”Ba khönia mobörö, wa tefa’anö mboto andrö, ma’asambua, awö wa tefaböbö.”​—EF. 4:16.

SINUNÖ: 53, 16

1. I’otarai me mböröta, hewisa na mohalöwö Lowalangi?

FALULU fohalöwö Yehowa hegöi Yesu i’otarai me lafazökhi fefu hadia ia. Yesu no gomböila danga Yehowa si föföna sibai. Aefa da’ö, falulu fohalöwö Yesu tobali ’duka khönia’. (Gamd. 8:30) Simanö göi nono mbanua Yehowa, falulu fohalöwö ira ba halöwöra. Duma-dumania, Noakhi hegöi ösi nomonia falulu fohalöwö ira ba wamazökhi owo. Falulu fohalöwö göi ndraono Gizara’eli ba wamasindro, ba wodudugö, hegöi ba wombulö’ö nahia dawöla. Ba gosali, lalau manunö ba la’oguna’ö ngawalö musik si möi fanuno Yehowa. Tola lafalua da’ö fefu ono mbanua Yehowa börö me falulu fohalöwö ira.​—I Moz. 6:14-16, 22; IV Moz. 4:4-32; I Nga. 25:1-8.

2. (a) Hadia duma-duma si tola tahalö moroi ba niha Keriso si föföna? (b) Hadia wanofu-nofu nifatunöda ba duho da’a?

2 Niha Keriso si föföna lö aetu-aetu falulu fohalöwö ira. Itutunö Faulo so khöra wahasara dödö hewa’ae no fabö’ö-bö’ö wa’atua-tuara hegöi halöwöra. Fefu ira la’o’ö Yesu Keriso börö me ya’ia Zondrönia’ö ya’ira. I’amaedolagö ira Faulo hulö zi sambua boto. Fefu ndroto-ndroto si so ba mboto  falulu fohalöwö. (Baso I Korindro 12:4-6, 12.) Hewisa göi ita iada’a? Hewisa ena’ö tola falulu fohalöwö ita ba wanuriaigö, ba mbanua niha Keriso, hegöi ba nomo?

FALULU FOHALÖWÖ BA WANURIAIGÖ

3. Hadia gangilata ni’ila Yohane?

3 Yohane andrö no samösa sinenge. Me döfi si föföna no alua ba gangilatania sanandrösa ba dorofe nifoli ndra mala’ika si dafitu. Me inötö ifoli dorofe mala’ika si lima, i’ila Yohane ”ndröfi, si no atoru tou ba danö, moroi ba mbanua si yawa”. Tebe’e nonokusi ba ndröfi andrö ba wamokai mbawa gawuwukha. Me ibokai mbawa gawuwukha andrö, möi baero zimbo ba tamo soya. Ba lö ifakiko zinanö tamo andrö hegöi eu, hiza’i ”niha andrö nifakiko, si lö tandro Lowalangi andrö, ba gangango”. (Fam. 9:1-4) Aboto ba dödö Yohane wa tamo soya tola i’asogö wamakiko. No irai alua da’a ba danö Miserai ba götö Moze. (II Moz. 10:12-15) Tamo ni’ila Yohane andrö eluahania niha Keriso si no labayoini ba wangombakha fanguhuku ba agama faya. Ba fao khöra niha si ha’uga zuta fa’ato sanötöna ba waradaiso. Si dombua ngawawa andre so khöra wahasara dödö ba wamalua halöwö andrö. Börö halöwö andrö, ato niha si no latolo ba wondröi agama faya ba te’efa’ö ira moroi ba danga Zatana.

4. Hadia halöwö nifalua nono mbanua Lowalangi, ba hadia zinangea lafalua ena’ö tefalua halöwö andrö?

4 Fatua lö alua wönu Lowalangi moguna taturiaigö ’duria somuso dödö’ ba zi sagörö ulidanö. No halöwö sebua da’a! (Mat. 24:14; 28:19, 20) Moguna takaoni fefu niha ’sowökhi tödö’ ena’ö labadu ’idanö fangorifi’. Eluahania, tafaha’ö niha somasi mangila nösi Zura Ni’amoni’ö. (Fam. 22:17) Hiza’i, awena tola tafalua ia, na tefaböbö ita ma’asambua ba falulu fohalöwö ita khö ndra talifusöda ba mbanua niha Keriso.​—Ef. 4:16.

5, 6. Hewisa wa tola oroma wahasara dödöda moroi ba halöwö fanuriaigö?

5 Fanuriaigöda moguna toföfö ba tefa’anö ena’ö tola terongo ba niha fefu. Tola tafalua ia börö wanuturu lala moroi ba mbanua niha Keriso simane ba gangowuloa we’amöi manuriagö. Möita taturiaigö duria somuso dödö ba niha sanandrösa Mbanunia Lowalangi. No ha’uga zuta mbuku si te’odane-dane moroi ba Zura Ni’amoni’ö si no tebe’e ba niha ba zi sagörö ulidanö. Itaria, la’andrö khöda ba wotuhini kampanye khusus ba wanuriaigö. Na tafalua da’ö, so khöda wahasara dödö ba zi ha’uga zuta ndra talifusöda ba zi sagörö ulidanö ba wamalua halöwö si fagölö andre! Falulu fohalöwö göi ita khö ndra mala’ika sanolo nono mbanua Lowalangi ba wanuriaigö.​—Fam. 14:6.

6 Na tabaso Buku Tahunan, so khöda wa’omuso dödö me ta’ila so mbua nitemada moroi ba wanuriaigö ba zi sagörö ulidanö. Aefa da’ö, so khöda wahasara dödö ba zi sagörö ulidanö ba wokaoni niha we’amöi ba gangowuloa sebua. Fagölö-gölö gangombakhata nitemada ba gangowuloa sebua. Me no tarongo huhuo sebua, drama, hegöi famadumaisi, itugu terou dödöda wame’e si sökhi khö Yehowa. So khöda wahasara dödö khö ndra talifusöda ba zi sagörö ulidanö na fao ita ba Wanörö Tödö fa’amate Yesu nifalua ero röfi. (I Kor. 11:23-26) So gangowuloa si fendronga tafalua ba zi sagörö ulidanö, ba mufalua ia me  14 Nisan, no aekhu luo ba wangandrö saohagölö khö Yehowa ba zi no ifalua khöda hegöi ba wolo’ö oroisa Yesu. Ha’uga migu fatua lö alua Wanörö Tödö fa’amate Yesu, falulu fohalöwö ita ba wogaoni niha sato ena’ö fao ira ba gangowuloa nifaluada andre.

7. Hadia zi tola tafalua na so khöda falulu fohalöwö?

7 Na ha sambua damo, lö mo’eluaha halöwö nifaluania. Simanö göi na ha samösa ita, tatu manö lö ikhamö ölöda ba wanuriaigö ba niha fefu. Hiza’i börö me falulu fohalöwö ita, tola ta’ombakha’ö sanandrösa khö Yehowa ba zi ha’uga zuta niha irege fao ira ba wanuno hegöi ba wamolakhömi ya’ia.

FALULU FOHALÖWÖ BA MBANUA NIHA KERISO

8, 9. (a) Hadia duma-duma nibe’e Waulo ba wamaha’ö niha Keriso ena’ö so wahasara dödö? (b) Hewisa ena’ö tola falulu fohalöwö ita ba mbanua niha Keriso?

8 Itutunö Faulo ba niha Efeso hadia zinangea lafalua ena’ö toföfö halöwö ba mbanua niha Keriso. Imane göi wanguma’ö wa ono mbanua niha Keriso moguna ”manöi fefu hadia ia” ba wamati. (Baso Efeso 4:15, 16.) Imane Faulo wa fefu niha Keriso i’amaedolagö simane botoda, tola falulu fohalöwö ira ba gangowuloa ena’ö so khöra wahasara dödö hegöi ba wolo’ö Yesu, Sondrönia’ö banua niha Keriso. Imane wanguma’ö wa tefa’anö mboto andrö börö me no ”tefaböbö, ba wamakhai andrö fefu”. Tobali, ya’ita fefu he si no atua mazui sawuyu-wuyu, sofökhö mazui si lö’ö, hadia zinangea tafalua?

9 No ituyu ndra satua sokubaloi Yesu ba wame’e fanuturu lala ba mbanua niha Keriso, ba omasi ia göi na tafosumange ira ba ta’o’ö wanuturu lala nibe’era. (Heb. 13:7, 17) Tatu manö abua ba wamalua ya’ia. Hiza’i, tola ta’andrö geheha moroi khö Yehowa ba wanolo ya’ita ena’ö ta’o’ö fefu hadia ia wanuturu lala nibe’e ndra satua sokubaloi. Angeraigö göi hadia mbuania ba mbanua niha Keriso na so khöda wangide-ngide’ö hegöi na falulu fohalöwö ita khö ndra satua sokubaloi. So wahasara dödö ba mbanua niha Keriso, ba faoma la’omasi’ö nawöra fefu.

10. Hadia zinangea lafalua ira enoni ena’ö so wahasara dödö ba mbanua niha Keriso? (Faigi gambara ba wamobörö wamaha’ö.)

10 Ira enoni tola latolo mbanua niha Keriso ena’ö so wahasara dödö. Falulu fohalöwö ira khö ndra satua sokubaloi. Lafaigi göi hadia ibönö mbuku ni’oguna’öda ba wanuriaigö, ba latema’ö na so niha sawena möi ba gangowuloa. La’odödögö göi ba wangehaogö Balai Kerajaan hegöi ba wondrorogö ya’ia ena’ö lö ta’unö. Tatu manö ta’andrö khöra saohagölö ba nifaluara andrö. Na falulu fohalöwö ita khöra, fefu halöwö ba mbanua niha Keriso tola toföfö.​—Fatimbaisi Halöwö Zinenge 6:3-6.

11. Hadia zi tola lafalua ira talifusöda ono matua ba wanga’aro’ö fahasara dödö?

11 Ato zatua sokubaloi samorege halöwö ba mbanua niha Keriso ba zi ha’uga fakhe fa’ara. Hiza’i, börö me itugu atua ira tola manö lö oya zi tola lafalua simane me mböröta. Ira talifusöda ono matua tola labe’e wanolo. Na tefaha’ö ira, tola lafalua halöwö ba mbanua niha Keriso. Na la’odödögö halöwöra ira enoni, samuza inötö tola manö tobali ira satua sokubaloi. (I Tim. 3:1, 10) Iada’a, so ösa ndra satua sokubaloi sagawuyu boto, oya halöwö si tola lafalua. So zi tobali pengawas wilayah ba oya mbanua niha Keriso si no latolo.  Tatu manö ta’andrö saohagölö khöra me aoha gölöra wamalua da’a.​—Baso Zinunö 110:3; Zangombakha 12:1.

FALULU FOHALÖWÖ YOMO BA NOMO

12, 13. Hewisa ena’ö falulu fohalöwö zi sambua omo?

12 Hewisa ena’ö falulu fohalöwö ita yomo ba nomo? Sambua lala ya’ia da’ö na fao ita ba wamaha’ö ba nomo nifalua ero migu. Satua hegöi iraono tola fao ira ba wamaha’ö sanandrösa khö Yehowa, ena’ö tedou wa’omasira khö nawöra. Ba mbongi wamaha’ö ba nomo, tola lafaha’ö ira hewisa lala we’amöi manuriaigö. Ba wamaha’ö andrö, tola göi lafondro-ndrongo na so zodunö-dunö sanandrösa ba Zura Ni’amoni’ö irege la’ila wa fefu ira la’omasi’ö Yehowa ba lafalua zomasi ia. Lua-luania itugu aro wahuwusara ba nomo.

Na mufalua mbongi wamaha’ö ba nomo, tola itugu aro wahuwusa zatua hegöi iraono (Faigi ngenoli si 12, 15)

13 Hewisa ena’ö falulu fohalöwö zi sambua ngambatö? (Mat. 19:6) Na faoma la’omasi’ö ba lafalua zomasi Yehowa, tola so khöra wa’omuso dödö ba fahasara dödö ba wongambatö. Moguna la’oroma’ö wa’omasi khö nawöra, simane nifalua Gaberahamo ba Sara, Iza’aki ba Rebeka, hegöi Elikana ba Hana. (I Moz. 26:8; I Zam. 1:5, 8; I Fet. 3:5, 6) Na lafalua da’ö, so khöra wahasara dödö ba itugu aro wahuwusara khö Yehowa.​—Baso Zangombakha 4:12.

14. Na tenga samosumange Yehowa wo’omou, hadia nifaluau ena’ö aro wongambatöu?

14 No itegu ita Sura Ni’amoni’ö wa tebai mangowalu ba niha si lö mamosumange Yehowa. (II Kor. 6:14) Hiza’i, so göi wo’omo ndra talifusöda si tenga Samaduhu’ö Yehowa. So zawena mangila sindruhu me no mangowalu ira, ba lö omasi wo’omonia tobali Samaduhu’ö. Tanö bö’önia so göi zangowalu ba zi sara lala famati, hiza’i ba gafuriata iröi mbanua niha Keriso fo’omonia. Hewa’ae simanö, ira talifusöda andre la’odödögö sibai ba wondrorogö fongambatöra ena’ö aro ba wolo’ö mene-mene Zura Ni’amoni’ö. Abua wamalua da’a. Duma-dumania, simane Mary ba fo’omonia David, no irai fao ira ba wangai halöwö Yehowa. Ba gafuriata lö omasi David we’amöi ba gangowuloa. Hiza’i fo’omonia Mary i’odödögö ena’ö tobali ia fo’omo si sökhi ba iforoma’ö mbua-bua niha Keriso. Ifaha’ö ndraononia si daönö sanandrösa khö Yehowa ba lö ibato we’amöi ba gangowuloa hegöi ba gangowuloa sebua. Ha’uga fakhe aefa da’ö, no egebua ndrononia ba tola la’alui zoguna khöra samösa. Lö faröi Mary ba wamosumange Yehowa hewa’ae oya gabula dödönia. Ba ginötö da’ö, ibörögö ibaso David mbuku nibe’e Mary. Lua-luania, fasakali möi ia ba gangowuloa. Ma’uwunia si önö fakhe, ihenaigö ihalö gurusi. Na lö hadöi möi David, imane ma’uwunia andrö, ”Abu dödögu na lö möi duagu.” Ba gafuriatania, hewa’ae 25 fakhe no faröi David khö Yehowa ifuli mangawuli ia. Ya’ia hegöi fo’omonia so khöra wa’omuso dödö börö me ifuli fao ira ba wamosumange Yehowa.

15. Hewisa ndra talifusöda si no ara mongambatö tola latolo ndra talifusöda sawena mongambatö?

15 Irugi iada’a, lö ibato Satana wamakiko fongambatö. Da’ö mbörö wa moguna falulu fohalöwö zi no mongambatö. Hewa’ae no ara mongambatö ndra’ugö mazui sawena, angeraigö hadia zinangea öwa’ö mazui öfalua ena’ö aro wongambatömi. Ira talifusö si no ara mongambatö tola tobali ira duma-duma  si sökhi khö ndra talifusöda sawena mongambatö. Tola lakoni ndra talifusöda sawena mongambatö andre ba nomora ena’ö fao ira ba mbongi wamaha’ö ba nomo. Tola göi la’ila wa moguna sibai laforoma’ö wa’omasi khö ngambatöra zamösana ba so khöra wahasara dödö hewa’ae no ara mangowalu ira mazui lö’ö.​—Tit. 2:3-7.

”TALABU TASAWA MIYAWA HILI YEHOWA ANDRÖ”

16, 17. Hadia nidöna-döna nono mbanua Lowalangi?

16 Falulu fohalöwö ndraono Gizara’eli me möi ira ba Yeruzalema ba wamalua gowasa. Lafa’anö fefu hadia zoguna khöra ba lala. Aefa da’ö fao ira ba wofanö ba faoma latolo nawöra. Ba gosali, fao ira ba wanuno hegöi ba wamosumange Yehowa. (Luk. 2:41-44) Iada’a tafa’anö ita ba we’amöi ba gulidanö si bohou. Andrö wa moguna falulu fohalöwö ita ba ta’odödögö wamalua fahasara dödö. Hadia no ö’odödögö wamalua ya’ia?

17 Niha ba gulidanö andre lö khöra fahasara dödö ba asese fa’udu ira gofu hadia ia mbörö. Tobali, ta’andrö sibai saohagölö khö Yehowa börö me no aboto ba dödöda zindruhu ba ta’okhögö wahasara dödö! Ono mbanua Yehowa ba zi sagörö ulidanö lafosumange ia si tefaudu ba zomasi dödönia. Mendrua manö ba ginötö safuria andre, abölö ta’odödögö wahasara dödö ya’ita ono mbanua Yehowa. Simane nifa’ele’ö Yesaya hegöi Mikha, faoma möi ita ba ”hili Yehowa”. (Yes. 2:2-4; baso Mikha 4:2-4.) Ba zi so föna, omuso sibai dödöda me ”te’osambua’ö ita” fefu ba zi sagörö ulidanö ba falulu fohalöwö ba wamosumange Yehowa!