Faigi nösi

Faigi ba menu sekunder

Faigi ba gangolifa

Samaduhu’ö Yehowa

Nias

Manuriaigö  |  No. 4 2017

Praslin, Seychelles, nahia nisöndra Jendral Gordon me 1881 nifotöinia kabu Edena

Faradaiso ba Gulidanö—Anga-Anga mazui Sindruhu-ndruhu Alua?

Faradaiso ba Gulidanö—Anga-Anga mazui Sindruhu-ndruhu Alua?

Faradaiso! Oya brosur wisata sondrönisi tödöda we’amöi ba nahia si sökhi si hulö ”faradaiso” ba wolombase hegöi ba wangolifugö fefu wa’aombö-aombö dödö ba abula dödöda. Hiza’i, sindruhunia na mangawuli ita ba nomo, ba simane si to’ölö zui wa’aurida.

Hewa’e simanö, adöni sibai dödö niha ba waradaiso andrö. Tola manö manofu ita, ’Hadia ha anga-anga ”waradaiso” andrö? Na ya’ia, hadia mbörö wa tola adöni sibai dödö niha? Ba hadia tola sindruhu-ndruhu alua ia?’

WAÖ-WAÖ SANANDRÖSA BA WARADAISO

Ba zi hauga abad, adöni sibai dödö niha ba waradaiso. Ato zadöni tödö börö me itutunö Sura Ni’amoni’ö sanandrösa ba ”Gedena, tanö ba gatumbukha luo”. Hadia zame’e fa’adöni dödö ba kabu andrö? Imane Sura Ni’amoni’ö, ”Ba ifatumbu’ö moroi ba danö ngawalö geu sowua Lowalangi, eu somasi ita famaigi ba sami bua.” Sökhi sibai kabu andrö ba möi fangohahau dödö. Ba sabölö möi fa’adöni dödö ya’ia da’ö ”eu fangorifi ba dalu kabu”.​—I Moze 2:8, 9.

Baero da’ö, itutunö göi buku I Moze wa so öfa ungo nidanö sanöröi kabu andrö. Dombua moroi ba gotaluania zi so irugi ma’ökhö, ya’ia da’ö Tigris (mazui Hideke) hegöi Oiferati. (I Moze 2:10-14) Si dombua ungo nidanö andre ofeta ba Teluk Persia i’anöröi Irak, ya’ia da’ö föfö moroi ba Weresia meföna.

Tobali, no sinangea na faradaiso ba gulidanö no tobali föfö moroi gondröita Persia. Ba Museum Seni Philadelphia, Pennsylvania, AS, so sambua karpet Persia i’otarai abad si-16 si so gambara kabu nifasui towa, oya geu hegöi bunga. Ngawua wehede Persia sanandrösa ba ”kabu nifasui towa” eluahania ”faradaiso”, ba gambara si so ba karpet andrö fakhili simane nitutunö Zura Ni’amoni’ö sanandrösa ba kabu Edena si sökhi ba satabö.

Sindruhunia, oya sibai waö-waö sanandrösa ba waradaiso ba ngawalö li hegöi budaya ba zi sagörö ulidanö. Me itugu ato niha ba gulidanö, la’ohe ngawalö versi sanandrösa ba hikaya sindruhunia. Me no aefa zi hauga abad, faruka hikaya andrö ba nifaduhusi tödö hegöi manö-manö zi sambua banua. Iada’a, asese göi la’oguna’ö wehede faradaiso andrö niha ba wamotöi nahia si sökhi.

NIFALUA BA WANGALUI FARADAISO

So ösa zanöröi ulidanö sanguma’ö wa no lasöndra waradaiso si no irai so meföna. Duma-dumania, me i’ondrasi kepulauan Seychelles, Charles Gordon, samösa jendral zaradadu Inggris, me döfi 1881, ahöli-höli dödönia ba wa’asökhi Vallée de Mai, si tobali Situs Warisan Dunia iada’a. Iwa’ö wanguma’ö wa da’ö kabu Edena. Me abad si-15, so samösa navigator Italia, sotöi Christopher Columbus si möi ba Hulo Hispaniola nifotöi Republik Dominika hegöi Haiti iada’a. Ba ginötö da’ö, so ba wangera-ngerania wa no arakhagö isöndra kabu Edena.

Maping Paradise, sambua buku sejarah, si so peta kuno si töra 190 ba oya gambara Gadamo ba Khawa ba Gedena. Ba gotalua da’ö, so peta sabölö tohude moroi ba salinan manuskrip nifazökhi Beatus moroi ba Liébana, ya’ia da’ö salinan nifazökhi me abad si-13. Tanö yawa peta andre so sambua kotak side-ide si so gambara waradaiso ba gotaluania. Moroi ba waradaiso andrö so öfa ungo nidanö si mangele, nibe’e töi ”Tigris”, ”Eufrates”, ”Pison”, hegöi ”Geon”, sangosisi zi öfa sudu kotak andrö. Mu’amaedolagö da’ö tobali fa’atedou wa’aniha Keriso ba zi öfa mbalö danö faföfö. Gambara da’ö zangoroma’ö wa hewa’ae lö mu’ila hezo so zindruhunia Waradaiso, hiza’i itöra nasa tödö niha ia.

 John Milton, samösa pujangga Inggris me abad si-17, tehöngö ia börö puisinia Paradise Lost, si te’odane-dane ba mbuku I Moze sanandrösa ba horö Gadamo hegöi me lafofanö ia moroi ba Gedena. Ba puisi andrö, itutunö mbu’usa li wa hasambalö ifuli auri niha götö-götö wa’ara ba gulidanö. Isura, ”Tobali dania faradaiso zi sagörö ulidanö.” Aefa da’ö, isura zui Milton dohu-tohu puisi andrö tuhonia Paradise Regained.

MU’OLIFUGÖ WARADAISO BA GULIDANÖ

Sagötö sejarah, ato niha somasi mondrunö-ndrunö sanandrösa ba waradaiso si no irai so ba gulidanö. Hiza’i, hadia mbörö wa ambö ba dödöra iada’a? Simane si no mufatunö ba mbuku Mapping Paradise, ”la’odödögö ira ahli agama . . . ba wangositengagö nahia waradaiso”.

Oya gereja same’e famaha’ö wa ohitö dödö siföföna ya’ia da’ö fa’auri ba zorugo, tenga ba faradaiso ba gulidanö. Hiza’i, imane ayati Zura Ni’amoni’ö ba Zinunö 37:29, ”Satulö tödö zokhö tanö dania, ya’ira zowanua ba danö si lö mamalö-malö.” Börö me tenga simane faradaiso gulidanö iada’a, hadia tola sindruhu-ndruhu alua zi no mufabu’u andrö?

FARADAISO BA ZI SAGÖRÖ ULIDANÖ

Lowalangi Yehowa, samazökhi Faradaiso ba mböröta, no ifabu’u wa hasambalö ifuli ibe’e ba niha waradaiso. Hewisa wamaluania da’ö? Ifaha’ö ita Yesu ba wangandrö, ”Yatobali banuau fefu niha. Ya’itörö zomasi ndra’ugö, hulö ba zorugo yasimanö göi ba gulidanö.” (Matai’o 6:10) Banua Lowalangi ya’ia da’ö famatörö ba zi sagörö ulidanö nidönia’ö Yesu Keriso, sangeheta famatörö niha gulidanö. (Danieli 2:44) Barö wamatörö Mbanua Lowalangi, fefu gohitö dödö Lowalangi sanandrösa ba waradaiso ba gulidanö hasambalö ’itörö’.

Meföna, ibe’e wanuturu lala Lowalangi khö zama’ele’ö sotöi Yesaya ba wame’e khala-khala Waradaiso si no mufabu’u andrö. Tehori fefu zi tobali abula dödö hegöi sanaisi niha gulidanö mane ma’ökhö. (Yesaya 11:6-9; 35:5-7; 65:21-23) Tandraigö baso ayati-ayati andrö hewa’ae lö arara ba Zura Ni’amoni’ö khöu. Na öfalua da’ö, tola faduhu dödöu wa sindruhu-ndruhu no ifabu’u da’ö Lowalangi ba niha solo’ö khönia. Tola latema zi tebai isöndra Adamo, ya’ia da’ö fa’auri si lö aetu ba waradaiso hegöi amakhaita si sökhi khö Lowalangi.​—Fama’ele’ö 21:3.

Hana wa faduhu dödöda wa tötönafö fa’auri ba Waradaiso tenga ha anga-anga hiza’i sindruhu alua? Börö me ifatunö khöda Sura Ni’amoni’ö, ”Banua si yawa andrö, ba no banua Yehowa; ba tanö andre, ba no ibe’e ba nono niha.” Tötönafö ba Waradaiso ba gulidanö andrö no ”nifabu’u Lowalangi, si lö mofaya, föna götö danö andre”. (Zinunö 115:16; Tito 1:2) Hawa’asökhi dötönafö nibe’e Zura Ni’amoni’ö andrö ya’ia da’ö Faradaiso götö-götö wa’ara!