Faigi nösi

Faigi ba menu sekunder

Faigi ba gangolifa

Samaduhu’ö Yehowa

Nias

Manuriaigö  |  No. 1 2017

 TUHO SI OFÖNA | TEMA MBUA MOROI BA WOMBASO SURA NI’AMONI’Ö

Hadia Mbörö Wa Mubaso Zura Ni’amoni’ö?

Hadia Mbörö Wa Mubaso Zura Ni’amoni’ö?

”Molo’ö ya’o, lö alio aboto ba dödögu Zura Ni’amoni’ö andrö.”—Jovy

”Molo’ö ya’o, alio aföli ba wombaso ya’ia.”—Queennie

”Börö me u’ila wa’awe’e-we’e Zura Ni’amoni’ö, taya wa edönagu ba wombaso ya’ia.”—Ezekiel

Hadia no irai tumbu ba dödöu wombaso Sura Ni’amoni’ö, hiza’i ötaha-taha börö me örasoi simane nirasoira? Ba niha sato, abua sibai khöra ba wombaso Sura Ni’amoni’ö andrö. Hiza’i, hewisa na ö’ila wa sindruhunia tola itolo ndra’ugö Sura Ni’amoni’ö ba wangokhögö fa’owua-wua dödö hegöi fa’ahono dödö ba wa’auri? Ba hewisa na ö’ila so zi tola manolo ya’ugö irege tola adöni dödömö ba wombaso ya’ia? Hadia omasi ö’ila hadia nihenaigö Zura Ni’amoni’ö khöu?

Angeraigö hadia mbua si no latema niha samörögö fombaso Sura Ni’amoni’ö.

Imane Ezekiel, arakhagö 20 fakhe ndröfinia, ”Me föna, urasoi hulö zolohe moto ndra’o si lö tatu hezo numalö. Hiza’i, fombaso Sura Ni’amoni’ö zanolo ya’o ba wangokhögö fa’auri si so lua-lua. Ba da’ö, oya mene-mene si tola u’oguna’ö ba wa’aurigu si ero ma’ökhö.”

Itutunö Frieda, 20 fakhe ndröfinia, ”Alio sibai mofönu ndra’o. Hiza’i börö me ubaso Zura Ni’amoni’ö, tola so khögu wanaha tödö. Da’a mbörö wa tola aoha khögu wariawösa, ba iada’a ato nawögu.”

Imane samösa ira alawe sotöi Eunice, 50 fakhe ndröfinia, sanandrösa ba Zura Ni’amoni’ö, ”Da’a zi tobali fanolo khögu ba wombulö’ö amuata si lö sökhi irege tobali niha si sökhi ndra’o.”

Simane ya’ira hegöi niha si töra zuta fa’ato, no lafaha’ö ira wa tola möi fanolo göi khöu wombaso Sura Ni’amoni’ö ba wangokhögö fa’auri si sökhi. (Yesaya 48:17, 18) Duma-dumania, tola itolo ndra’ugö (1) wanga’i angetula si sökhi, (2) wangokhögö fahuwusa si sökhi, (3) lala ba wangasiwai abula dödö, ba (4) sabölö moguna ya’ia da’ö, tola öfaha’ö ndra’ugö ba zindruhu sanandrösa khö Lowalangi. Moroi khö Lowalangi mene-mene Zura Ni’amoni’ö, ba lö irai fasala na ö’o’ö ia. Lö irai ibe’e khöu mene-mene si lö sökhi Lowalangi.

Sabölö moguna ya’ia da’ö famörögö. Hadia lala si tola manolo ya’ugö ena’ö tola aoha khöu ba wamörögö ya’ia ba omuso dödöu ba wamalua da’ö?