”Ha niha sa ba khömi, sedöna mangotomosi malige, si lö dumadao ua mangerai balazo, na irugi, ba wamalua ya’ia?”LUK. 14:28.

SINUNÖ: 6, 34

Ba duho da’a hegöi ba duho migu fönada tatutunö sanandrösa ba zi bohou ebua somasi tebayagö idanö

1, 2. (a) Hadia zi möi fangomusoi’ö dödö nono mbanua Lowalangi ba ginötö andre? (b) Hadia nifalua zatua hegöi ira satua sokubaloi ba wanolo iraono si bohou ebua ena’ö aboto ba dödöra geluaha famayagö idanö?

IMANE samösa satua sokubaloi khö Christopher si 12 fakhe ndröfinia, ”U’ila ndra’ugö i’otarai me tumbu ba omuso dödögu me urongo wa omasi ndra’ugö tebayagö idanö. Omasido usofu khöu, ’Hana wa omasi ndra’ugö tebayagö idanö?’” Sinangea na manofu zatua sokubaloi andrö. Omuso dödöda na ta’ila ero röfi ngahönö zi bohou ebua lahalö gangetula ba wamayagö ira idanö. (Zango. 12:1) Hiza’i, ira satua hegöi satua sokubaloi, moguna la’ila wa angetula  famayagö idanö nihalö zi bohou ebua no angetulara samösa ba la’ila hadia geluaha wamayagö idanö.

2 Ba Zura Ni’amoni’ö ta’ila, na no aefa fawu’u li ita khö Yehowa ba tebayagö idanö, ba da’ö sa’ae tebörögö wa’auri si bohou tobali niha Keriso. Aefa da’ö oya howu-howu nitemada moroi khö Yehowa, hiza’i so göi wanandraigö moroi khö Zatana. (Gamd. 10:22; I Fet. 5:8) Andrö moguna labe’e ginötöra ira satua ba wamaha’ö ndraonora hadia geluahania tobali nifaha’ö Keriso. Na satua ndraono andrö tenga Samaduhu’ö Yehowa, ira satua sokubaloi zanolo iraono andrö. (Baso Luka 14:28-30.) Simane na lafazökhi nomo, moguna lafa’anö fefu hadia zoguna ba wamazökhi ya’ia. Simanö göi zi bohou ebua, moguna lahaogö la’era-era ba lafa’anö ira fatua lö tebayagö ira idanö ena’ö lö faröi ira ba wangai halöwö khö Yehowa ”irugi gamozua”. (Mat. 24:13) Hadia zinangea ifalua si bohou ebua ena’ö ihalö halöwö Yehowa sagötö fa’ara? Datafaigi.

3. (a) Molo’ö Matai’o 28:19, 20 ba I Fetero 3:21, hana wa moguna wamayagö idanö? (b) Hadia wanofu nifatunöda ba duho da’a ba hadia mbörö?

3 Na si bohou ebua ndra’ugö, hadia omasi’ö tebayagö idanö? No sambua ohitö dödö sabölö sökhi da’ö! No töi sebua na tobali ndra’ugö Samaduhu’ö Yehowa. Moguna lafalua da’a niha Keriso ena’ö tola te’orifi ira na tohare wamakao sabölö-bölö. (Mat. 28:19, 20; I Fet. 3:21) Ba ginötö tebayagö ndra’ugö idanö, no öfabu’u khö Yehowa wa lö faröi ndra’ugö wangai halöwönia sagötö fa’ara. Tatu manö omasi öfalua zi no öfabu’u andrö. So wanofu-nofu si tola manolo ya’ugö ena’ö tola öhalö gangetula ba wamayagö idanö: (1) Hadia no ufo’ahonoa wangai angetula andre? (2) Hadia omasi ndra’o tebayagö idanö? (3) Hadia aboto ba dödögu geluaha folulu fa’uri khö Yehowa? Datafaigi hadia wanema li moroi ba zinofu-nofu andre.

 HADIA SO KHÖU WA’ATUA WANGERA-NGERA BA WAMATI?

4, 5. (a) Hana wa famayagö idanö tenga dali alawa ndröfi? (b) Hadia geluahania ba niha Keriso wa’atua wangera-ngera ba wamati?

4 Lö niwa’ö Zura Ni’amoni’ö wa ha si no alawa döfi zi tola mubayagö idanö mazui lö nitatugöinia hawa’alawa ndröfi awena tola mubayagö idanö. Imane ba Gamaedola 20:11, ”Su’a nono matua [mazui, ”iraono” New World Translation of the Holy Scriptures, 2013] sa’ae, ba oroma ba mbua-buania, na sohau-hau ba na sadölö dödö.” Tobali, iraono manö aboto ba dödöra hadia geluaha wamalua satulö hegöi folulu fa’auri khö Zomböi ya’ia. Famayagö idanö no angetula si sökhi ba zi bohou ebua ba wangoroma’ö wa so khöra wa’atua wangera-ngera ba wamati hegöi ba wolulu fa’aurira khö Yehowa.—Gamd. 20:7.

5 Hadia geluaha atua wangera-ngera ba wamati? Satua fangera-ngera ba wamati tenga dali alawa ndröfi mazui ebua mbotonia. Imane Sura Ni’amoni’ö wa niha satua fangera-ngera ba wamati ”no to’ölö tödö, ba wamaehusi hadia zatulö hadia zi lö atulö”. (Heb. 5:14) Niha satua fangera-ngera ba wamati, i’ila hezo zatulö ba ihalö gangetula ena’ö lö iböhöli wamalua ya’ia. Lö alio adöni dödönia ba wamalua si lö atulö. Ba lö göi itötöna niha bö’ö ba wangombakha khönia ba wamalua satulö. Iraono si bohou ebua si no mubayagö idanö no sinangea ifalua hadia zatulö hewa’ae lö hadöi satuania mazui salawa döfi ba ngania.—Fatimbaisi Filifi 2:12.

6, 7. (a) Tutunö wanandraigö salua khö Danieli me so ia ba Mbabilona. (b) Hadia dandra wa so khö Danieli wa’atua wangera-ngera ba wamati?

6 Hadia tola i’oroma’ö iraono si bohou ebua wa so khönia wa’atua wangera-ngera ba wamati? Faigi duma-duma Danieli. Te ono matua ia me la’ohe ba Mbabilona. Lö hadöi satuania ba ngainia. So ia bo gotalua niha si lö fa’aboto ba dödö khö Lowalangi. Me so ia ba Mbabilona tohude ia moroi ba niha bö’ö. Moroi ba gotalua ndraono si bohou ebua tanö bö’ö ya’ia zi no tefili ösa ba wangai halöwö khö razo. (Dan. 1:3-5, 13) Halöwö simane da’a te lö isöndra ba Gizara’eli.

7 Hadia nifalua Danieli? Hadia adöni dödönia? Hadia tola awuwu ia ba wamati labe’e ira niha Mbabilona? Lö’ö! Imane Sura Ni’amoni’ö me so ia ba Mbabilona, ”iwa’ö sibai tödönia Danieli, lö ihalö salakha khönia” ba i’aröu’ö ia moroi ba ngawalö zo’amakhaita ba agama faya. (Dan. 1:8) Da’ö dandra wa’atua wangera-ngera Danieli ba wamati!

Ono matua si bohou ebua si so wa’atua wangera-ngera ba wamati, lö i’osamati ia na ba Balai Kerajaan, hiza sa na ba zekola so ia tobali si fahuwu ba niha gulidanö (Faigi ngenoli si 8)

8. Hadia wamaha’ö si tola öhalö moroi ba duma-duma Danieli?

8 Hadia wamaha’ö si tola öhalö moroi ba duma-duma khö Danieli? Niha satua fangera-ngera ba wamati lö tebulö wa’afaduhu dödönia hewa’ae so gabula dödö salua khönia. Tenga simane loa ia, ifabö’öni la’a-la’a gulinia molo’ö hezo i’i’agö. Eluahania, lö i’osifahuwu khö Lowalangi na ba Balai Kerajaan so ia, hiza sa na ba zekola tobali ia si fahuwu ba niha gulidanö. Satulönia, lö faröi ia hewa’ae göna ia fanandraigö.Baso Efeso 4:14, 15.

9, 10. (a) Hadia gunania na la’angeraigö ira si bohou ebua me tetandraigö wamatira barö-barö da’a? (b) Hadia geluaha wamayagö idanö?

9 Samösa lö niha so’ahonoa. Niha salawa döfi manö fataria lafalua zala. (Zango. 7:20) Na omasi’ö tebayagö idanö, moguna öfareso hezo ndrege no ö’o’ö goroisa Yehowa. Sofu khöu samösa,  ’Hadia no ara u’o’ö goroisa Yehowa?’ Angeraigö atö hewisa ndra’ugö me tetandraigö wamatiu barö-barö da’a. Hadia tola ötatugöi hadia zinangea öfalua? Simane Danieli, hadia so niha samarou ya’ugö ba wangoguna’ö fa’atua-tuau ba gulidanö nifatörö Zatana andre? Na edöna adöni dödöu, hadia aboto ba dödöu zomasi Yehowa?Ef. 5:17.

10 Hana wa moguna ö’ila wanema li moroi ba wanofu-nofu simanö? Börö me da’ö zanolo ya’ugö ena’ö ö’ila wa tenga si famai-mai nifotöi famayagö idanö. Na tebayagö ndra’ugö idanö la’ila niha sato wa no fawu’u li ndra’ugö khö Yehowa. Öfabu’u wa ö’omasi’ö ia ba öfosumange ia soroi ba dödö. (Mrk. 12:30) Fefu zi no mubayagö idanö moguna ifalua hadia zi no ifabu’u khö Yehowa.Baso Zangombakha 5:3, 4.

HADIA DA’Ö NO ANGETULAU SAMÖSA?

11, 12. (a) Na omasi ndra’ugö tebayagö idanö, hadia zinangea ö’angeraigö? (b) Hadia zi tola manolo ya’ugö ena’ö ö’ila hadia geluaha wamayagö idanö simane wamaigi Yehowa?

11 Imane Sura Ni’amoni’ö wa fefu nono mbanua Yehowa hegöi si bohou ebua moguna lafosumange ia ”moroi si’aikö ba dödö”. (Zin. 110:3) Tobali, niha somasi mubayagö idanö moguna ihaogö i’angeraigö wa da’a no ohitö dödönia samösa. Moguna öfareso nösi dödöu, mendrua manö na i’otarai ba wa ide-ide no ö’ila zindruhu.

12 Te no asese ö’ila niha si no tebayagö idanö, simane si fahuwu khöu mazui ira talifusöu ba wa’aniha. Hiza’i, moguna mangelama ndra’ugö, böi ha börö me no abönö ndröfimö mazui me no mubayagö idanö niha bö’ö ba ömane tödöu no tola sa’ae mubayagö ndra’o idanö. Hewisa wa tola faduhu dödöu wa sindruhu-ndruhu ö’ila geluaha wamayagö idanö? Angeraigö hadia mbörö wa moguna sibai wamayagö idanö. Tola ö’ila dania wanema li ba da’a hegöi ba duho aefa da’a.

13. Hezo manö ö’ila wa ohitö dödöu samösa wamayagö idanö andre?

13 Sambua lala ena’ö ö’ila wa angetula soroi ba dödöu wamayagö idanö ya’ia da’ö na öfareso wangandröu. Hadia asese mangandrö ndra’ugö khö Yehowa? Hadia ha simane-mane da’ö manö wangandröu? Fanema li moroi ba wanofu andre zangoroma’ö hewisa wa’ahatöu khö Yehowa. (Zin. 25:4) No ihenaigö wanema li wangandröda Yehowa ba Zura Ni’amoni’ö. Lala tanö bö’ö na omasi ndra’ugö itugu ahatö khö Yehowa ba öfosumange ia soroi ba dödö ya’ia da’ö fareso ginötö wamaha’öu ya’ugö. (Yos. 1:8) Tandraigö angerönusi da’a, ’Hadia lö aetu-aetu ufaha’ö ndra’o ba Zura Ni’amoni’ö? Hadia fao ndra’o ba mbongi wamaha’ö ba nomo?’ Fanema li moroi ba wanofu andre tola möi fanolou ba wamaigi hadia ohitö dödöu samösa wamayagö idanö andrö.

HADIA GELUAHA FOLULU FA’AURI ANDRÖ?

14. Tutunö hadia gamaehutania folulu fa’auri ba famayagö idanö?

14 Ato ndraono si bohou ebua si lö mangila hadia gamaehuta wolulu fa’auri ba famayagö idanö. So zanguma’ö wa no lalulu wa’aurira khö Yehowa, hiza’i lö edöna ira nasa tebayagö idanö. Hadia fao dödöu ba da’ö? Folulu fa’auri ya’ia da’ö mangandrö ndra’ugö khö Yehowa, öfabu’u wa öfosumange ia sagötö  fa’ara. Na tebayagö ndra’ugö idanö, no öforoma’ö ba niha sato wa no ölulu wa’auriu khö Yehowa. Börö da’ö, fatua lö tebayagö ndra’ugö idanö, moguna ö’ila hadia geluahania wolulu fa’auri khö Lowalangi.

15. Hadia geluahania folulu fa’auri?

15 Me ölulu wa’aurimö khö Yehowa, ömane khönia wa fa’aurimu no tana khönia. Öfabu’u khönia wa sabölö moguna ba wa’auriu ya’ia da’ö wangai halöwö khönia. (Mat. 16:24) Tenga si famai-mai na fawu’u li khö Lowalangi! (Mat. 5:33) Tobali, hewisa wangoroma’öu wa tenga tana khöu ndra’ugö sa’ae hiza’i no tana khö Yehowa?—Rom. 14:8.

16, 17. (a) Be’e duma-duma hadia geluahania fa’auriu tenga khöu samösa. (b) Hadia niwa’önia khö Yehowa ba ginötö ilulu wa’aurinia?

16 Datafaigi duma-dumania. Khalaigö atö ibe’e khöu mbuala samösa zi fahuwu khöu ya’ia da’ö moto. Ibe’e khöu fefu zura-sura moto andrö ba imane, ”Khöu sa’ae moto andre.” Hiza’i imane khöu aefa da’ö, ”Ya’o zololohe onokusi he. Tebai ya’ugö zolohe moto. Daya’o zolohe.” Hewisa dödöu ba mbuala andrö? Hewisa dödöu ba zi fahuwu khöu andrö?

17 Na so niha solulu fa’aurinia khö Yehowa, imane wanguma’ö khö Lowalangi, ”Ululu wa’aurigu khöu. Tana khöu ndra’o.” Sinangea idöna-döna Yehowa khönia wa ifalua zi no ifabu’u. Tobali hewisa na so zamosumange Yehowa ibini’ö ia fakawa ba niha si tenga samosumange Lowalangi? Mazui hewisa na itema halöwö si möi daha-tahania we’amöi manuriaigö hegöi ba gangowuloa niha Keriso? Niha samalua simane da’ö lö ifalua zi no ifabu’u khö Yehowa. Fagölö ia simane niha si lö mame’e onokusi moto. Na talulu wa’aurida khö Yehowa tamane khönia, ”Tana khöu wa’aurigu tenga tana khögu.” Tafalua zomasi Yehowa hewa’ae lö tefaudu ba zomasi dödöda. O’ö nifalua Yesu me imane, ”Tenga ba wolau somasi ndra’o möido tou moroi ba zorugo, ba wolau somasi samatenge ya’o möido tou.”—Yoh. 6:38.

18, 19. (a) Hadia wamaha’ö si tola tahalö moroi khö Rose hegöi Christopher? (b) Hewisa dödöu sanandrösa ba wamayagö idanö?

18 Famayagö idanö tenga angetula si famai-mai. No sambua töi sebua ba wolulu fa’auri hegöi famayagö idanö khö Yehowa. Iraono si bohou ebua sangomasi’ö Yehowa ba si no mangila eluaha folulu fa’auri, lö aombö dödöra wolulu fa’auri hegöi ba wamayagö ira idanö. Lö maniasa ira ba gangetula si no lahalö. Samösa zi bohou ebua si no mubayagö idanö sotöi Rose imane, ”U’omasi’ö Yehowa, ba lö si tola mangomusoi’ö tödögu baero wangai halöwö khönia. Lö khögu fa’aombö dödö me uhalö gangetula wamayagö idanö.”

19 Hadia göi niwa’ö Christopher nitutunö ba wamobörö duho da’a? Hewisa dödönia me no tebayagö ia idanö me 12 fakhe ndröfinia? Imane wa omuso sibai dödönia. Ibörögö ihalö halöwö safönu inötö tobali perintis biasa me 17 fakhe ndröfinia, ba 18 fakhe ndröfinia tobali ia enoni. Iada’a mohalöwö ia ba Mbetieli. Imane, ”Famayagö idanö andrö angetula si sökhi. Omuso sibai dödögu wangai halöwö khö Yehowa hegöi ba gangowuloania.” Na omasi ndra’ugö tebayagö idanö, hewisa wama’anöu ya’ugö? So wanema li ba duho aefa da’a.