Faigi nösi

Faigi ba gangolifa

Samaduhu’ö Yehowa

Fili li Nias

 TUHO SI OFÖNA | HADIA MBUALA FONDREGE ZI SÖKHI?

”Da’a Mbuala Fondrege zi Sökhi si No Irai Utema”

”Da’a Mbuala Fondrege zi Sökhi si No Irai Utema”

Da’ö nirasoi samösa nono alawe si 13 fakhe me la’amualagö khönia sara nono nasu. Samösa ndra alawe, pengusaha si no sukses sanguma’ö wa komputer nibe’e namania me SMA ia no buala sombulö’ö fa’aurinia. Ba samösa fo’omo ira matua si bohou mangowalu sanguma’ö, wa no buala fondrege zi sökhi nitemania kartu ulang tahun siföföna wangowalura nifazökhi wo’omonia ira alawe.

Ero röfi, ato niha sangohorigö inötö hegöi samorege ba wangalui buala ”fondrege zi sökhi” nibe’e khö nawöra mazui khö zi fa’ila khöra ba ginötö si tohude. Ba ato zomuso tödö na so zanguma’ö fehede simane megeno moroi yawa. Hewisa göi ndra’ugö? Hadia omasi öbe’e mazui ötema mbuala ni’ame’egö tödö sibai?

Mamuala no sambua fa’omuso dödö, tenga ha börö me so lua-luania khö zanema, hiza’i börö me tola göi molua-lua ba zamuala. Hewa’ae simanö, imane Sura Ni’amoni’ö, ”Ohahau dödö ba wame’e, moroi ba wanema.” (Halöwö Zinenge 20:35) Tatu manö, tola monönö wa’omuso dödö zamuala na i’ame’egö tödö sibai mbuala andrö sanema.

Tobali, hewisa ena’ö tola öbe’e mbuala si tola möi börö wa’omuso dödö khöu hegöi khö zanema? Na tebai öbe’e mbuala ”fondrege zi sökhi”, hadia nifaluau ena’ö tola mu’ame’egö tödö mbuala andrö?