Faigi nösi

Faigi ba menu sekunder

Faigi ba gangolifa

Samaduhu’ö Yehowa

Nias

Manuriaigö  |  No. 6 2017

Hewisa Zindruhunia Yesu?

Hewisa Zindruhunia Yesu?

Lö hadöi sangokhögö koda Yesu. Lö irai i’andrö ba wogambaraini ya’ia mazui ba wamazökhi adu si fakhili-khili khönia. Hiza’i, no oya oroma ia ba ngawalö halöwö danga seniman ba zi hauga abad.

Tatu manö, lö la’ila ira seniman hewisa zindruhunia Yesu. Sasesenia, lafaudugö wogambaraini Yesu molo’ö si to’ölö mufalua ba zi sambua banua, nifaduhusi tödö ba agama, hegöi gangandröwa zasese mowöli khöra. Molua-lua gambara nifazökhira, mendrua manö me tola fabö’ö wamaigi niha sanandrösa khö Yesu hegöi famaha’önia.

So ösa ndra seniman zogambaraini Yesu simane samösa niha si lö fa’abölö sanau bu ba anifi-nifi gambinia mazui no ifangerau manö. Tanö bö’önia lagambaraini Yesu, simane mala’ika, ba dete högönia so gaolo-gaolo haga, mazui hulö zi lö ba dödönia niha bö’ö. Hiza’i hadia tefaudu fefu da’ö ba wo’amaedolagö Yesu? Hewisa ena’ö tola ta’ila? Sambua lalania ya’ia da’ö mamareso niwa’ö Zura Ni’amoni’ö, sanutunö sanandrösa ba zikhalania hegöi botonia. Tola göi tobali fanolo da’ö khöda, ena’ö tefaudu lala wangera-ngerada sanandrösa khönia.

”NO ÖFAZÖKHI KHÖGU MBOTO”

Da’ö wehede Yesu ba wangandrö ba ginötö tebayagö ia idanö. (Heberai’o 10:5; Matai’o 3:13-17) Hewisa mbotonia andrö? Me 30 fakhe fatua da’ö, ifatunö mala’ika Gaberieli khö Maria, ”Manabina dania ndra’ugö, ba mo’ono’ö ono matua, . . . Nono Lowalangi.” (Luka 1:31, 35) Yesu, niha so’ahonoa, hulö simane me muwöwöi Gadamo. (Luka 3:38; 1 Korindro 15:45) Tatu niha si sökhi Yesu ba te so göi khönia khili-khili simane ninania Maria, niha Yahudi.

So gambi Yesu, simane si no to’ölö ba niha Yahudi ba faehu moroi ba niha Romawi. Gambi no sambua tandra lakhömi ba fetaro si tohude; lö anau ba lö mu’ehaogö. Hiza’i, lö anau ba lö fawuka gambi Yesu, ba ihaogö wanaba bunia. Ha niha si no mutatugöi tobali Nazir, simane Simesono zi lö manaba bura.​—4 Moze 6:5; Zanguhuku 13:5.

Irugi 30 fakhe ndröfi Yesu, mohalöwö ia tobali tuka geu ba lö i’oguna’ö fakake listrik ba wohalöwö simane si so iada’a. (Mareko 6:3) Tatu manö wa no fatandro-tandro mbotonia. Ba mböröta wangainia halöwö khö Lowalangi, lö hadöi sanolo ya’ia me ”ifofanö ira fefu ba gosali, ba biri-biri ba sawi andrö; ba iduwagö gana’a zanuka andrö, iso’agö meza khöra”. (Yohane 2:14-17) Tatu ha niha sabölö zi tola mamalua simane da’ö. I’oguna’ö mboto nibe’e Lowalangi khönia ba wamalua halöwö nibe’e Lowalangi khönia, imane, ”Lö tola lö uturiaigö ba mbanua bö’ö göi duria somuso dödö andrö, turia Mbanua Lowalangi andrö; ba da’ö sa tefatenge ndra’o.” (Luka 4:43) Tatu moguna wa’abölö mboto ba wanörö ahe wanöröi Palestina ba wangombakha turia andre.

”MI’AINE KHÖGU, . . . BA UFOLOMBASE AMI”

Börö me fahuwu Yesu ba sökhi gamuatania wa tola so wa’adöni dödö ”dozi serege tödö”  ba wanema’ö wogaoni moroi khönia. (Matai’o 11:28-30) Fa’afahuwu ba fa’asökhi gamuatania zame’e fangokafu ba dödö niha somasi tefaha’ö khönia. Omasi göi fahuwu ndraono side-ide khö Yesu, simane niwa’ö Zura Ni’amoni’ö, ”Italagui ira.”​—Mareko 10:13-16.

Hewa’ae na itaögö wamakao Yesu fatua lö mate, hiza’i tenga da’ö geluahania wa no ifangerau manö ia. Duma-dumania, fao ia ba wa’owua-wua dödö ba walöwa ba Kana irege itolo wanga’asogö agu me ibali’ö nidanö tobali agu si sökhi. (Yohane 2:1-11) Ba ginötö tanö bö’ö, ibe’e ngawalö wamaha’ö si lö aetu mutörö tödö.​—Matai’o 9:9-13; Yohane 12:1-8.

Sabölö moguna, famaha’ö Yesu zanga’asogö fa’owua-wua dödö börö wa’auri si lö aetu ba niha samondro-ndrongo ya’ia. (Yohane 11:25, 26; 17:3) Me ifatenge ndra nifaha’önia si 70 we’amöi manuriaigö, ”owua-wua dödönia” ba imane, ”Da’ö mibe’e fa’omuso dödömi, wa no mutanö döimi ba zura, ba zorugo.”​—Luka 10:20, 21.

”BA YA’AMI, BA TENGA SIMANÖ”

La’alui lala ira sondrönia’ö ba agama ba götö Yesu ba wondrönisi tödö niha ba khöra samösa ba laforoma’ö sibai wetarora. (4 Moze 15:38-40; Matai’o 23:5-7) Tenga simane ya’ira Yesu, hiza’i ibe’e na’i mene-mene khö ndra nifaha’önia ena’ö lö ’lafatörö’ nawöra niha. (Luka 22:25, 26) Sindruhunia, ibe’e Yesu wamangelama, ”Mi’angelamaisi zangila amakhoita andrö, somasi mamaru baru sanau, somasi na la’owai ira ba kade.”​—Mareko 12:38.

Faehu sibai Yesu, ifaogö ia ba gotalua ngawawa niha sato, irege lö hadöi sangila ya’ia. (Yohane 7:10, 11) Mendrua manö, lö talafo tohude sibai ia ba gotalua nifaha’önia si 11 si lö faröi. Itandraigö fa’ago bawa Yuda si manga mböli si tobali ’tandra’ ba niha sato ena’ö la’ila Yesu.​—Mareko 14:44, 45.

Börö me oya zi lö mu’ila sanandrösa ba zikhalania, andrö wa tola ambö tefaudu ba wogambarainira Yesu. Hiza’i, baero hewisa zindruhunia ia, so zabölö moguna ya’ia da’ö hewisa wamaigida ia ba ginötö iada’a.

”MA’IFUTÖ NA, BA LÖ’Ö SA’AE LA’ILADO NIHA GULIDANÖ”

Mato hauga za me no aefa iwa’ö wehede andrö, mate Yesu ba muko’o. (Yohane 14:19) Ibe’e wa’aurinia tobali ”höli zato”. (Matai’o 20:28) Ba ngaluo si tölu, isusugi ia Lowalangi ba ”geheha” ba ”no ibe’e oroma ia” Lowalangi ba khö ndra nifaha’önia ösa. (1 Fetero 3:18; Halöwö Zinenge 10:40) Hewisa me iforoma’ö ia Yesu khö ndra nifaha’önia ba ginötö andrö? Tatu manö faehu sibai ia moroi ba zi to’ölönia, börö me lö i’anemai’ö la’ila ia ira nifaha’önia. Iwalinga sohalöwö ba kabu Yesu andrö Maria banua Magadala; ba so darua nifaha’ö sanörö lala ba Ema’usa, si lö mangi’ila ya’ia.​—Luka 24:13-18; Yohane 20:1, 14, 15.

Hewisa zindruhunia Yesu iada’a? Töra 60 fakhe me no aefa mate Yesu, i’ila gangilata sinenge omasiö sotöi Yohane sanandrösa khö Yesu. Tenga simane niha sarakhagö mate ni’ila Yohane ba döla röfa. Hiza’i, i’ila ”Razo razo ba So’aya sokhö”, Razo ba Mbanua Lowalangi, sangohori nudu Lowalangi ba zi lö aratö, bekhu hegöi niha si lö sökhi, ba solohe howu-howu si lö aetu ba niha gulidanö.​—Fama’ele’ö 19:16; 21:3, 4.