Faigi nösi

Faigi ba menu sekunder

Faigi ba gangolifa

Samaduhu’ö Yehowa

Nias

Manuriaigö  |  No. 5 2017

 TUHO SI OFÖNA | MALA’IKA—HADIA NIWA’Ö ZURA NI’AMONI’Ö SANANDRÖSA KHÖRA?

Hadia Ö’okhögö Mala’ika Solumö’ö?

Hadia Ö’okhögö Mala’ika Solumö’ö?

Lö nifaha’ö Zura Ni’amoni’ö wa dozi ita ta’okhögö mala’ika solumö’ö. Sindruhu sa wa no irai imane Yesu, ”Mifaigi, faböi mi’ositengagö zide-ide andrö, samösa [ira nifaha’ö Yesu]. Uwa’ö sa khömi, mala’ikara andrö ba zorugo, ba lö mamalö-malö wa la’ila mbawa Namagu andrö, si so ba zorugo.” (Matai’o 18:10) Hiza’i, tenga da’ö geluaha niwa’ö Yesu wa dozi ita ta’okhögö mala’ika solumö’ö. Tobali, omasi iforoma’ö Yesu wa la’ame’egö tödö ira mala’ika ndra nifaha’önia zamösana. Börö da’ö, lö lafalua hadia ia zi lö eluaha hegöi sama’ala fa’auri ira ono mbanua Yehuwa, börö me la’ila wa lö la’okhögö mala’ika solumö’ö.

Hadia da’ö geluahania wa lö latolo niha ira mala’ika? Tenga. (Zinunö 91:11) So ösa zi faduhu tödö sibai wa i’oguna’ö mala’ikania Lowalangi ba wolumö’ö hegöi ba wame’e khöra fanuturu lala. Duma-dumania simane Kenneth, nidunö-dunö ba wamobörö. Tola manö atulö nirasoinia andrö. Asese la’ila zi tobali tandra ira Samaduhu’ö Yehowa wa itolo ira mala’ika ba ginötö manuriaigö. Hiza’i, börö me tebai mu’ila hörö mala’ika, andrö wa lö ta’ila sibai hewisa ba hamega i’oguna’ö ira Lowalangi ba wanolo niha ba ngawalö hadia ia. Hewa’ae simanö, lö tebulö ta’andrö saohagölö khö Lowalangi me lö mamalö itolo ita, hewa’ae lö ta’ila hewisa lalania wamalua da’ö.​—Kolose 3:15; Yakobo 1:17, 18.