Faigi nösi

Faigi ba menu sekunder

Faigi ba gangolifa

Samaduhu’ö Yehowa

Nias

Manuriaigö  |  No. 2 2017

Mamawa zawuyu ba gotalua Afrika ba Amerika tobali bisnis sebua hare

Te’efa’ö ba Wangosawuyu—Meföna hegöi Iada’a

Te’efa’ö ba Wangosawuyu—Meföna hegöi Iada’a

No mufabu’u halöwö khö Blessing * tobali sangehaogö bu ba Eropa. Hiza’i, me no aefa fulu ngaluo lö aetu laböbözi, lafeta’u ia na itandraigö ilau moloi ba hasambalö lafakao zoroi yomonia si so ba mbanua. Aefa da’ö, lafaso ia mohalöwö tobali ira alawe sohorö-horö.

Gambara nitoto zawuyu nira’u ba Miserai

Lö zi lö tola lö moguna isöndra gefe Blessing ero wongi 200 irugi 300 euro ba wobu’a gömö, fa’ebua 40.000 euro * si no itatugöi ndra alawe sangonorogö tödö nahia wohorö. Itutunö Blessing, ”Asese utandraigö ulai moloi, hiza’i ata’udo göi na lafakao zoroi yomogu. No tefa’u’u ndra’o.” Simanö da’ö göi zalua ba niha sarakhagö öfa zuta ni’osawuyu ba industri internasional famalua amuata wohorö.

Arakhagö 4.000 fakhe ba zilalö, so samösa zi bohou ebua sotöi Yosefo nifamawa ndra talifusönia. Aefa da’ö, tobali ia sawuyu ba nomo niha si so faka ba Miserai. Tenga simane Blessing, lahaogö-haogö ua khö Yosefo ba wamobörö. Hiza’i, me itimbagö wondrönisi moroi khö wo’omo ira alawe zokhö ya’ia, laböbögö khönia zi lö duhu wa itandraigö ihoröni ndra alawe andrö. Ba gafuriatania, lebe’e ba gurunga ba larate ia si’öli.I Moze 39:1-20; Zinunö 105:17, 18.

Yosefo samösa sawuyu me götö föna; Blessing samösa sawuyu ba abad si-21. Hiza’i, ya’ira si darua andre no tobali gamawaö niha, si no so ba zi hauga abad. Labali’ö niha simane gama-gama nigale hegöi börö wangalui hare.

TOBALI BISNIS SEBUA WANGOSAWUYU BÖRÖ WASUWÖTA

Fasuwöta no lala fondrege zalio ba ngawalö soi ba wanöndra sawuyu. Te’ombakha’ö wa i’ohe 90.000 dahana Razo Miserai Tutmose III me no möna moroi ba wasuwöta ba Gana’ana. Tobali ira sawuyu ba pertambangan,  lafaso wamazökhi nahia-nahia wamosumange, ba lakhao lala nidanö.

Barö wamatörö Kekaisaran Romawi, oya i’asogö zawuyu göi fasuwöta. Ba börö gangandröwa sanandrösa ba zawuyu andrö wa itaria alua wasuwöta. Ba abad siföföna, arakhagö matonga moroi ba nono mbanua Roma tobali sawuyu. Ato zawuyu moroi ba Miserai hegöi Roma nifaso ba wohalöwö ba lö sökhi lafolau khöra. Duma-dumania, awai andrö tola auri zawuyu ba pertambangan Romawi ha mato 30 fakhe.

Molo’ö welalö ginötö, itugö lö sa’e fa’asökhi nifalua khö zawuyu. I’otarai abad si-16 irugi abad si-19, no tobali hare sebua bisnis wamawa sawuyu ba gotalua Afrika hegöi Amerika. Ifatunö UNESCO, ’So mato 25 irugi 30 zuta ndra matua, ira alawe, ba iraono nitagö ba mu’amawa.’ Ngaotu ribu zi mate ba ginötö wo’ötö Samudra Atlantik. Imane samösa sawuyu si lö si mate sotöi Olaudah Equiano, ”Ngarö-ngarö ndra alawe hegöi ngarö-ngarö niha sarakhagö mate zanga’asogö fa’ata’u sebua.”

Fangosawuyu andrö tenga ha fa’abu dödö salua ba götö föna. Molo’ö Organisasi Buruh Internasional, arakhagö 21 zuta ndra matua, ira alawe, ba iraono zohalöwö tobali sawuyu barö fangosawuyu ba ha ma’ifu gazi mazui lö hadöi gazi. Sawuyu ba götö iada’a mohalöwö ba pertambangan, pabrik tekstil, pabrik batu bata, nahia wamalua horö, hegöi ba nomo niha. Hewa’ae lö nitehegö famareta, hiza’i fangosawuyu simane da’a tenga itugu alö.

Zuta niha sohalöwö nasa tobali sawuyu

MOLOI ENA’Ö AEFA

Börö zi lö sökhi si no irai alua khöra, ato zawuyu zangodödögö ena’ö tola aefa. Me abad siföföna SM, so samösa gladiator (sawuyu mazui niha nikuru nigazi ba wa’udusa föna niha sato ba götö Romawi) sotöi Spartacus hegöi zi 100.000 zawuyu tanö bö’ö samadaö khö Roma hiza’i lö a’ozu. Me abad si-18, mamadaö zawuyu si so ba Pulau Hispaniola ba Karibia khö zokhö ya’ira. Börö zi lö sökhi nifalua khö ndra sawuyu andrö wa tola so fasuwöta talifusö ba zi 13 fakhe. Buania, tobali soi si no te’efa’ö Haiti me 1804.

Fa’aheta Gizara’eli ba Miserai, hewa’ae na ato no sambua fangefa’ö sahöli-höli dödö ba wangosawuyu sagötö sejarah. Te tölu zuta mazui fefu soi andrö ni’efa’ö moroi ba wangosawuyu. Ba no sinangea mu’efa’ö ira. Molo’ö Sura Ni’amoni’ö ”oi halöwö niforege khöra”. (II Moze 1:11-14) Fara’o samösa ba ibe’e fareta ena’ö labunu fefu nono sawuyu ba ndraono Gizara’eli ena’ö lö monönö wa’atora.II Moze 1:8-22.

 Tohude wangefa’ö ndraono Gizara’eli andre moroi ba danö Miserai börö me fao danga Lowalangi. Imane Lowalangi khö Moze, ”Noa sa u’ila wa’abölö-bölö wamakaora andrö. Andrö möido tou sa’ae, ba wangefa’ö ya’ira.” (II Moze 3:7, 8) Irugi iada’a, gofu hezoso so niha Yahudi misa ba lafalua gowasa Fasa ba wanörö tödö salua andrö.II Moze 12:14.

AMOZUA MOROI BA WANGOSAWUYU

Imane Sura Ni’amoni’ö, ”Khö Lowalangida Yehowa sa, ba lö famuyu’ö huku,” ba da’a göi zamaduhu’ö khöda wa lö tebulö Lowalangi. (II Nga’ötö 19:7; Maleakhi 3:6) Ifatenge Yesu Lowalangi ”ba wanuriaigö fangefa ba nikuru . . . , ba wamolala nifakao, ba wangefa”. (Luka 4:19) Hadia da’a geluahania wa te’efa’ö dozi sawuyu? Tatu manö tenga. Mufatenge Yesu ba wangefa’ö niha moroi ba wangosawuyu horö hegöi fa’amate. Imane wanguma’ö, ”Ba i’efa’ö ami si duhu andrö.” (Yohane 8:32) Iada’a, oya lala zi duhu andrö nifaha’ö Yesu ba wangefa’ö niha.—Faigi kotak ” Te’efa’ö moroi ba Wangosawuyu Tanö Bö’ö”.

Sindruhunia, faehu lala ni’oguna’ö Yehowa ba wanolo Yosefo hegöi Blessing ena’ö tola aefa ira moroi ba wangosawuyu. Tola öbaso waö-waö Yosefo sahöli-höli dödö andrö ba Zura Ni’amoni’ö, ba mbuku I Moze faza 39 irugi 41. I’odödögö sibai göi Blessing ena’ö tola aefa ia moroi ba wangosawuyu.

Me no aefa lafofanö ia moroi ba zi sambua soi si so ba Eropa, möi Blessing ba Spanyol. Ba da’ö falukha ia khö ndra Samaduhu’ö Yehowa ba ifaha’ö ia ba Zura Ni’amoni’ö khöra. Ihalö gangetula ba wobohouni lala wa’aurinia ba i’alui halöwönia si tata. Aefa da’ö, mangalulu ia khö ndra alawe sangonorogö tödö nahia wohorö si no irai mohalöwö ia ena’ö tola mu’alösi gömö si lö tola lö ibu’a ero waŵa. Samuza ma’ökhö, tohare telefo khö Blessing moroi khö ndra alawe andrö. Omasi ia ba wo heta fefu wo’ömö Blessing ba i’andrö wa’ebolo dödönia. Hadia zalua? No ifaha’ö ia göi khö ndra Samaduhu’ö Yehowa! Imane Blessing, ”I’oguna’ö lala sahöli-höli dödö si duhu andrö ba wangefa’ö ya’ita.”

Abu sibai dödö Lowalangi Yehowa wamaigi falö’atulö nifalua khö ndraono Gizara’eli me tobali ira sawuyu ba Miserai. Tatu manö hulö zimanö da’ö göi dödönia wamaigi falö’atulö salua mane ma’ökhö. Sindruhu sa ba wangefa’ö fefu ngawalö wangosawuyu moguna wamohouni sebua ba niha gulidanö. Hiza’i no ifabu’u Lowalangi wa hasambalö ifalua wamohouni andrö. ”Ba tadöna-döna mbanua si yawa, si bohou, ba tanö si bohou, dali gamabu’ula linia andrö—ba zahono fa’atulö dödö.”II Fetero 3:13.

^ par. 2 No mufabö’öni döi.

^ par. 3 Eluahania lö zi lö tola lö isöndra gefe Blessing fa’ebuania dua irugi tölu zuta rupiah ero wongi (molo’ö fa’ebua gefe me götö da’ö). Fa’ebua gömönia, so mato 400 zuta rupiah.