Owua-wua dödö Don hegöi Margaret * börö me tohare nonora alawe hegöi soroiyomonia ba wamalukhaisi ya’ira. Margaret, sonekhe mondrino si no pensiun, ihenaigö irino makaroni hegöi keju, somasi-masi ndra ma’uwunia ono matua si darua.

Me no oi mudadao ira fefu, ihalö gö andrö Margaret ba i’ohe ba meza. Ibokai lagö-lagö gö andrö, ba tokea ia me ha saus keju saukhu zi so ba mako! Olifu Margaret wame’e makaroni! *

Gofu hewisa wa’alawa ndröfida mazui si no tatörö, fefu oi no tafalua golalöwa. Tola manö fehede si lö mu’angeraigö mazui tafalua hadia ia zi lö faudu ba ginötönia, mazui te ta’osilö’ögö ma olifu ita zi sambua ngawalö. Hana wa so golalöwa? Hewisa wo’awaisi ya’ia? Hewisa ena’ö lö tafalua golalöwa? Fangera-ngera si tefaudu sanandrösa ba golalöwa tobali fanolo ba wame’e fanema li ba zinofu-nofu andre.

OLALÖWA—FAMAIGIDA HEGÖI FAMAIGI LOWALANGI

Ba ginötö tafalua zi sökhi, omuso dödöda na so zosuno ya’ita ba ta’ila wa no sinangea tatema da’ö. Na tafalua golalöwa, hewa’ae na tenga ni’odödögöda mazui lö la’ila niha bö’ö, hadia moguna tafatunö wa no so golalöwada? Moguna so wangide-ngide’ö wamalua da’ö.

Na asiliyawa ita, te ta’odödögö wangositengagö golalöwa nifaluada, tafobahulu niha bö’ö, mazui ta’alui lala ba wombini’ö ya’ia. Si to’ölönia, tola i’asogö mbua si lö sökhi da’ö. Tola manö lö awai-wai gabula dödö ba tola mufobahulu niha bö’ö ba zi lö duhu. Hewa’ae na tola aefa ita moroi ba golalöwada iada’a, hiza’i moguna tatörö tödöda ba zi so fönada wa ”dozi ita tesekhegö dania khö Lowalangi, i’ombakha’ö hadia ia khönia zamösana”.​—Roma 14:12.

Tefaudu wangera-ngera Lowalangi sanandrösa ba golalöwa. Ba mbuku Zinunö, mu’amaedolagö tobali ’sahakhö tödö ba sebua tödö’ Lowalangi; ya’ia ”tenga si lö mamalö-malö watahisania, ba fönunia, ba tenga si lö aetu”. I’ila wa lö mo’ahonoa niha ba aboto ba dödönia wa i’otarai me tumbu no so zo’amböta khöda, ”itörö tödönia wa no gawu-gawu ita”.​—Zinunö 103:8, 9, 14.

Aefa da’ö, simane ama sebua fa’omasi, omasi Lowalangi na ya’ita, ononia, fagölö wangera-ngerada khönia ba wamaigi olalöwa. (Zinunö 130:3) Si fao fa’omasi ibe’e mene-mene hegöi fanuturu lala ba Daromalinia, sanolo ya’ita ba wamatunö golalöwa nifaluada samösa hegöi nifalua niha bö’ö.

LALA WO’AWAISI OLALÖWA

Sasesenia na no mufalua golalöwa, ihorigö ginötö hegöi fangera-ngera ba tödönia si samösa niha ba wotahigö niha bö’ö mazui ifaduhu’ö wa lö fasala niwa’ö mazui nifaluania. Hiza’i, ba ginötö  tetutu ba dödö niha wehedeu, moroi na ö’osatulö, sökhi na ö’andrö wa’ebolo dödö ena’ö lö tekiko wahuwusau. Hadia no irai öfalua golalöwa ba sanga’asogö mbao dödö mazui lö sökhi lua-luania khöu mazui ba niha bö’ö? Moroi na fatahi-tahi’ö samösa mazui öfobahulu niha bö’ö, hana wa lö öfalua wondrege zi sökhi ba wombulö’ö olalöwa andrö? Na fatandro’ö wanguma’ö wa olalöwa niha bö’ö da’ö, tola so wa’afaehu mbua wangera-ngera ba monönö gabula dödö. Tobali, halö zi tobali famaha’ö, bulö’ö, ba olifugö.

Na lafalua golalöwa niha bö’ö, aoha sibai khöda ba wangoroma’ö wa lö fatema ba dödöda. Sökhi ta’o’ö mene-mene Yesu Keriso me iwa’ö, ”Andrö, fefu hadia ia zomasi ami lalau khömi niha, da’ö göi milau khöra.” (Matai’o 7:12) Na öfalua golalöwa, hewa’ae side-ide, tatu omasi’ö na lahakhösi tödö ndra’ugö niha bö’ö mazui mube’e aefa khöu zala andrö. Tobali, hadia lö omasi’ö öfalua zimane da’ö ba niha bö’ö?​—Efeso 4:32.

GOI-GOI SI TOLA MANOLO BA WO’AWAISI OLALÖWA

Imane sambua kamus, olalöwa, tohare moroi ba ”wangai angetula si fasala, fa’aboto ba dödö si no fagambö-gambö, mazui börö wa’ambö wo’ame’egö tödö”. Moguna tatörö tödöda wa itaria lafalua dozi niha sambua mazui töra moroi ba gotalua mbua-bua andrö. Hiza’i, tola alö wa’oya golalöwa na mufatimbaisi goi-goi si tobali dane-dane si so ba Zura Ni’amoni’ö.

Sambua goi-goi si tesöndra ba Gamaedola 18:13, imane ”Na so zanema li, na lö nifondro-ndrongonia, ba tebe’e falötödö ba fangila khönia.” Tobali, be’e ösa ginötöu ba wamondro-ndrongo hegöi ba wo’angeraigö hadia zinangea öwa’ö, si tobali fanolo ena’ö lö aösö-aösö öbe’e wanema li mazui ba wamalua ya’ia. Moguna ua aboto ba dödöu fefu hadia zi tobali börönia ena’ö lö fasala ndra’ugö wangai angetula ba faböi alua golalöwa.

Imane goi-goi Zura Ni’amoni’ö tanö bö’ö, ”Na dali ami, ba ya’atulö ami ba niha fefu.” (Roma 12:18) Falua wondrege zi sökhi ba wanga’asogö fa’atulö hegöi falulu fohalöwö. Ba ginötö falulu fohalöwö ba niha bö’ö, osinangegö ba ame’egö tödö ba forege ba wosuno hegöi ba wamarou tödöra. Na simane da’ö zalua, tola alio mube’e aefa mazui mu’olifugö wehede hegöi amuata si lö mu’odödögö, ba tola mu’awaisi ba wa’asökhi mazui ba wa’atulö golalöwa si tebai mu’aohasi ba dödö.

Na öfalua golalöwa, tandraigö halö zi tobali famaha’önia. Moroi na ö’alui-alui dani ba wangatulö’ö hadia ia niwa’ö mazui nifaluau, oguna’ö ginötö andrö ba wondrou’ö amuata si sökhi ni’okhögöu. Hadia moguna nasa khöu wondrou’ö fa’ebolo dödö, fa’asökhi dödö, mazui fanaha tödö? Hewisa göi sanandrösa ba wa’ohau-hau, fa’atulö, ba fa’omasi? (Galatia 5:22, 23) Si lö’ö-lö’önia, tola öfaha’ö ndra’ugö ena’ö lö öfuli öfalua zimane da’ö ba ginötö tanö bö’ö. Böi talafo angeraigö sibai nirasoimö. Na itaria mu’ohe ba wa’iki ba tola möi fangalösi wönu.

BUA MOROI BA WANGERA-NGERA SI TEFAUDU

Na so khöda wangera-ngera si tefaudu sanandrösa ba wamaigi olalöwa, tola tobali fanolo da’ö khöda ba wo’awaisi olalöwa molo’ö lala si tefaudu. Tola itugu ohahau dödöda ba sökhi gamakhaitada ba niha. Na ta’odödögö wamaha’ö ya’ita moroi ba golalöwa nifaluada, tola itugu atua-tua ba omasi niha wamaigi ya’ita. Lö talafo afatö sibai dödöda mazui lö sökhi wamaigida ya’ita samösa. Tola göi itugu ahatö ita ba niha bö’ö na ta’ame’egö tödö ira ba ginötö lafalua golalöwa. Sabölö moguna ya’ia da’ö, tola tasöndra mbua na ta’o’ö wa’omasi Lowalangi hegöi ba wame’enia aefa golalöwa.​—Kolose 3:13.

Hadia möi famakiko acara nösi nomo, golalöwa nifalua Margaret simane nifatunö ba wamobörö? Lö’ö. Labali’ö da’ö zamösana tobali fama’ikira, mendrua manö Margaret, ba oi omasi ira gö andrö, hewa’ae na lö hadöi makaroni! Ba zi hauga fakhe aefa da’ö, lafuli latutunö ira ma’uwunia ono matua si darua andrö ba ndraonora hadia zi no irai alua si tebai la’olifugö sanandrösa khö duara hegöi awera!

^ par. 2 No mufabö’öni döi.

^ par. 3 Makaroni hegöi keju ya’ia da’ö gö nifazökhi moroi ba pasta keju faoma nihawui saus keju.