Faigi nösi

Faigi ba menu sekunder

Faigi ba gangolifa

Samaduhu’ö Yehowa

Nias

Manuriaigö  |  No. 4 2016

Hadia Ö’ila?

Hadia Ö’ila?

Hadia zi tohude moroi ba nifalua Yesu khö zofökhö bou auri?

Niha Yahudi me föna ata’u ira khö zo fökhö bou auri ba götö Zura Ni’amoni’ö. Fökhö salio fatöfa ba niha andrö tola igönaisi irugi nuo ba i’asogö wa’atekiko sagötö wa’ara. Lö nisöndra dalu-dalunia. Börö da’ö, ya’ira si göna fökhö andre lafosambua’ö nahiara ba lafangelama niha bö’ö sanandrösa ba wakhöra.III Moze 13:45, 46.

Oya gamokhoita nifazökhi ndra sondrönia’ö agama Yahudi sanandrösa ba wökhö bou auri, töra moroi ba si no tesura ba Zura Ni’amoni’ö. Duma-dumania, ira samaha’ö labe’e goroisa wa awena tola ahatö niha ba zofökhö bou auri na 2 mete gotalua. Ba na so nangi, fa’aröunia tobali 45 mete. So ösa ndra ahli Talmud no lafo’eluaha wehede ”baero golombasewa” nisura ba Daromali Lowalangi, wa so fökhö bou auri lafofanö moroi ba mbanua si so göli. Börö da’ö, na la’ila ndra sondrönia’ö ba agama ira sobou auri bakha ba mbanua andrö, latebu faoma kara ba lamane ”Ofanö ba da’ö, böi öbe’e ra’iö niha bö’ö”.

Faehu sibai nifalua Yesu! Lö ifofanö so fökhö bou auri, hiza’i ibabaya ba ifadöhö ira.— Matai’o 8:3.

Hadia dane-dane wa latehegö wabalisa ira sondrönia’ö ba agama Yahudi?

Sura fabalisa me döfi 71 mazui 72 M

Fabalisa no tobali fada’awasa ndra sondrönia’ö ba agama me abad si föföna Masehi. Börö da’ö, samuza inötö, so ösa niha Farizai’o zanandraigö Yesu, labe’e khönia wanofu, ”Hadia, tola itibo’ö ngambatönia niha, gofu hadia mbörö?”Matai’o 19:3.

Ba goroisa Moze itehegö ba ndra matua iröi ngambatönia na ”i’ila bakhönia zi fatuwu khönia”. (V Moze 24:1) Ba ginötö Yesu so dombua zekola zamaha’ö, no faehu ba wamo’eluahara sanandrösa ba goroisa andrö. Abölö abakha wamo’eluaha Zekola Syamai, lawa’ö awena tola fabali na ”ra’iö”, ya’ia da’ö fohorö. Zekola Hilel latehegö ba ndra matua wamabalisi fo’omonia na lö khöra fahasara dödö, hewa’ae na ide-ide zala. Molo’ö Zekola Hilel, tola ifabalisi ira matua wo’omonia na asese lö ami wondrinonia, mazui na isöndra ndra alawe sabölö baga.

Andrö, hadia ibe’e Yesu wanema lira? Imane khöra Yesu, ”Na so zanibo’ö ira alawenia, na tenga horö mbörö, ba na ihalö danö bö’ö, ba sohorö da’ö.”Matai’o 19:6, 9.