Faigi nösi

Faigi ba menu sekunder

Faigi ba gangolifa

Samaduhu’ö Yehowa

Nias

Manuriaigö  |  No. 6 2016

 TUHO SI OFÖNA | HADIA ZALUA BA DALU MBANUA

Fanofu Sanandrösa Khöra si So ba Dalu Mbanua

Fanofu Sanandrösa Khöra si So ba Dalu Mbanua

Hadia no irai manofu-nofu ndra’ugö hewisa dalu mbanua andrö ba haniha manö zi toröi ba da’ö? Na noa, tenga ha ya’ugö zanofu da’ö. Ngahönö fakhe fa’ara, no latahö-tahö niha sanandrösa ba da’ö. So ösa zi faduhu tödö wa ira satuada meföna zangiagö talu mbanua andrö, ba moguna lafosumange ira. Ato göi zokhalaigö wa da’ö nahia wa’omuso dödö sahono nifotöi sorugo, ba mala’ika hegöi niha si sökhi si no mate sangiagö nahia andrö. So göi zanguma’ö wa talu mbanua andrö no nahia ndra dewa si ngaotu zuta fa’ato.

Ato zanguma’ö wa lö tola ta’ila hadia ia zalua ba zorugo, börö me lö irai so zi möi ba nahia andrö ba mangawuli ira wanutunö khöda. Hiza’i, lö atulö da’ö. No irai so Yesu ba zorugo, ba dalu mbanua, fatua lö möi ia ba gulidanö. Ifatunö da’ö khö ndra sondrönia’ö ba agama me döfi si föföna, ”Tenga ba wolau somasi ndra’o möido tou ba moroi ba zorugo, ba wolau somasi samatenge ya’o möido tou.” Andrö wa tola ifatunö Yesu khö ndra sinengenia me iwa’ö, ”Oya nahia ba nomo Namagu.”—Yohane 6:38; 14:2.

Ama Yesu, tatu manö Lowalangi, töinia Yehowa, ba ”omo” Yehowa ya’ia da’ö sorugo. (Zinunö 83:19) Andrö wa lö hadöi zabölö sökhi si tola mokhalaigö talu mbanua si lö oroma andre baero Yehowa hegöi Yesu. Oya latutunö hewisa zindruhunia dalu mbanua ya’ia da’ö la’odela gangilata sahöli-höli dödö nifa’ema ba niha samati.

Ba artikel da’a, itutunö khöda faosatö Zura Ni’amoni’ö sanandrösa ba gangilata-gangilata si no lafa’elö’ö ba ndra matua si lö atoto. Ba ginötö ötandraigö ena’ö aboto ba dödöu gangilata andrö, törö tödöu wa talu mbanua andrö lö moboto ba tebai tababaya mazui ta’ila höröda ia. Da’ö mbörö wa i’oguna’ö Lowalangi ngawua wehede salio mu’ila eluaha ba wanutunö gangilata andrö. Angilata da’a, zanolo ya’ugö ena’ö so khöu wa aboto ba dödö sanandrösa khö ndra sangiagö ’nahia soya’ ba dalu mbanua.