Faigi nösi

Faigi ba menu sekunder

Faigi ba gangolifa

Samaduhu’ö Yehowa

Nias

Manuriaigö  |  No. 1 2017

Hadia Tola Mu’aohasi ba Dödö Wa’aboto ba Dödö si Fasala?

Hadia Tola Mu’aohasi ba Dödö Wa’aboto ba Dödö si Fasala?

So samösa nono alawe sangila simbo si kalua moroi ba cerobong pabrik ba mangebua zimbo andrö mane lawuo. Ihalö gangetula wa pabrik da’ö zamazökhi lawuo. Möi fama’ikida wa’aboto ba dödö si fasala khö nono andrö. Hiza’i, so wa’aboto ba dödö si fasala tanö bö’ö si tola möi famaelungu. Duma-dumania, na fasala wombaso lala wangoguna’ö dalu-dalu tola möi famakiko.

Fa’aboto ba dödö si fasala sanandrösa ba wamati, tola möi famakiko. Duma-dumania, so ösa niha sambö aboto ba dödö wamaha’ö Yesu. (Yohane 6:48-68) Moroi na la’alui hadia zindruhunia, latimbagö fefu wamaha’ö Yesu. Sambua fa’ate’ala!

Hadia öbaso Zura Ni’amoni’ö ba wangalui fanuturu lala? Baga sibai da’ö. Hadia so de’alania na fasala wamotokhiu ba dödöu hadia ia nibasomö? Ato niha si no morasoi simanö. Nehegö tölu ngawalö wa’aboto ba dödö si fasala si no to’ölö alua.

  • So ösa niha, fasala ba wamotokhira ba dödöra eluaha goroisa ”ata’ufi Lowalangi”. Lawalinga si möi famohokha mbu na mutötöi döi Lowalangi. (Zangombakha 12:13) Hiza’i, lö omasi Lowalangi na simane da’ö dödöda khönia. Imane wanguma’ö, ”Böi busi dödöu; lö’ö sa aefado khöu? Böi tokea’ö, Lowalangiu sa ndra’odo: u’abe’e’ö ndra’ugö, ba utolo’ö, ugogohe ndra’ugö na tangagu kambölö andre, samalua satulö.” (Yesaya 41:10) Fangata’ufi Lowalangi eluahania so khöda wa’ahöli-höli dödö ba tafosumange ia.

  • Hadia mukhozi ba galitö gulidanö?

    So göi ösa niha si lö aboto ba dödö geluaha ayati, ”Fefu hadia ia, ba so ginötö, . . . so mbaŵa wa’atumbu ba so mbaŵa wa’amate.” Lawalinga no itatugöi Lowalangi luo wa’amate zi samösa-mösa niha. (Zangombakha 3:1, 2) Sindruhunia sa, itutunö ayati da’ö hewisa siklus wa’auri ba wa no si to’ölö nifotöi fa’amate. Taromali Lowalangi göi zanguma’ö wa mo’amakhaita wa’anau nosoda ba gangetula nihalöda. Duma-dumania, tabaso, ”Fangata’ufi Yehowa, ba i’anau’ö noso.” (Gamaedola 10:27; Zinunö 90:10; Yesaya 55:3) Hana wa tola? Duma-dumania, börö me ta’ame’egö tödö Zura Ni’amoni’ö andrö wa ta’aröu’ö ita moroi ba ngawalö hadia ia zi tola möi fama’ala simane femabu hegöi amuata fohorö.I Korindro 6:9, 10.

  • So zo’anemai’ö mamaduhusi tödö ngawua wehede sorugo ba ulidanö ’mutenagö ba wamatörö ba galitö’, ba lahalö gangetula wa ifakiko gulidanö da’a Lowalangi. (II Fetero 3:7) Hiza’i, no ifabu’u Lowalangi wa lö ifakiko gulidanö da’a. ’No ilata danö daya-dayania andrö Lowalangi, faböi mangiwa ia, irugi zi lö aetu.’ (Zinunö 104:5; Yesaya 45:18) Tenga ulidanö da’a nifakiko, börö me no muhonogöigö ia irugi gamozua, hiza’i amatöröwa niha gulidanö zi hulö nikhozi ba galitö. Tobali, banua si yawa mazui sorugo eluahania ya’ia da’ö nahia Lowalangi. Lö tefakiko fefu da’ö.

HADIA MBÖRÖ WA ITARIA SO WA’ABOTO BA DÖDÖ SI FASALA SANANDRÖSA BA AYATI ZURA NI’AMONI’Ö?

Simane duma-duma megeno, asese fasala niha ba wamotokhi ba dödöra Sura Ni’amoni’ö ba ginötö labaso ia. Hiza’i, hadia mbörö wa itehegö alua da’ö Lowalangi? Tola manö so zanguma’ö, ’Na sindruhu so wa’atulö khö Lowalangi ba i’ila hadia ia fefu, tola manö ihenaigö mbuku salio aboto ba dödöda. Hana wa lö ifalua da’ö?’ Nehegö tölu mbörö wa tola so wa’aboto ba dödö si fasala sanandrösa ba Zura Ni’amoni’ö.

  1.   Mufazökhi Zura Ni’amoni’ö ena’ö aboto ba dödö niha sangide-ngide’ö ba somasi tefaha’ö. Imane Yesu khö Yehowa, ”Usuno ndra’ugö, Ama, So’aya sorugo awö danö, me no öbini’ö da’ö ba zatua-tua ba ba zonekhe, ba me no ö’oroma’ö ia ba ndraono.” (Luka 10:21) Musura Zura Ni’amoni’ö ena’ö tola aboto ba dödö niha sangobua-bua satulö. Niha si fayawa si to’ölönia ya’ia da’ö ’satua-tua ba sonekhe’, sasese fasala ba wamotokhira ba dödöra Sura Ni’amoni’ö. Hiza’i, niha sombaso ba sangobua-bua si hulö ”ndraono”, si so fangide-ngide’ö ba omasi nifaha’ö, mube’e howu-howu fa’aboto ba dödö si sökhi. Sökhi sibai wama’anö Lowalangi Sura Ni’amoni’ö andre!

  2. Mube’e Zura Ni’amoni’ö ba niha somasi manema fanolo moroi khö Lowalangi ba wa’aboto ba dödö. Molo’ö Yesu, moguna wanolo ba niha ena’ö tola aboto ba dödöra wamaha’önia. Lalania? Imane Yesu, ”Ba sanolo andrö, eheha ni’amoni’ö, nifatenge Namagu dania ba döigu, da’ö zamaha’ö ya’ami, ba da’ö fefu.” (Yohane 14:26) No ihenaigö Lowalangi geheha ni’amoni’ö, mazui fa’abölö, ba wanolo niha ena’ö tola aboto ba dödöra Zura Ni’amoni’ö. Hiza’i, lö ibe’e gehehania Lowalangi ba niha si lö omasi nitolo, irege ambö aboto ba dödöra Zura Ni’amoni’ö. Eheha Ni’amoni’ö zamarou tödö niha si so fa’aboto ba dödö ba Zura Ni’amoni’ö ba wanolo niha sangalui ba somasi aboto ba dödö Zura Ni’amoni’ö.Halöwö Zinenge 8:26-35.

  3. So ösa faosatö Zura Ni’amoni’ö si ha tola mu’ila eluaha ba ginötönia. Duma-dumania, tebe’e geheha khö zama’ele’ö Danieli ba wanura salua ba zi so föna. Imane samösa mala’ika, ”Ba ya’ugö Danieli, ba böi ombakha’ö huhuoda andre ba fotandro zura, irugi ba götö safuria.” Ngaotu fakhe fa’ara, ato niha si lö mangila eluaha nösi mbuku Danieli nibasora ba Zura Ni’amoni’ö. Lö göi aboto ba dödö Danieli ösa hadia ia nisurania. Si fao fangide-ngide’ö imane wanguma’ö, ”Urongo sa, ba lö aboto ba dödögu.” Tola aboto ba dödö niha wama’ele’ö da’ö, ha ba ginötö si no itatugöi Lowalangi. Ifatunö mala’ika, ”Fuli’ö, ya’ugö Danieli! Irege götö safuria andrö, ba tenga sa ni’ombakha’ö huhuo andre, nifotandro.” Haniha zi tola aboto ba dödö geluaha wehede Lowalangi? ”Dozi sebua horö, ba dörö-dörö lö fa’aboto ba dödö; ba ba zatua-tua, ba so wa’aboto ba dödö.” (Danieli 12:4, 8-10) Tobali, ifatunö geluahania Lowalangi na ba ginötönia.

Hadia no irai fasala Zamaduhu’ö Yehowa ba wamotokhira ba dödöra Sura Ni’amoni’ö? Noa. Hiza’i, ba ginötö ifatunö khöra Lowalangi, latehegö lafaudugö lala wangera-ngerara. Faduhu dödöra wa moguna la’o’ö ndra nifaha’ö Yesu sangokhögö fangide-ngide’ö me inötö i’ehao lala wangera-ngerara Yesu.Halöwö Zinenge 1:6, 7.

Fa’aboto ba dödö nono alawe side-ide andrö sanandrösa ba lawuo tola manö ni’aohasi ba dödö. Hiza’i, hadia ia nifaha’ö Zura Ni’amoni’ö moguna sibai ia khöu. Moguna sibai duria si so ba Zura Ni’amoni’ö andrö ba niha somasi mangokhögö fa’aboto ba dödö na labaso samösa ia. Tobali, andrö wanolo ena’ö tola aboto ba dödöu hadia ia nibasou. Alui niha si no mamaha’ö ya’ia ba Zura Ni’amoni’ö si fao fangide-ngide’ö, sangodaligö eheha Lowalangi ena’ö aboto ba dödö Zura ni’amoni’ö, ba si faduhu tödö wa no inötönia iada’a omasi Lowalangi na aboto ba dödöda Zura Ni’amoni’ö. Böi aombö dödöu fahuhuo khö ndra Samaduhu’ö Yehowa mazui ba wombaso riset si no lafa’anö ba situs Web jw.org/nia. Ifabu’u Sura Ni’amoni’ö, ”Na ökaoni wa’aboto ba dödö . . . , awena ösöndra wa ö’ila watahögö Lowalangi.”Gamaedola 2:3-5.