Faigi nösi

Faigi ba menu sekunder

Faigi ba gangolifa

Samaduhu’ö Yehowa

Nias

Manuriaigö  |  No. 6 2016

 TUHO SI OFÖNA | HADIA ZALUA BA DALU MBANUA

Angilata Sanandrösa Khöra si So ba Zorugo

Angilata Sanandrösa Khöra si So ba Zorugo

Oya gangilata si so ba Zura Ni’amoni’ö, si tola manolo ya’ita ba wokhalaigö hewisa zorugo andrö. Makaoni ndra’ugö ba wamareso ya’ia. Hewa’ae na lö fefu gangilata andrö tefo’eluaha ia simane sindruhu-ndruhu, hiza’i tola itolo ndra’ugö gangilata andre ena’ö tola ökhalaigö tenga ha haniha manö zi toröi ba zorugo andrö hiza’i ena’ö ö’ila göi hadia lua-luania khöu.

YEHOWA FONDREGE ZALAWA

”Ba i’anema’ö aheta nosogu, ba hiza dadaoma nifedadao ba zorugo, ba ba dadaoma andrö, ba so zidadao, ba sidadao andrö, ba no hulö weremata yasibi ba hulö weremata aki andrö, wamaigigu, ba no tefasui dumi dadaoma andrö, hulö zumurudi, wamaigigu.”—Fama’ele’ö 4:2, 3.

”Ba si tefasui ya’ia, ba no haga: simane dumi, ni’ilada ba lawuo na luo moteu, simanö wamaigida haga andrö, fasui. Simanö wa’oroma lakhömi Yehowa andrö wamaigigu.”—Hezekieli 1:27, 28.

Ba gangilata nitema zinenge sotöi Yohane hegöi sama’ele’ö Hezekieli, mu’amaedolagö wa’ebua Lakhömi Yehowa, Lowalangi Fondrege Zalawa, si tola takhalaigö simane weremata si sökhi, dumi, hegöi dadaomania solakhömi. Ba da’a ta’ila, wa mu’amaedolagö Yehowa andrö no fa’asökhi sahöli-höli dödö, si möi fa’omuso dödö ba fangahono dödö.

Tefaudu göi duma-duma sanandrösa khö Lowalangi andre simane nisura zanura sinunö, ”Me no sebua Yehowa, ba me no sinangea nisuno sibai, ni’ata’ufi, yawa Lowalangi bö’ö, fefu. Lowalangi niha baero andrö sa, ba adu; ba Yehowa, ba no samazökhi banua si yawa. Lakhömi ba fa’amoadu fönania; fa’abölö ba lakhömi ba ni’amoni’ö andrö khönia.”—Zinunö 96:4-6.

Hewa’ae no Fondrege Zalawa Yehowa, hiza’i ikaoni ita ena’ö tahatö’ö ita khönia ba wangandrö ba ifaduhu’ö khöda wa hasambalö ifondro-ndrongo gangandröwada. (Zinunö 65:3) I’omasi’ö ba i’ame’egö tödö ita Lowalangi, simane nisura zinenge sotöi Yohane, ”Me no fa’omasi Lowalangi.”—I Yohane 4:8.

FAO YESU KHÖ LOWALANGI

”[Sitefano nifaha’ö Keriso], ba no fahöna khönia Geheha ni’amoni’ö, ba ifaöga hörönia ba zorugo, ba i’ila lakhömi Lowalangi, awö Yesu, si so ba gambölö Lowalangi; ba imane: Hiza, teboka zorugo, u’ila ba so ba gambölö Lowalangi Nono Niha.”—Halöwö Zinenge 7:55, 56.

Fatua lö itema gangilata da’a Sitefano, no labunu Yesu börö wondrönisi moroi ba niha sedöna mamunu Sitefano ya’ia da’ö ira sondrönia’ö Yahudi. Angilata da’a zanga’aro’ö wa no tesusugi Yesu ba tefolakhömi ia. Sanandrösa ba da’ö, isura sinenge sotöi Faulo, ”[Yehowa] isusugi [Yesu] moroi ba ngai zi mate, ba me ifedadao ba gambölönia,  ba zorugo, alawa yawa zamatörö andrö fefu, ba yawa zalawa andrö, ba yawa zabölö, ba yawa zo’aya andrö, ba yawa zi so töi fefu, nitötöi, tenga ha ba götö danö da’e, ba götö dania göi.”—Efeso 1:20, 21.

Baero wanutunö dadaoma Yesu solakhömi, itutunö göi Taromali Lowalangi wa hulö simane Yehowa, i’ame’egö tödö sibai niha. Me so ia ba gulidanö, ifadöhö niha sofökhö, niha si cacat, ba isusugi niha si no mate. Fa’amate Yesu zangoroma’ö wa ebua sibai wa’omasinia khö Lowalangi hegöi ba niha. (Efeso 2:4, 5) Mudadao Yesu ba gambölö Lowalangi, ba lö aratö ifalua halöwö si tola manga’asogö howu-howu sebua ba niha si lö faröi.

LALULUI HALÖWÖ LOWALANGI IRA MALA’IKA

”[Sama’ele’ö Danieli] ufaigi-faigi, irugi tefedadao ba da’ö dadaoma zalawa ba irege dumadao Zatua [Yehowa] andrö, si no arara. . . . Mehönö wa hönö ngoni-ngoninia, ba mewulu ngahönö wa fulu ngahönö zi so ba ngainia.”—Danieli 7:9, 10.

Ba gangilata ba zorugo andre, ato mala’ika ni’ila Danieli tenga ha samösa. Sambua fa’ahöli-höli dödö gangilata andrö! Mala’ika andrö ba no soboto eheha solakhömi, atua-tua ba abölö. Moroi ba gotaluara so serafi ba kerubi. Töra 250 kali mutötöi mala’ika ba Zura Ni’amoni’ö.

Mala’ika andrö tenga niha si no irai auri ba gulidanö. Ara fatua lö iwöwöi niha, no iwöwöi mala’ika Lowalangi. Me mufazökhi gulidanö, lafaigi-faigi ira mala’ika ba omuso göi dödöra.—Yobi 38:4-7.

Sambua lala nifalua mala’ika ba wolului halöwö Lowalangi ya’ia da’ö lafaogö ira ba halöwö fondrege zebua si so ba gulidanö andre ya’ia da’ö manuriaigö turia somuso dödö sanandrösa ba Mbanua Lowalangi. (Matai’o 24:14) Oroma wa fao ira ba halöwö andre moroi ba nisura zinenge sotöi Yohane, ”Ba u’ila mala’ika bö’ö, sihombo, ba dalu mbanua si yawa, si so turia somuso dödö si lö aetu, ba wanuriaigö ba zi so ba gulidanö, ba ngawalö soi fefu, ba ba ngawalö niwa, ba ba ngawalö li, ba ngawalö mado fefu.” (Fama’ele’ö 14:6) Hewa’ae lö fahuhuo mala’ika ba niha simane ba götö föna, hiza’i latolo ndra sanuriaigö turia somuso dödö ba niha si sökhi tödö.

ZUTA NIHA NIFAELUNGU ZATANA

”Ba tesao wanuwö ba mbanua si yawa: Mikhaeli andrö ba mala’ikania, ba fasuwö  ba naga andrö. Ba fasuwö naga andrö, awö mala’ikania. Ba tebai ira, ba lö nahara sa’ae ba mbanua si yawa. Ba tetibo’ö naga sebua andrö, ulö satua andrö, sotöi Afökha ba Satana, samaelungu niha ba gulidanö, fefu; tetibo’ö si tou ia ba danö ba tetibo’ö göi mala’ikania andrö, awönia.”—Fama’ele’ö 12:7-9.

Itaria lö fa’omuso dödö ba zorugo. I’otarai ba wamobörö waö-waö wa’auri niha, so samösa moroi ba gotalua mala’ika, zomasi nifosumange, ba mamadaö ia khö Lowalangi, ba tobali ia Satana eluahania ”Solawa”. Fao göi ösa khönia ndra mala’ika tanö bö’ö ba lafotöi ira bekhu. Sindruhu-ndruhu lö sökhi ira, lalau mamadaö khö Lowalangi ba ladönisi niha sato wefao ba wolawa fanuturu lala moroi khö Yehowa sebua fa’omasi.

Satana hegöi bekhu si fao khönia lö sökhi ba amu’i. Udu niha gulidanö ira fefu, ba oya la’asogö wamakao ba niha. Duma-dumania, ibunu fefu gurifö hegöi zawuyu ni’okhögö niha samati sotöi Yobi. Me no awai da’ö, ibunu göi dafulu ndraono Yobi si so ba nomo ba zi ”sambua angi sabölö”. Aefa da’ö, ibözi Yobi Satana faoma ”bio, i’otarai narö kahe, numalö ba galizuzu”.—Yobi 1:7-19; 2:7.

Lö aratö tehori Zatana. I’otarai me latibo’ö ia ba gulidanö, ba ”i’ila, lö ara nitehe khönia”. (Fama’ele’ö 12:12) Hasambalö nihuku Zatana, ba no turia somuso dödö da’ö!

YA’IRA SI’ONARAI GULIDANÖ

”Ba me no [Yesu] öhöli niha domö, khö Lowalangi, moroi ba ngawalö niwa fefu, ba moroi ba ngawalö li, ba moroi ba ngawalö mado, ba moroi ba ngawalö soi fefu, ba no öbali’ö banua Lowalangida ba ere ira, ba salawa ira dania, ba gulidanö.”—Fama’ele’ö 5:9, 10.

Simane Yesu si no mususugi moroi ba gulidanö ena’ö auri ba zorugo, simanö göi danö bö’ö. Imane Yesu khö ndra sinengenia si lö faröi, ”Möido sa muhaogö naha khömi. Ba . . . mangawulido, ba uhalö ami khögu, ena’ö so ami göi ba zi so ya’o.”—Yohane 14:2, 3.

Ya’ira si möi ba zorugo, so gohitö dödöra. Fao ira khö Yesu mamatörö Mbanua Lowalangi ba  lafatörö gulidanö andre dania ba oya la’asogö howu-howu ba niha gulidanö. Da’a Wamatörö nitötöna Yesu ena’ö la’angandröi ira solo’ö khönia, ”He Ama khöma si so ba zorugo! Yate’amoni’ö döiu. Yatobali banuau fefu niha. Ya’itörö zomasi ndra’ugö, hulö ba zorugo, yasimanö göi ba gulidanö.”—Matai’o 6:9, 10.

HADIA NIFALUARA BA ZORUGO

”Ba [sinenge sotöi Yohane] urongo li sebua, moroi ba dadaoma andrö, imane: Hiza nose Lowalangi andrö ba niha, . . . ba i’osi dania dawa hörö fefu, ba höröra, ba lö fa’amate sa’ae, ba lö fa’abu dödö, ba lö fege-ege, ba lö fa’afökhö sa’ae, me no numalö zi föföna andrö.”—Fama’ele’ö 21:3, 4.

Angilata andre manandrösa ia ba Mbanua Lowalangi, nifatörö Yesu hegöi ya’ira nisusugi moroi ba gulidanö, ba lahori fefu gamatöröwa Zatana ba labali’ö faradaiso gulidanö andre. Lö hadöi zi tobali börö wökhö ba famakao ba niha gulidanö. Ba lö hadöi fa’amate sa’ae.

Hewisa niha si no mate si hauga miliar fa’ato si lö tesusugi ba zorugo? Ba zi so föna, lasöndra wa’auri si lö aetu ba gulidanö Faradaiso.—Luka 23:43.

Fefu gangilata da’a zanga’aro’ö tödöda wa Lowalangi Yehowa ba Ononia, Yesu Keriso, hegöi ndra mala’ika si lö faröi ba ya’ira si no muhöli moroi ba gulidanö, sindruhu-ndruhu la’ame’egö tödö sibai ita. Ena’ö tola ö’ila nasa hadia manö nifaluara, makaoni ndra’ugö ba wo hubungi ndra Samaduhu’ö Yehowa mazui faigi situs Web khöma ba www.jw.org/nia, ba tola ö-download mbuku Hadia Nifaha’ö Zura Ni’amoni’ö Khöda?