Faigi nösi

Faigi ba menu sekunder

Faigi ba gangolifa

Samaduhu’ö Yehowa

Nias

Manuriaigö  |  No. 5 2017

 TUHO SI OFÖNA | MALA’IKA—HADIA NIWA’Ö ZURA NI’AMONI’Ö SANANDRÖSA KHÖRA?

Mala’ika​—⁠Hadia Niwa’ö Zura Ni’amoni’ö Sanandrösa Khöra?

Mala’ika​—⁠Hadia Niwa’ö Zura Ni’amoni’ö Sanandrösa Khöra?

Me samuza inötö ba luo Migu tanö owi, möi Kenneth hegöi Filomena si toröi ba Curaçao ba wamalukhaisi sambua fongambatö nifaha’öra ba Zura Ni’amoni’ö.

Itutunö Kenneth, ”Me marugi, no lakusi nomo ba lö hadöi motora. Hiza’i, te’o’ou dödögu ba wotelefo fo’omonia ira alawe.”

Itema telefo andrö ira alawe ba ifatunö wa no mofanö ba wohalöwö wo’omonia. Hiza’i, me i’ila wa no so föna nomonia Kenneth faoma Filomena, möi ia ba mbawandruhö ba ife’amöi ira yomo.

I’anemai’ö la’ila wa bohou me’e ia. Me ibörötaigö wamaha’ö ba Zura Ni’amoni’ö Kenneth faoma fangandrö, ifuli zui me’e ndra alawe andrö. Tobali, lahaogö wanofu khönia ira Kenneth hegöi Filomena hadia mbörö wa me’e ia.

Itutunö ira alawe andrö wa edöna ibunu ia samösa ba zi laluo andrö, ba isura-sura zura, niröinia mena’ö khö wo’omonia ira matua me tohare telefo moroi khö Kenneth, ba da’ö zombatogö ya’ia. Itutunö khöra wa fawuka sibai wangera-ngerania, tobali labe’e khönia mbua wangera-ngera si möi fondrara dödö moroi ba Zura Ni’amoni’ö. Da’ö zi tobali fanolo khönia.

Imane Kenneth, ”Ma’andrö saohagölö khö Yehowa me no itehegö khöma wanolo ira alawe si no aetu fanötöna andre, mendrua manö me no i’odela mala’ika mazui ehehania ni’amoni’ö, ba wotelefo ira alawe andrö!” *

Hadia sindruhu-ndruhu nitolo Lowalangi Kenneth hegöi Filomena, he na i’odela mala’ika mazui ehehania ni’amoni’ö mazui fa’abölönia? Mazui hadia ha si lö mu’odödögö wa’atohare telefo andrö?

Lö ta’ila tatatugöi. Hiza’i, moguna aboto ba dödöda wa i’oguna’ö mala’ikania Lowalangi ba wanolo niha ba wamati. Duma-dumania, ifatunö Sura Ni’amoni’ö wa i’oguna’ö mala’ika Lowalangi wondrönia’ö samösa sanuriaigö sotöi Filifo ba wanolo pejabat Gaitiofia ba wanuturu lala sanandrösa ba wamati.​—Halöwö Zinenge 8:26-31.

Ngawalö agama zamaha’ö wa so mala’ika, so ösa ni’amaedolagö tobali samalua si sökhi samalua niwa’ö Lowalangi mazui mala’ika solumö’ö. Ato zi faduhu tödö wa tenga ha asala so manö mala’ika, hiza’i la’ila göi wa tola ladönisi wa’aurira ira mala’ika. Hiza’i, ato göi zi lö faduhu tödö wa so mala’ika.

Hadia sindruhu-ndruhu so mala’ika? Na sindruhu so, he zo moroi mbörötara? Hadia niwa’ö Zura Ni’amoni’ö sanandrösa ba mala’ika? Hadia tola ladönisi wa’auriu? Data’alui wanema linia.

^ par. 8 Yehowa ya’ia da’ö töi Lowalangi si so ba Zura Ni’amoni’ö.​—Zinunö 83:19.