Faigi nösi

Faigi ba menu sekunder

Faigi ba gangolifa

Samaduhu’ö Yehowa

Nias

Manuriaigö  |  No. 6 2017

Höli no buala Lowalangi same’e fa’auri si lö aetu, buala fondrege zi sökhi

 TUHO SI OFÖNA | HADIA MBUALA FONDREGE ZI SÖKHI?

Hadia Mbuala Fondrege zi Sökhi?

Hadia Mbuala Fondrege zi Sökhi?

”Hasambalö ame’ela si sökhi, ba hasambalö buala so’ahonoa zi otarai moroi si yawa, moroi khö Nama zi haga andrö.” (Yakobo 1:17) Tatu manö, Sura Ni’amoni’ö no sambua tandra wa’oböwö Namada si so ba zorugo, Lowalangi Yehowa. Hewa’ae oya mbuala Lowalangi ba niha gulidanö, so sambua wondrege zebua moroi ba danö bö’ö. Hadia da’ö? Fehede Yesu nisura ba Yohane 3:16 zamatunö khöda, ”Simanö sa wa’omasi Lowalangi nösi gulidanö, no ibe’e Nononia andrö si ha sambua, ena’ö lö tekiko dozi samati khönia, ena’ö so khöra wa’auri si lö aetu.”

I’amualagö Nononia si ha sambua Lowalangi, no buala fondrege zebua da’ö moroi ba ngawalö mbuala nitemada, börö me tola te’efa’ö ita moroi ba wangosawuyu horö, fa’atua hegöi fa’amate. (Zinunö 51:7; Yohane 8:34) Hewa’ae talau ndregeda, tebai ta’efa’ö samösa ita moroi ba wangosawuyu. Hiza’i börö wa’ebua wa’omasi Lowalangi, ihenaigö zoguna ba wango’ozui fangefa andrö. Me ibe’e Nononia si ha sambua, Yesu Keriso tobali höli, ibe’e Lowalangi Yehowa dötönafö fa’auri si lö aetu ba niha solo’ö khönia. Hiza’i, hadia zindruhunia höli andrö? Hana wa moguna ia? Ba hewisa ena’ö tatema mbuania?

Höli ya’ia da’ö sambua böli nibu’a ba wangokhögö mangawuli zi no irai taya mazui ba wangefa’ö moroi ba wangosawuyu. Ifatunö khöda Sura Ni’amoni’ö wa muwöwöi zatuada siföföna andrö Adamo ba Khawa lö horö, tebe’e khöra hegöi ba nga’ötöra wa’auri si lö aetu si fao fa’owua-wua dödö ba gulidanö faradaiso. (1 Moze 1:26-28) Hiza’i, taya khöra da’ö fefu börö me abölö lafili walömolo’ö khö Lowalangi ba tobali ira niha samalua horö. Hadia lua-luania? Ibe’e wanema li Sura Ni’amoni’ö, ”Simane böröta horö andrö ba gulidanö, wa no ha samösa niha zamobörö, awö lua-lua horö andrö, fa’amate, awö wa no ikhamö niha fefu fa’amate andrö, börö wa no dozi samazökhi horö ira.” (Roma 5:12) Tenga fa’auri so’ahonoa nibe’e Gadamo ba nga’ötönia, hiza’i ondröita horö ba lua-luania fa’amate.

Sanandrösa ba höli, hadia zi no taya, simane da’ö göi nibu’a. Ba ginötö i’odödögö Adamo walömolo’ö khö Lowalangi, aekhu ia ba horö ba lua-luania taya wa’aurinia so’ahonoa. Simane niwa’ö Zura Ni’amoni’ö, da’ö mbörö wa tobali sawuyu horö hegöi fa’amate nga’ötö Gadamo. Tobali, moguna wa’auri niha so’ahonoa tanö bö’ö, fa’auri Yesu, mube’e tobali sumange ba wangefa’ö moroi ba wangosawuyu horö. (Roma 5:19; Efeso 1:7) Börö wa’omasi wa ibe’e Lowalangi höli andre, da’ö mbörö wa tola lafuli la’okhögö niha hadia zi no itayaigö Adamo hegöi Khawa, ya’ia da’ö fa’auri si lö aetu ba gulidanö faradaiso.​—Fama’ele’ö 21:3-5.

Börö zi no ifalua, andrö wa faduhu dödöda ba mbuala Lowalangi ya’ia da’ö höli zame’e fa’auri si lö aetu, no buala fondrege zebua moroi ba danö bö’ö. Datafaigi hadia manö zi tola manolo ya’ita ba wo’ame’egö tödö ”buala so’ahonoa” ena’ö tola tahalö gunania khöda, simane nitutunö ba wamobörö artikel andre.

Mamönökhi somasi ita. Ya’ita niha gulidanö no tohöna so khöda wa’omasi ena’ö auri sagötö fa’ara. (Zangombakha 3:11) Hewa’ae na tebai tafalua samösa zomasi ita andrö, hiza’i börö höli wa tola alua da’ö. Imane Sura Ni’amoni’ö, ”Luo horö sa, ba fa’amate, ba buala fa’ebua dödö Lowalangi  andrö, ba no fa’auri si lö aetu ba khö Keriso Yesu, So’aya ya’ita.”​—Roma 6:23.

Mamönökhi soguna khöda. Tebai la’asogö höli niha gulidanö. Imane Sura Ni’amoni’ö, ”Abölö ebua höli nosora; ibato sa’ae, irugi zi lö aetu.” (Zinunö 49:9) Börö da’ö moguna sibai khöda wanolo moroi khö Lowalangi ena’ö tola te’efa’ö ita moroi ba wangosawuyu horö hegöi fa’amate. Hiza’i, ”börö wangöhöli andrö, ba khö Keriso Yesu”, ihenaigö hadia zoguna khöda Lowalangi.​—Roma 3:23, 24.

Inötö si tefaudu. Imane khöda Sura Ni’amoni’ö, ”Me no mate salahida Keriso, me samazökhi horö ita na.” (Roma 5:8) Börö ”me samazökhi horö ita” wa mube’e da’ö, moroi ba höli oroma wa ebua wa’omasi Lowalangi khöda hewa’ae sebua horö ita. Ba oya ibe’e khöda dötönafö sinangea mubaloi, hewa’ae na tataögö nasa lua-lua horö iada’a.

Mangoroma’ö gohitö dödö satulö ba lö mangalui tana khönia. Ifatunö khöda Sura Ni’amoni’ö hadia mbörö wa itehegö ibe’e Nononia Lowalangi tobali höli, ”Ba da’ö no oroma wa’omasi Lowalangi andrö, ba khöda, me no ifatenge ba gulidanö Nononia Lowalangi, ononia si ha sambua andrö, ena’ö auri ita balazi ia. Ba da’ö so wa’omasi andrö, tenga wa no ta’omasi’ö Lowalangi, no wa no i’omasi’ö ita.”​—1 Yohane 4:9, 10.

Hewisa wangoroma’öu wa ö’ame’egö tödö mbuala fondrege zebua? Törö tödöu wehede Yesu nisura ba Yohane 3:16 sangoroma’ö wa ha ”samati khönia” dania ni’orifinia. Famati molo’ö Sura Ni’amoni’ö ya’ia da’ö ”fa’aro dödö ba nidöna-döna andrö”. (Heberai’o 11:1) Ena’ö so wa’aro dödö andrö, moguna ta’okhögö wa’aboto ba dödö. Börö da’ö, mafarou ndra’ugö ba wame’e inötö ba wamaha’ö sanandrösa khö Lowalangi Yehowa, Same’e ”buala so’ahonoa” andre, ba hadia zinangea öfalua ena’ö tola ösöndra wa’auri si lö aetu börö höli nibe’e Yesu khöu.

Tola öfaha’ö ndra’ugö ba da’a fefu na öfareso informasi si te’odane-dane ba Zura Ni’amoni’ö si no tehenaigö ba www.jw.org/nia. Omasi ndra Samaduhu’ö Yehowa ba wanolo ya’ugö. Faduhu dödöma wa ba ginötö öfaha’ö ndra’ugö ba mbuala fondrege zebua andre ba örasoi mbuania, tefarou dödömö ba wanguma’ö, ”Nisuno Lowalangi, börö Yesu Keriso, So’aya ya’ita!”​—Roma 7:25.