Faigi nösi

Faigi ba menu sekunder

Faigi ba gangolifa

Samaduhu’ö Yehowa

Nias

Manuriaigö  |  No. 6 2017

 TUHO SI OFÖNA | HADIA MBUALA FONDREGE ZI SÖKHI?

Mangalui Buala Fondrege zi Sökhi

Mangalui Buala Fondrege zi Sökhi

Mangalui buala si tefaudu ba zi samösa niha tenga halöwö saoha. Hewa’ae simanö, sanema zotatugöi hawa’ebua mböli mbuala andrö ba dödönia. Ba hewa’ae no sökhi sibai molo’ö zanema lö tatu na simane da’ö wamaigi niha bö’ö.

Duma-dumania, samösa zi bohou ebua zoraso tödönia wa fakake elektronik si bohou no buala so’ahonoa. Ba niha si no ebua-bua, te abölö la’ame’egö tödö mbuala si fagöna ba dödö, simane harato zatua. Ba zi hauga banua, buala sabölö la’omasi’ö satua hegöi iraono ya’ia da’ö kefe, ena’ö tola i’oguna’ö da’ö sanema ba zomasi-masi dödönia.

He na so daha-taha, ato niha sangoguna’ö fa’atua-tua ba wangalui buala sabölö tefaudu ba niha si tohude. Hewa’ae tenga saoha wangalui buala simane da’ö börö zoya ngawalö, hiza’i na mu’odödögö tola manö musöndra. Datatutunö zi öfa ngawalö zi tola monönö fa’omuso dödö khö zanema.

Somasi zanema. Samösa ndra matua moroi ba Belfast, Irlandia Utara, zamotöi kureta balap nitemania me 10 mazui 11 fakhe ndröfinia, no buala fondrege zi sökhi si no irai so. Hadia mbörö? Imane wanguma’ö, ”Börö me edönado sibai wangokhögö ya’ia.” Fehede da’ö zangoroma’ö wa fa’omasi zi samösa niha ba mbuala andrö mo’amakhaita ba wo’ame’egönia tödö mbuala andrö mazui lö’ö. Tobali, angeraigö sanandrösa ba niha sinangea öbe’e buala. Tandraigö alui hadia ni’ame’egönia tödö, börö me fo’amegö tödö zi samösa niha asese mo’amakhaita ba zomasi ia. Duma-dumania, asese sibai ebua ba dödö dua hegöi gawe ginötöra ba wefao ba nösi nomora. Te omasi ira asese la’ila ndraono hegöi ma’uwura. Liburan si sambua omo si fao tua ba awe te abölö la’ame’egö tödö moroi ba mbuala tanö bö’ö nibe’e khöra.

Sambua lala ena’ö tola ta’ila hadia zomasi zi samösa niha, moguna tobali ita samondro-ndrongo si sökhi. Ibe’e wamarou dödö Sura Ni’amoni’ö, ”Ndramu’alio’ö wamondrongo, böi ndramufahulö wehede.” (Yakobo 1:19) Ba ginötö fao ndra’ugö wahuhuosa ba nawö mazui khö dalifusöu ero ma’ökhö, haogö wamondro-ndrongo  hadia manö zomasi hegöi si lö omasi ira. Tobali, tola öfaudugö ba wame’e khöra buala.

Soguna khö zanema. Tola manö i’ame’egö tödö sibai mbuala andrö sanema hewa’ae na no fondrege zide-ide na tefaudu ba zoguna khönia. Tobali, hewisa ena’ö ö’ila hadia zoguna ba zi samösa niha?

Te lala sabölö aoha ena’ö tola mu’ila ya’ia da’ö na ösofu hadia zoguna khönia mazui hadia zomasi ia. Hiza’i, tola alö wa’omuso dödö zamuala na simane da’ö, börö me abölö omasi ira na lö idöna-döna sanema mbuala andrö. Aefa da’ö, so ösa niha aoha khöra ba wanutunö sanandrösa ba zomasi mazui si lö omasi ira, sasesenia lö latutunö hadia zoguna khöra.

Börö da’ö, nehegö hegöi sura zalua ba zi samösa niha. Hadia ya’ia samösa ono matua mazui ono alawe sawuyu-wuyu, atua, lö sangowalu, no mangowalu, no fabali auri, ira alawe lakha mbanua, sohalöwö, mazui no pensiun? Angeraigö hadia mbuala si tola mamönökhi soguna ba zi samösa niha.

Ena’ö aboto ba dödöu mbuala soguna khö zanema, moguna fahuhuo ndra’ugö ba niha si no irai manörö salua andrö. Te tola lafatunö khöu hadia manö zoguna si tohude si lö oya la’ila niha bö’ö. Na ötema mbua wangera-ngera simanö, tola öfaudugö wame’e buala ba niha, tefaudu ba zoguna khönia.

Inötönia. Imane Sura Ni’amoni’ö, ”Fehede si tefaudu, ba ha lö asökhi!” (Gamaedola 15:23, Terjemahan Dunia Baru) Ayati da’a zangoroma’ö wa tola ebua sibai lua-luania na tafili ginötö wahuhuosada. Simanö göi nifaluada. Simane fehede nifa’ema ba ginötö si tefaudu tola möi fangokafu dödö zamondrongo, simanö göi mbuala nibe’e ba ginötö si tefaudu, tola i’asogö wa’omuso dödö sebua khö zanema.

Samösa nawöu sangowalu. Samösa zi lö aratö awai sekola. Sambua ngambatö sodöna-döna ena’ö tumbu khöra nono sawuyu. Ha si ma’ifu da’a moroi ba wa’oya ginötö si tola mu’oguna’ö ba wame’e buala. So ösa niha sangirö’ö daftar acara si tohude simane da’ö si tola mufalua ba ndröfia. Da’a zanolo ya’ira ba wo’angeraigö buala sinangea labe’e na ero inötö si tefaudu. *

Tatu manö, tenga dali inötö si tohude sibai awena öbe’e mbuala. Fa’omuso dödö börö wamuala tola manö ta’okhögö ero inötö. Hiza’i, moguna mangelama. Duma-dumania, na so ndra matua samuala ba zi samösa ira alawe ba lö tatu hadia mbörö wa ibe’e da’ö. Te tola manö ihalö gangetula ira alawe wa buala andrö no tobali tandra wa so wa’edöna ndra matua andrö ena’ö itugu ahatö khönia. Da’a zangoroma’ö wa moguna mu’angeraigö gohitö dödö zamuala.

Ohitö dödö zamuala. Simane duma-duma megeno, sökhi na mu’angeraigö hadia lö fabö’ö dania geluaha ba dödö zanema na so nibe’e zamuala. Baero da’ö, moguna göi ifareso samösa hadia gohitö dödönia samuala. Ato niha sanguma’ö wa ohitö dödöra ba wamuala andrö no fondrege zi sökhi, so göi zamuala ba ginötö si no mutatugöi ba zi döfi börö me no sinangea ira wamalua ya’ia. So göi danö bö’ö zodöna-döna wa lafalua khöra zi sökhi mazui latema zulö moroi ba zi no lafalua.

Hadia zi tola öfalua ba wotatugöi hadia no atulö gohitö dödöu na mamuala’ö? Imane Sura Ni’amoni’ö, ”Fefu hadia ia khömi, ba moroi ba wa’omasi milau.” (1 Korindro 16:14) Na ohitö dödöu ba wamuala andrö börö wa’omasi hegöi fo’ame’egö tödö khö zanema, tola owua-wua dödö zanema mbualamö andrö, ba tola göi so khöu wa’owua-wua dödö sabölö ebua börö wa’oböwö soroi ba dödö. Na mamuala ndra’ugö soroi ba dödö, no ö’omusoi’ö dödö Namada si so ba zorugo. Isuno niha Keriso ba Korindro meföna Faulo börö me so khöra wa’oböwö hegöi me omasi ira wotuhini halöwö wame’e fanolo khö ndra talifusö si so ba Yudea. Imane Faulo, ”Si no aoha gölö fame’e, da’ö sa zomasi Lowalangi.”​—2 Korindro 9:7.

Na tabe’e dödöda ba ngawalö ba zi no  mufatunö andrö mege, tola omuso dödö niha ba mbuala nibe’eda. Börö da’a hegöi tanö bö’önia zi tobali dani khö Lowalangi wa ibe’e mbuala fondrege zebua ba niha. Omasiga ba wo’andrö khöu ena’ö önehegö hadia mbuala fondrege zebua na öbaso artikel aefa da’a.

^ par. 13 Ato göi niha same’e buala ba ginötö wanörö tödö luo wa’atumbu mazui hari raya. Hiza’i, sasesenia nifalua andre lö faudu moroi ba nifaha’ö Zura Ni’amoni’ö. Faigi artikel ”Manofu Zombaso—Hadia ba Niha Keriso Moguna Natal?” ba majalah da’a.