia 365 fakhe, töra öfa kali moroi ba wa’anau noso niha zi to’ölönia iada’a! Hiza’i ba götönia lö atua sibai ia. Töra 50 abad silalö, abölö anau noso niha ba götö da’ö moroi na iada’a. Töra önö ngaotu fakhe ndröfi Gadamo, niha si föföna, me tumbu Khenoki, ba auri Gadamo nasa irugi tölu abad! So ösa zi töra moroi ba da’ö wa’anau noso nga’ötö Gadamo. Me 365 fakhe ndröfi Khenoki, lö atua sibai ia ba oya zi tola ifalua nasa. Hiza’i tebai ifalua da’ö fefu.

So zi tobali fama’ala khö Khenoki. Khalaigö, ibini’ö ia moroi ba niha si lö omasi manema turia nifa’emania moroi khö Lowalangi. Oroma ba zikhala mbawara wa mofönu ira. Ba fatuwu ira khönia. Fatuwu ira ba duria nifa’emania hegöi khö Lowalangi samatenge ya’ia. Lö la’ila lafa’ala Lowalangi Khenoki sotöi Yehowa, hiza’i tola lafa’ala ia! Tola manö manofu-nofu Khenoki hadia tola nasa falukha ia khö zoroi yomonia. Hadia i’angera-ngeraigö wo’omonia ba ononia alawe hegöi ononia matua, Metusala mazui ma’uwunia Lameki? (I Moze 5:21-23, 25) Hadia no amozuania fefu da’a?

Niha sambö tehönge Khenoki ba Zura Ni’amoni’ö. Ha tölu mbuku si so ba Zura Ni’amoni’ö sanutunö waö-waönia. (I Moze 5:21-24; Heberai’o 11:5; Yuda 14, 15) Hewa’ae simanö, tola itutunö ayati andrö hewisa wa’ebua wamatinia. Hadia samösa högö ndra’ugö yomo ba nomo? Hadia no irai ötema wanandraigö ba wango’awögö sindruhu andrö si no mi’ila? Na simanö, oya zi tola mifaha’ö ami moroi ba wamati Khenoki.

’LÖ SAEFA-AEFA KHENOKI KHÖ LOWALANGI BA LALANIA’

No fondrege wa’alösökhi niha me tumbu Khenoki. Alua da’ö ba nga’ötö Gadamo si mewitu. Ahatö nasa Niha ba götö da’ö ba wo’ahonoa simane si no irai la’okhögö ira Adamo ba Khawa. Da’ö mbörö wa tola simane da’ö wa’anau nosora. Hiza’i, lö sökhi gamuatara ba lö khöra fa’alowalangi. No to’ölö alua wa’alösökhi. Fa’alö sökhi da’a tebörögö ba nga’ötö si mendrua, ya’ia da’ö me ibunu Ka’ino dalifusönia Habeli. Fasamösa moroi ba nga’ötö Ka’ino zangokhögö fayawasa, fa’alösökhi hegöi fahö’ösania si töra moroi khö Ka’ino! Ba nga’ötö si tölu, so wa’alösökhi sawena. Ibörötaigö la’angöröfili döi Yehowa, hiza’i tenga ba wamosumange ya’ia. La’oguna’ö döi Lowalangi ba wangelifi, lö khöra famosumange.I Moze 4:8, 23-26.

No to’ölö wamosumenge si lö sökhi me götö Khenoki. Me itugu ebua-bua Khenoki, moguna ihalö gangetula. Hadia ifaogö-faogö ia khöra? Mazui i’alui Lowalangi sindruhu, sotöi Yehowa, samazökhi sorugo hegöi ulidanö? Tobali famarou dödönia me i’angerönusi duma-duma Habeli si no mate börö wamosumangenia Yehowa. Ihalö gangetula Khenoki ba wolo’ö Habeli. Imane ba  I Moze 5:22, ”Lö aefa-aefa khönia Lowalangi ba döröwania.” Ngawua wehede da’ö zangoroma’ö wa niha si sökhi Khenoki hewa’ae so ia ba gulidanö si lö sökhi. Ya’ia niha si oföna nitötöi Zura Ni’amoni’ö simane da’ö.

Ba ayati da’ö göi iwa’ö wa lö aefa-aefa ba döröwa Khenoki Yehowa hewa’ae no tobali ia ama khö Metusala. Tobali, mongambatö Khenoki me 65 fakhe ndröfinia. Lö nisura Zura Ni’amoni’ö haniha döi wo’omonia, hegöi hadauga fefu nononia ”ono matua ba ono alawe”. Na ifalua zomasi Lowalangi samösa ama, tatu manö wa irorogö zoroi yomonia molo’ö somasi Lowalangi. Aboto ba dödö Khenoki wa omasi Yehowa na lö faröi ia khö wo’omonia. (I Moze 2:24) Tatu manö ifalua zabölö sökhi ba wamaha’ö iraononia sanandrösa khö Lowalangi Yehowa. Hadia mbuania?

Lö izara-zara Sura Ni’amoni’ö wanutunö da’ö. Lö musura waö-waö nono Khenoki sotöi Metusala, fondrege zanau noso molo’ö Sura Ni’amoni’ö, simate me götö anönö danö idanö. Hiza’i, so nono Metusala, töinia Lameki. Tola i’ila nasa Lameki tua Khenoki irugi töra otu fakhe. Tobali niha samati Lameki. I’oguna’ö ia Yehowa ba wama’ele’ö sanandrösa khö Noakhi, ono Lameki, ba alua da’ö. Lö aefa-aefa ba döröwa Noakhi Lowalangi simane tuania Khenoki. Lö irai falukha Noakhi khö Khenoki. Hiza’i iröi gokhöta sebua böli Khenoki. Tola manö ifaha’ö ia Noakhi ba duma-duma si sökhi moroi khö namania Lameki, mazui moroi khö duania Metusala, mazui moroi khö Yaredi, ama Khenoki si mate me 366 fakhe ndröfi Noakhi.I Moze 5:25-29; 6:9; 9:1.

Faehu sibai ira Khenoki Gadamo. Hewa’ae mo’ahonoa Gadamo, hiza’i ifalua horö ba iröi gondröita folawa hegöi fa’abu dödö ba nga’ötönia. Tobali, hewa’ae lö mo’ahonoa Khenoki, itörö lala Lowalangi ba gondröitania ya’ia da’ö famati. Mate Gadamo me 308 fakhe ndröfi Khenoki. Hadia abu dödö zoroi yomonia me mate wurugö sangofönai’ö fangalui tana khönia andrö? Lö ta’ila. Gofu hadia ia zalua khö Khenoki ”lö saefa-aefa khönia Lowalangi ba lalania”.I Moze 5:24.

Angeraigö hadia zi tola mihalö famaha’ö moroi ba wamati Khenoki ya’ami si tobali högö yomo ba nomo. Hewa’ae moguna mibönökhi zoguna ba mboto khö zoroi yomomi, hiza’i sabölö moguna ya’ia da’ö mibönökhi göi zoguna ba wamati. (I Timoteo 5:8) Tenga ha ba wehede, hiza’i ena’ö oroma ia ba nifaluami. Na mi’o’ö Khenoki, mitehegö Daromali Lowalangi si tobali sanuturu lala khömi, no miröi göi gondröita duma-duma sebua böli si tola mu’o’ö.

”IFA’ELE’Ö HEWISA IRA KHENOKI”

Tatu manö so ba dödö Khenoki wa hulö zi ha samösa-mösa ia ba gulidanö si lö sökhi simane da’ö. Tobali, hadia i’ila Lowalangi Yehowa zalua khönia? Tatu manö. No inötönia fahuhuo Yehowa khö genoninia si lö faröi andre. Ibe’e Lowalangi khö Khenoki duria si lö tola lö ifatunö ba niha ba götönia. Molo’ö Sura Ni’amoni’ö, Khenoki zi  föföna tobali sama’ele’ö nituyu Lowalangi. Tola ta’ila da’a moroi khö Yuda, talifusö tiri Yesu, si no manema eheha ba wanura fama’ele’ö Khenoki ngaotu fakhe aefa da’ö. *

Hadia nösi wama’ele’ö Khenoki? Ya’ia da’ö, ”Hiza, möi Zo’aya, awö ngafulu ngahönö ni’amoni’ö andrö khönia, ba wanguhuku fefu, haniha ira, ba ba wangotu’ö fefu zi no mangerogö Lowalangi, ba khöra andrö, ba mbua-buara andrö fefu, falösökhi andrö, nifa’uara, ba ba wehede safaito, fefu, nilau zanao horö andrö, si no mangerogö Lowalangi, khönia.” (Yuda 14, 15) Iada’a, si föföna sibai nehegö ua, tola manö bentuk lampau ni’oguna’ö Khenoki ba wahuhuosa, hulö zi no ifalua Lowalangi nifa’ele’ö da’ö. La’o’ö duma-duma da’ö ira sama’ele’ö tanö bö’ö ba wama’ema fama’ele’ö. Rahu-rahunia: Fahuhuo zama’ele’ö sanandrösa ba ngawalö hadia ia si no tatu wa’alua irege alua simane da’ö!Yesaya 46:10.

Lö fa’ata’u khö Khenoki ba wama’ema turia moroi khö Lowalangi ba niha si lö sökhi

Hadia nirasoi Khenoki me ifa’ema wehede da’ö khö ndra sedöna mamondro-ndrongo? Tola ö’ila hewisa wa’abe’e wamangelamania. Fehede ”mangerogö”, ”falösökhi”, ba ”safaito” mu’oguana’ö ia ba wanegu niha sanandrösa ba nifaluara, hegöi hewisa wamaluara hadia ia. Fama’ele’ö da’ö göi zame’e famangelama ba niha fefu wa i’otarai me lafofanö niha si föföna moroi ba Gedena, itugu lö sökhi gulidanö. Te’asiwai da’ö fefu dania na tohare Yehowa awö ”ngafulu ngahönö ni’amoni’ö andrö khönia” ya’ia da’ö ira mala’ikania sagabölö. Lö fa’ata’u khö Khenoki ba wama’ema famangelama da’ö hewa’ae na ha samösa-mösa ia! Tola manö inehe-nehegö ia Lameki sawuyu-wuyuna, ahöli dödönia me lö fa’ata’u khö duania andrö. Tobali, tola ta’ila hadia mbörö wa lö hadöi khönia fa’ata’u.

Famati Khenoki zamarou tödöda ba wamaigi ulidanö andre simane wamaigi Lowalangi. Fanguhuku nifa’ema Khenoki si lö fa’ata’u moguna nasa ba gulidanö iada’a. Simane wamangelama nibe’e Khenoki, Inönöi Danö Idanö Yehowa ba niha si lö sökhi me götö Noakhi. Fangohori da’ö tobali duma-duma ba wangohori sabölö ebua salua dania ba zi so föna. (Matai’o 24:38, 39; II Fetero 2:4-6) Iada’a, no ihenaigö ia Lowalangi awö ngahönö mala’ika ni’amoni’ö andrö khönia ba wanguhuku ulidanö si lö sökhi andre hulö simane nifaluania me föna. Moguna ta’ame’egö tödö wamangelama nibe’e Khenoki ba tafatunö ba niha bö’ö. Tola manö aröu khöda zi fahuwu khöda mazui talifusöda ba wa’aniha. Itaria hulö zi ha samösa-mösa ita. Hiza’i lö niröi Yehowa Khenoki; lö göi iröi nono mbanuania si lö faröi iada’a!

”TEHETA KHENOKI, FA LÖ I’ILA WA’AMATE”

Hewisa wa’amate Khenoki? Abölö manofu-nofu niha ba wa’amatenia moroi ba waö-waö wa’aurinia. Imane buku I Moze, ”Ba me no lö saefa-aefa khönia Lowalangi ba lalania, ba samuza ma’ökhö, ba taya manö ia, noa sa iheta Lowalangi.” (I Moze 5:24) Hewisa woheta Lowalangi Khenoki? Imane sinenge sotöi Faulo, ”Moroi ba wamati, wa teheta Khenoki, fa lö i’ila wa’amate, ba lö lasöndra ia, me no iheta ia Lowalangi; föna wangeheta ya’ia sa’ae tefaduhu’ö ia, wa no somasi Lowalangi ia.” (Heberai’o 11:5) Hadia geluaha ”teheta Khenoki, fa lö i’ila wa’amate”? So ösa famo’eluaha Sura Ni’amoni’ö sanguma’ö wa mu’ohe Khenoki ba zorugo. Tatu, lö duhu da’ö. Sura  Ni’amoni’ö zanguma’ö wa Yesu zi oföna nisusugi ba we’amöi ba zorugo.Yohane 3:13.

Na simanö, hadia geluaha ”teheta” ena’ö lö ”i’ila wa’amate”? Ba zi lö i’ila Khenoki, tola manö iheta ia Yehowa moroi ba wa’auri tobali mate, ena’ö lö irasoi ha wa’afökhö wa’amate. Hiza’i, si föföna sibai ua ”tefaduhu’ö ia, wa no somasi Lowalangi ia”. Hewisa lalania? Tola manö, fatua lö mate itema gangilata Khenoki, te sanandrösa ba waradaiso. Ba gangilata da’ö teforoma’ö wa i’omasi’ö ia Lowalangi, ba mate Khenoki. Me isura Faulo sanandrösa khö Khenoki hegöi niha si lö faröi tanö bö’ö, imane wanguma’ö, ”Ba wa’amate da’ö fefu, ba dali wamati.” (Heberai’o 11:13) Tola manö la’alui mboto Khenoki me no mate ia ira nudunia ”ba lö lasöndra ia”, te no iheta Yehowa ena’ö lö la’oguna’ö mbotonia ba zi lö tefaudu mazui ba wamazaewe famosumange sofaya. *

Moroi ba ayati da’ö, tola ta’angerönusi hadia zalua me aetu noso Khenoki. Tola manö da’a wamakhala si tola takhalaigö. Ba wagohisa so Khenoki, marase ia. Lagohi ia ira udunia börö duria fanguhuku andrö khönia. Isöndra nahia mbini-bini ba molombase ia sabata, tobali i’ila wa alio ara hasambalö lasöndra ia. Ba mbalö doho so nosonia iada’a. Ba wolombasenia ilau mangandrö. Ba isöndra wa’ahono dödö. Itema gangilata Khenoki ba hulö zi no so ia ba gangilata da’ö.

Börö me tola manö te’ala wa’auri Khenoki, da’ö mbörö wa iheta ia Lowalangi

Khalaigö, so gulidanö si fabö’ö föna duduma hörö Khenoki. Hulö wa’asökhi Kabu Faradaiso da’ö ba hörönia, ba lö hadöi kerubi zanaisi niha we’amöi ba da’ö. Ato ndra matua hegöi ira alawe si lö fökhö ba sawuyu-wuyu zi so ba da’ö. Afönu fa’ohau-hau dödö wa’aurira. Lö hadöi fatuwusa, ba lö tefakao niha samosumange Lowalangi simane ya’ia. Irasoi samösa Khenoki hewisa wa’aro mbu’usa li, fa’omasi hegöi fo’ame’egö tödö Yehowa ia. Faduhu dödö Khenoki wa da’a nahiania; hasambalö toröi ia ba da’a. Börö me lö aetu-aetu irasoi wa’ahono dödö, ifakifu hörönia Khenoki, ilau mörö ba lö fangifi.

Simörö ba wa’amate nasa Khenoki iada’a. Sambalö nitörö tödö Yehowa ia! Simane nifabu’u Yesu wa so dania ginötö khöra nitörö tödö Yehowa andrö ba larongo li Yesu ba möi ira baero ba lewatö, ba hasambalö la’ila gulidanö si bohou si sökhi ba safönu fa’ohau-hau dödö andrö.Yohane 5:28, 29.

Hadia omasi mi’iagö nahia andrö? Sambua fa’omuso dödö na tola falukha ita khö Khenoki. Angeraigö hadia manö wa’omuso dödö na öfaha’ö ndra’ugö khönia! Hasambalö ifatunö khöda hadia zalua me arakhagö mate ia. Hiza’i, so zi tola tafaha’ö ita khönia iada’a. Me no aefa itutunö sanandrösa khö Khenoki, imane Faulo, ”Ba na lö famati, ba tebai i’omasi’ö niha Lowalangi.” (Heberai’o 11:6) Sindruhu-ndruhu duma-duma si sökhi ba no sinangea mu’o’ö wamati hegöi falö’ata’u Khenoki!

^ par. 14 So ösa ndra sagatua-tua ba Zura Ni’amoni’ö zi faduhu tödö wa ihalö ösa Yuda ngawua wehede apokrifa buku Khenoki, hiza’i nösi mbuku andre lö tatu hezo mbörötania, ba mu’otöi’ö Khenoki. Sindruhusa wa tefaudu buku andre ba wama’anö fama’ele’ö Khenoki, tobali tola manö tehalö ia moroi ba dokumen si no tesura mazui lisan si lö hadöi sa’ae. Tola manö göi i’oguna’ö Yuda sumber si fagölö, mazui tola i’ila Khenoki moroi khö Yesu, sanehegö Khenoki moroi ba zorugo.

^ par. 20 Tola manö göi simane da’ö wolau Yehowa ba mboto Moze hegöi Yesu me mate ira ena’ö lö la’oguna’ö ba zi lö tefaudu.V Moze 34:5, 6; Luka 24:3-6; Yuda 9.