Faigi nösi

Faigi ba menu sekunder

Faigi ba gangolifa

Samaduhu’ö Yehowa

Nias

Manuriaigö  |  No. 1 2018

Sura Niʼamoniʼö ba Faʼaurimö ba zi So Föna

Sura Niʼamoniʼö ba Faʼaurimö ba zi So Föna

KHALAIGÖ atö na mowaö-waö ndraʼugö ba nahia sogömi-gömi ba zi bongi. Hewaʼae no ara aekhu luo, lö abu dödömö börö me no öʼohe sete si tara haga. Na ösete tou danö, ahori öʼila hadia manö zi so ba lalamö. Ba na ösete zi so tanö föna, tola öʼila hadia ia zi so ba zaröu.

No amaedola sete göi Zura Niʼamoniʼö andrö. Simane nitutunöda ba duho-tuho si no tataluʼi, tola itolo ita Taromali Lowalangi ba wanaögö abula dödö si so fönada, simane nitaögöda ero maʼökhö ba gulidanö si lö tatu andre. Hizaʼi, tenga ha daʼö. Itolo göi ita enaʼö aboto ba dödöda hewisa waʼaurida ba zi so föna, irege tola taʼila ba taʼoʼö lala saekhu ba waʼohahau dödö ba faʼahono dödö. (Zinunö 119:105) Lalania?

Datatutunö zi dombua lala niʼogunaʼö Zura Niʼamoniʼö ba wameʼe khöda tötönafö ba zi so föna: 1 Itolo ita wanöndra ohitö dödö ba waʼauri, ba 2 ifahaʼö ita enaʼö tola fahuwu khö Zomböi yaʼita irugi zi lö aetu.

1 OHITÖ DÖDÖ BA WAʼAURI

Ibeʼe khöda mene-mene si sökhi Sura Niʼamoniʼö ba wanaögö abula dödö. Hizaʼi, Sura Niʼamoniʼö andrö tenga ha buku wanuturu lala manö. Lö ifarou ita ba wangosambuaʼö tödöda ba zoguna khöda samösa. Ifahaʼö ita enaʼö taʼameʼegö tödö zabölö moguna. Awena dania tola moʼeluaha waʼaurida.

Duma-dumania simane goi-goi Zura Niʼamoniʼö daʼa, ”Ohahau dödö ba wameʼe, moroi ba wanema.” (Halöwö Zinenge 20:35) Te no irai ötolo niha ba gefe. Mazui, no ötehegö ginötömö ba wamondrondrongo abula dödö nawöu. Tatu omuso dödöu börö me tola örara dödöra.

Na lö tatötöna zulö ba ginötö mamuala ita ba niha, sindruhu-ndruhu tarasoi waʼomuso dödö. So samösa penulis sangumaʼö, ”Na tabeʼe waʼaurida, abölö oya nitemada, asala lö tatötöna zulö.”  Na tabeʼe waʼaurida, mendrua manö ba niha si tebai mameʼe khöda sulö, hasambalö tatema dania zulö. Tebeʼe khöda ginötö ba woʼameʼegö tödö zabölö moguna. Sindruhunia, falulu fohalöwö ita khö Zomböi yaʼita. Moloʼö yaʼia, si sökhi si no tafalua andrö no amaedola gömö si lö tola löʼö ibuʼa khöda. (Gamaedola 19:17) Iʼameʼegö tödö sibai hadia zi no tafalua salahi niha nifakao, ba ifabuʼu wa isulöni khöda faoma faʼauri si lö aetu ba gulidanö faradaiso. Daʼa dötönafö sahöli-höli dödö ba zi so föna!​—Zinunö 37:29; Luka 14:12-14. *

Sabölö moguna, ifahaʼö ita Sura Niʼamoniʼö wa sindruhu-ndruhu tola moʼeluaha waʼaurida na tafosumange Lowalangi satulö sotöi Yehowa. Ifarou ita Taromalinia enaʼö tasuno ia, tafosumange, ba taʼoʼö, börö me sinangea itema fefu daʼö. (Zangombakha 12:13; Famaʼeleʼö 4:11) Na tafalua daʼö, tola taʼomusoiʼö dödö Zomböi yaʼita. No sahöli-höli dödöda daʼa. Iʼandrö khöda, ”Yaʼatua-tua ndraʼugö . . . omusoiʼö dödögu.” (Gamaedola 27:11) Angeragö, na sökhi gangetula nihalöda ba tefaudu ba goi-goi Zura Niʼamoniʼö, taʼomusoiʼö dödö Namada ba zorugo. Hadia mbörö? Börö me iʼameʼegö tödö ita ba omasi ia na tatema mbua ba woloʼö fanuturu lala moroi khönia. (Yesaya 48:17, 18) Sindruhunia, ohitö dödö sabölö molakhömi yaʼia daʼö na tafosumange Zamatörö banua si yawa awö danö, ba tafaudugö waʼaurida ba lala somasi ia.

2 FAHUWU KHÖ ZOMBÖI YAʼITA

Ifahaʼö ita Sura Niʼamoniʼö enaʼö fahuwu khö Zomböi yaʼita. Imane ba Mbuku Niʼamoniʼö, ”Miʼondrasi Lowalangi, ba iʼondrasi ami!” (Yakobo 4:8) Te itaria aombö dödöda hadia tola fahuwu ita khö Zomböi yaʼita fondrege zabölö andrö. Hizaʼi, ifaduhuʼö Sura Niʼamoniʼö, na ʼtaʼalui Lowalangiʼ, tola ʼtasöndraʼ ia börö me ”löʼö sa atö aröu ia khöda fefu”. (Halöwö Zinenge 17:27) Na fahuwu ita khö Lowalangi simane niʼoroiʼö Zura Niʼamoniʼö, ebua sibai gunania khöda ba zi so föna. Hadia mbörö?

Angeragö: Gofu hewisa lalania, tebai tefataluʼiʼö ita moroi ba nududa sebua, yaʼia daʼö faʼamate. (1 Korindro 15:26) Hizaʼi, lö tebulö Lowalangi sagötö faʼara. Lö irai mate ia, ba omasi ia na auri fefu zi fahuwu khönia irugi zi lö aetu. Iʼombakhaʼö Sura Niʼamoniʼö hadia niʼandrö Yehowa ba niha sangalui yaʼia si fao fehede omasiö, ”Yaʼauri dödömi, si lö aetu!”​—Zinunö 22:27.

Hewisa enaʼö tola fahuwu ndraʼugö khö Lowalangi irugi zi lö aetu? Böi böhöli wamahaʼö yaʼugö sanandrösa khönia ba Daromalinia, Sura Niʼamoniʼö. (Yohane 17:3; 2 Timoteo 3:16) Andrö wanolo moroi khönia enaʼö aboto ba dödöu Mbuku Niʼamoniʼö. Ifaduhuʼö khöda Sura Niʼamoniʼö, na lö taböhöli wangandrö faʼatua-tua moroi khö Lowalangi, hasambalö ibeʼe khöda. * (Yakobo 1:5) Safuria, odödögö wamalua si no öfahaʼö yaʼugö andrö. Yatobali ʼfandru föna gaheuʼ Daromali Lowalangi andrö ba ʼhaga ba lalauʼ, iadaʼa ba irugi zi lö aetu.​—Zinunö 119:105.

^ par. 8 Enaʼö öʼila danö böʼönia nasa sanandrösa ba waʼauri si lö aetu ba Waradaiso simane nifabuʼu Lowalangi, faigi faza 3 ba mbuku Hadia Nifahaʼö Zura Niʼamoniʼö Khöda? nifazökhi ndra Samaduhuʼö Yehowa.

^ par. 13 Ira Samaduhuʼö Yehowa, labeʼe wamahaʼö ba Zura Niʼamoniʼö si lö muʼandrö kefe enaʼö itugu aboto ba dödöu nösi Mbuku Niʼamoniʼö. Enaʼö öʼila lala wamahaʼö andrö, faigi video Hewisa Halöwö Famahaʼö ba Zura Niʼamoniʼö Nifaluama? ba jw.org/nia.

Lö tebulö Lowalangi sagötö faʼara, ba omasi ia na auri fefu zi fahuwu khönia irugi zi lö aetu